Shu yil 21-22 aprel kunlari O‘zbekiston musulmonlari idorasi raisi, muftiy Shayx Nuriddin Xoliqnazar hazratlari tashabbusi bilan buyuk davlat arbobi va sarkarda Amir Temur tavalludining 690 yilligi munosabati bilan sohibqiron bobomiz tug‘ilib o‘sgan qadim va navqiron Shahrisabzda “Halol kurash – 2026” respublika musobaqasi o‘tkaziladi. 
Mazkur musobaqada O‘zbekiston musulmonlari idorasining Qoraqalpog‘iston musulmonlari qoziyoti, viloyatlar va Toshkent shahar vakilliklari tomonidan o‘tkazilgan tuman-shahar hamda viloyat miqyosidagi saralashlarda g‘oliblikni qo‘lga kiritgan 60 ga yaqin diniy soha xodimlari o‘zaro bellashadi. 

Ayni paytda musobaqa bo‘lib o‘tadigan polvonlar yurti bo‘lgan Qashqadaryo vohasining Shahrisabz tumani Miraki shaharchasida qizg‘in tayyorgarlik ko‘rilib, ishtirokchilar uchun barcha shart-sharoitlar hozirlangan. 
Jumladan, bellashuv maydonlari, mehmonlar istiqomat qiladigan “Miraki Resort” mehmonxonasi, qur’a tashlash tadbiri o‘tkaziladigan zallar har jihatdan tayyor holga keltirilib, musobaqa shukuhini aks ettiruvchi bannerlar o‘rnatilgan. 

Ma’lumot o‘rnida, 2026 yil 7 aprel kuni Prezidentimiz raisligida jismoniy tarbiya va sport sohasini yangi bosqichga olib chiqish masalalari yuzasidan o‘tkazilgan videoselektor yig‘ilishida qator topshiriqlar belgilab berilgan edi. Mazkur vazifalarga hamohang ravishda tashkil etilayotgan musobaqa va uning doirasidagi tadbirlar jamiyatimiz, xususan, imomlar o‘rtasida sog‘lom turmush tarzini qaror toptirish barobarida islom ahkomlariga amal qilish, soha xodimlari o‘rtasida birdamlik, o‘zaro hurmat va do‘stlik ruhini kuchaytirishi bilan ahamiyatlidir. 

O‘zbekiston musulmonlari idorasi 
Matbuot xizmati