Ozarbayjonning ommabop «Kaspiy» gazetasida Toshkent shahrida bunyod etilayotgan O'zbekistondagi Islom tsivilizatsiyasi markaziga bag'ishlangan maqola chop etildi, deb xabar bermoqda «Dunyo» AA muxbiri.

Nashrda 2024 yil boshiga qadar Toshkentda O'zbekistondagi Islom tsivilizatsiyasi markazini ochish rejalashtirilayotgani ma'lum qilingan.

«Markaz qurilishi so'nggi besh yil davomida Toshkent shahrining Olmazor tumanidagi mashhur Hazrati Imom (Hastimom) majmuasi hududidagi 7 gektar maydonda olib borilmoqda, — deyiladi maqolada. -Qurilish ishlarining asosiy qismi allaqachon yakunlangan».

Qayd etilishicha, O'zbekistondagi Islom tsivilizatsiyasi markazi nafaqat turkiy dunyoda, balki butun islom olamida ushbu yo'nalishda faoliyat yuritayotgan ilmiy markazlar uchun tayanch vazifasini o'taydi.

«Markazda mahalliy va xorijlik mutaxassislar ilmiy izlanishlar olib boradi, ular faoliyati natijalari asosida entsiklopediya va ilmiy nashrlar chop etiladi, teledasturlar tayyorlanadi, fil'mlar suratga olinadi, - deb yozgan Ozarbayjon bosma nashri. – Markazda faoliyat yuritadigan Halqaro islom akademiyasida 200 nafardan ortiq talaba magistratura va doktoranturada o'qishni davom ettirishi mumkin».

Nashrda ta'kidlanganidek, Markaz O'zbekistonda turizmni rivojlantirishga ham katta hissa qo'shishi kutilmoqda.

«O'zbekistondagi Islom tsivilizatsiyasi markazi qurilishi bilan mamlakatning diniy va tarixiy sayyohlik yo'nalishlariga ilmiy, ta'lim va madaniy yo'nalish qo'shiladi», - deb yozgan «Kaspiy» gazetasi.

O'zbekiston musulmonlari idorasi
Matbuot xizmati