Shemaxa – Turk dunyosining 2023 yildagi turizm poytaxti
Ozarbayjonning Shemaxa shahrida bo'lib o'tgan Turkiy davlatlar tashkiloti Turizm bo'yicha ishchi guruhi 17-majlisi va Turizm vazirlari 7-yig'ilishida qabul qilingan tegishli qarorga asosan, Shemaxaga Turk dunyosinig 2023 yildagi sayyohlik poytaxti maqomi berildi.
Tadbirda TDT bosh kotibi Bag'dod Amreev, O'zbekiston Respublikasi Bosh vaziri o'rinbosari – turizm va madaniy meros vaziri Aziz Abduhakimov, shuningdek Turkiya, Qozog'iston, Turkmaniston, Vengriya davlatlarining sayyohlik sohasi mas'ullari, Ozarbayjondagi dimplomatik missiya vakillari ishtirok etdi.
Anjuman qatnashchilari mul'timilliy “Zamonaviy Buyuk Ipak yo'li” ko'rinishidagi qo'shma sayyohlik mahsulotlari yaratish yo'lidagi sa'y-harakatlarni faollashtirish muhimligini bir ovozdan ma'qulladilar. Ozarbayjon Turizm davlat agentligi xabariga ko'ra, yig'ilishda “Turk dunyosi turizm poytaxti tashabbuslari” qoidalari tasdiqlandi va “Turkiy davlatlar tashkilotining turizm bo'yicha “Yo'l xaritasi” qabul qilindi.
Bosh kotib Bag'dod Amreev tashkilotga a'zo davlatlar o'rtasida barcha yo'nalishlarda jadal rivojlanayotgan hamkorlik, jumladan, turizm sohasida ham yaqqol aks etayotganini ta'kidladi. U Shemaxa shahrini yuksak maqomga sazovor bo'lgani bilan qutlarkan, mazkur tashabbusning davomiyligi mamlakatlarimiz o'rtasidagi o'zaro jipslik yanada mustahkamlanishiga olib kelishini bildirdi.
Qayd etish joiz, Shemaxa – Buyuk Ipak yo'lidagi eng muhim, tarixiy va sayyohlik nuqtai nazaridan alohida ahamiyatga ega shaharlardan biri. Shuning uchun ham Turk dunyosining 2023 yildagi turizm poytaxti etib tanlandi.
G'.HONNAZAROV
Registon maydonini Imom al-Moturidiy maqbarasi bilan bog‘laydigan ko‘cha rekonstruksiya qilinmoqda
Samarqandning tarixiy qismida turizm infratuzilmasini keng ko‘lamli yangilash ishlari davom etmoqda. Amalga oshirilayotgan loyihalarning asosiy maqsadi xorijiy sayyohlarning qolish muddatini uzaytirish, qulay shahar muhitini yaratish va bir vaqtning o‘zida mahalliy aholining hayot sifatini oshirishdan iborat.
“Samarkandskiy vestnik” nashriga ko‘ra, turizmni rivojlantirish dasturi doirasida eski shaharning 13 ta ko‘chasi bosqichma-bosqich zamonaviy piyodalar yo‘lagiga aylantirilmoqda. Bu yerda yangi xizmat ko‘rsatish obyektlari barpo etilmoqda, jamoat joylari obodonlashtirilmoqda, milliy me’morchilik an’analarini saqlab qolgan holda muhandislik kommunikatsiyalari va bino fasadlari yangilanmoqda.
Eng yirik loyihalardan biri Registon maydonini Imom al-Moturidiy maqbarasi bilan bog‘laydigan Buxoro ko‘chasini rekonstruksiya qilish bo‘ldi. Ko‘chaning 850 metr qismi to‘liq piyodalar hududiga aylantiriladi. Loyihani ishlab chiquvchilardan biri, Samarqand davlat texnika universiteti o‘qituvchisi Jasur Berdiqulovning ta’kidlashicha, ilgari bu yerda qatnov qismining torligi tufayli muntazam ravishda tirbandliklar yuzaga kelgan, qulay piyodalar yo‘laklarining yo‘qligi esa piyodalar uchun jiddiy noqulayliklar tug‘dirgan. Ishlar yakunlangach, ko‘cha xavfsiz jamoat maydoniga aylanadi. Aholi uchun alohida to‘xtash joyi ajratilgan bo‘lib, transport vositalarining kirishiga faqat zarurat tug‘ilganda maxsus xizmatlarga ruxsat beriladi. Shu bilan birga, suv, gaz, elektr va boshqa muhandislik tarmoqlari to‘liq modernizatsiya qilinmoqda.
Oltin asr mahallasida joylashgan Bag‘dod ko‘chasida ham ishlar davom etmoqda. Bu yerda 600 metrlik hudud obodonlashtirilmoqda. Loyiha doirasida zamonaviy turizm va xizmat ko‘rsatish infratuzilmasini yaratish, kichik biznes va xizmat ko‘rsatish sohasini rivojlantirish ko‘zda tutilgan.
O‘zbekiston musulmonlari idorasi Matbuot xizmati
