Turkiya ulamolaridan iborat delegatsiya Samarqandda bo'ldi
O'zbekistonning Istanbuldagi Bosh konsulxonasi ko'magida Turkiya Din ishlari boshqarmasining mas'ul xodimlari, ulamolar va ushbu davlatda keng yoyilgan Naqshbandiya tariqatining faol a'zolaridan iborat delegatsiya Samarqand shahriga jo'nab ketdi, deb xabar bermoqda «Dunyo» AA.
Bosh konsulxona vakillari 140 nafar bo'lgan turkiyalik ziyoratchilarining tashriflarini tegishli vazirlik va hokimiyatlar bilan ishlab chiqdi va ularga tegishli konsullik yordamini ko'rsatdi.
Turkiyalik ziyoratchilarni kuzatish tadbirida O'zbekistonning Istanbul shahridagi Bosh konsuli Amirsaid A'zamxodjayev mamlakatimizning o'ziga xos xususiyatlari, tarixiy shaharlar va ziyoratgohlarda sayyohlarga yaratilgan qulayliklar haqida batafsil ma'lumot berdi.
O'z navbatida, turkiyalik ziyoratchilar mamlakatimiz hukumati tomonidan sayyohlik sohasini, xususan «ziyorat turizmi»ni rivojlantirishdagi sa'y-harakatlarini, turkiy millatlarning ota yurti bo'lgan O'zbekistonning boy tarixi, qadriyatlari va madaniyatini tiklashga qaratilgan chora-tadbirlarni e'tirof etdilar.
– O'zbekistonga turkiyalik taniqli olimlar va faollarni olib ketayapmiz, - dedi «Yesevitur» sayyohlik agentligi rahbari Mehmet Kaya. – Dasturimizdan qadimiy Samarqand shahrining mashhur Registon maydoni, Shohi Zinda ansambli va boshqa muqaddas ziyoratgohlarga safarlar o'rin olgan. O'zbekistonning Istanbuldagi Bosh konsulxonasiga ushbu turni tashkil etishdagi ko'magi uchun minnatdorlik bildiramiz.
O'zbekiston musulmonlari idorasi Matbuot xizmati
Registon maydonini Imom al-Moturidiy maqbarasi bilan bog‘laydigan ko‘cha rekonstruksiya qilinmoqda
Samarqandning tarixiy qismida turizm infratuzilmasini keng ko‘lamli yangilash ishlari davom etmoqda. Amalga oshirilayotgan loyihalarning asosiy maqsadi xorijiy sayyohlarning qolish muddatini uzaytirish, qulay shahar muhitini yaratish va bir vaqtning o‘zida mahalliy aholining hayot sifatini oshirishdan iborat.
“Samarkandskiy vestnik” nashriga ko‘ra, turizmni rivojlantirish dasturi doirasida eski shaharning 13 ta ko‘chasi bosqichma-bosqich zamonaviy piyodalar yo‘lagiga aylantirilmoqda. Bu yerda yangi xizmat ko‘rsatish obyektlari barpo etilmoqda, jamoat joylari obodonlashtirilmoqda, milliy me’morchilik an’analarini saqlab qolgan holda muhandislik kommunikatsiyalari va bino fasadlari yangilanmoqda.
Eng yirik loyihalardan biri Registon maydonini Imom al-Moturidiy maqbarasi bilan bog‘laydigan Buxoro ko‘chasini rekonstruksiya qilish bo‘ldi. Ko‘chaning 850 metr qismi to‘liq piyodalar hududiga aylantiriladi. Loyihani ishlab chiquvchilardan biri, Samarqand davlat texnika universiteti o‘qituvchisi Jasur Berdiqulovning ta’kidlashicha, ilgari bu yerda qatnov qismining torligi tufayli muntazam ravishda tirbandliklar yuzaga kelgan, qulay piyodalar yo‘laklarining yo‘qligi esa piyodalar uchun jiddiy noqulayliklar tug‘dirgan. Ishlar yakunlangach, ko‘cha xavfsiz jamoat maydoniga aylanadi. Aholi uchun alohida to‘xtash joyi ajratilgan bo‘lib, transport vositalarining kirishiga faqat zarurat tug‘ilganda maxsus xizmatlarga ruxsat beriladi. Shu bilan birga, suv, gaz, elektr va boshqa muhandislik tarmoqlari to‘liq modernizatsiya qilinmoqda.
Oltin asr mahallasida joylashgan Bag‘dod ko‘chasida ham ishlar davom etmoqda. Bu yerda 600 metrlik hudud obodonlashtirilmoqda. Loyiha doirasida zamonaviy turizm va xizmat ko‘rsatish infratuzilmasini yaratish, kichik biznes va xizmat ko‘rsatish sohasini rivojlantirish ko‘zda tutilgan.
O‘zbekiston musulmonlari idorasi Matbuot xizmati
