Qur’on – adolat manbai
Dunyodagi eng nufuzli ta’lim muassasalaridan biri Angliyaning Harvard yuridik maktabi Qur’oni karimni adolatning eng buyuk ifodasi sifatida tan oldi. Bu haqda islam.ru ma’lum qilgan.
Muassasa o‘z kutubxonasiga kiraverishiga muqaddas kitob oyatlaridan parcha keltirib, bu borada o‘z fikrlarini aniq bildirdi.
Fakultetning asosiy eshigiga tepasida Niso surasining 135-oyati bitilgan: «Ey iymon keltirganlar! O‘zingizga, ota-onangizga, qarindosh-urug‘ingizga, xoh boyga, xoh kambag‘alga qarshi bo‘lsa ham, Allohning huzurida guvoh bo‘ling. Albatta, Alloh har ikkisini himoya qilishga qodirdir. Adashib qolmaslik uchun (qalbingizdagi) havoyi nafslarga ergashmang. Agar (adolatni) buzsangiz yoki yaxshi amaldan bosh torsangiz, Alloh nima qilayotganingizni biladir».
Maktabning Islom huquqi o‘quv dasturida ba’zi muhim mavzular ham batafsil yoritilgan.
Umuman olganda, islom qonunlari adolat va tenglikni diniy nuqtayi nazardan qanday ta’minlashi, keyin esa uning jamiyatga tatbiq etilishini o‘rgatadi.
O‘zbekiston musulmonlari idorasi Matbuot xizmati
Turkiy davlatlar muftiylari 10 ga yaqin muhim bayonot va fatvolarni imzoladilar
Xabar berganimizdek, Ozarbayjon poytaxti Boku shahrida Turkiy davlatlar muftiylari kengashining navbatdagi VII yig‘ilishi bo‘lib o‘tdi.
Yig‘ilish yakunida O‘zbekiston, Turkiya, Ozarbayjon, Qozog‘iston va Qirg‘iziston muftiylari muhim yo‘nalishlarda 3 ta bayonot va zamonaviy masalalarga oid 6 ta yirik fatvoni imzolashdi.
Jumladan, «Islomning ilm-fan va texnologiyaga yondashuvi» mavzusidagi bayonotda Islom dinida insoniyat farovonligiga xizmat qiluvchi barcha ilmiy va texnologik yutuqlar qo‘llab-quvvatlanishi bilan birga, ular yuksak axloqiy mezonlar, adolat va mas’uliyat tamoyillari asosida rivojlanishi shartligi ta’kidlandi.
«Musulmonligi ma’lum bo‘lgan shaxsni kofirga chiqarishning hukmi» to‘g‘risidagi bayonotda Islom ta’limotiga ko‘ra, kalimai shahodat keltirib, qibla ahlidan bo‘lgan har qanday shaxs musulmon hisoblanishi hamda qilgan gunohi yoki amaldagi nuqsoni tufayli uni kufrda ayblash (takfir qilish) qat’iyan man etilishi aytildi. Shuningdek, Turkiy davlatlar ulamolari ushbu bayonotda jamiyatda fitna, qon to‘kilishi va nizolarga sabab bo‘luvchi takfirchilik oqimlariga qarshi ilmiy-ma’rifiy kurashni kuchaytirish, ummat birdamligini mustahkamlash zarurligiga e’tibor qaratishdi.
«Oila qurishga targ‘ib qilish, uni muhofaza qilish va mustahkamlashga doir umumiy mas’uliyat» bayonotida Islom ta’limotiga ko‘ra, oila nikoh asosiga quriladigan, sog‘lom avlod va jamiyat davomiyligini ta’minlovchi, insonga ruhiy xotirjamlik hamda axloqiy tarbiya beruvchi muqaddas muassasa ekaniga urg‘u qaratildi. Muftiylar oila institutini himoya qilish, yoshlarni oilaga tayyorlash va milliy-ma’naviy qadriyatlarni mustahkamlashda birdamlikka chaqirdilar.
Shuningdek, muftiylar tomonidan «Bitta qabrga birdan ortiq mayyitni dafn etishning hukmi», «Ijaraga berilgan dehqonchilik yerlarining ushri», «Fatvo so‘rash va fatvo berishda sun’iy idrokdan foydalanish masalasi», «Juma namozi durust bo‘lishining shartlari», hijriy oy boshlanishini aniqlash mezonlari va takfir masalasiga doir 6 ta fatvo matni imzolandi.
O‘zbekiston musulmonlari idorasi Matbuot xizmati
