Bugun, 26 may kuni O'zbekiston musulmonlari idorasi raisi o'rinbosari Ibrohim domla Inomov boshchiligidagi delegatsiya Rossiya musulmonlari markaziy diniy boshqarmasi taklifiga binoan Rossiya Federatsiyasining Boshqirdiston va Tatariston respublikalariga xizmat safari bilan jo'nab ketdi.

Tashrif davomida delegatsiya a'zolari Rossiya musulmonlari markaziy diniy boshqarmasi raisi Talgat Safa Tajuddinov bilan o'zaro aloqalarni mustahkamlash, radikalizm, diniy ekstremizm va terrorizmni oldini olish, aholining turli oqimlarga qarshi fikrini shakllantirish va bu boradagi hamkorlikni yanada kuchaytirish bo'yicha uchrashuv o'tkazish mo'ljallanmoqda.

Shuningdek, safar davomida Ibrohim domla Inomov, Toshkent viloyati bosh imom xatibi, ustoz Jasurbek domla Raupov hamda boshqa delegatsiya a'zolari Boshqirdistonda mehnat qilayotgan va tahsil olayotgan vatandoshlarimiz bilan uchrashib ma'rifiy suhbatlar o'tkazishi va juma namozlarida ishtirok etishi kutilmoqda.

Alloh taolo ustozlarimizning safarlarini xayrli qilsin!

O'zbekiston musulmonlari idorasi Matbuot xizmati