Buxoroda o'tkazilayotgan “Deklaratsiyalar muloqoti” xalqaro forumi Toshkent shahri va Samarqandda tashkil etilgan anjumanning uzviy davomi hisoblanadi, deb xabar bermoqda O'zA.

Tadbir O'zbekiston Respublikasi Prezidenti huzuridagi Strategik va mintaqalararo tadqiqotlar instituti, AQSh Global jalb qilish instituti, Din ishlari bo'yicha qo'mita, Jahon iqtisodiyoti va diplomatiya universiteti, O'zbekiston xalqaro islom akademiyasi, O'zbekiston Respublikasi Prezidenti huzuridagi Davlat boshqaruvi akademiyasi hamda Samarqand va Buxoro viloyatlari hokimliklari hamkorligida o'tkazildi.

Unda Yevropa, Osiyo, Yaqin Sharq, Afrika mamlakatlari va AQSh etakchi din ulamolari, ilohiyotshunoslar, huquqshunoslar va O'zbekiston tomonidan turli konfessiyalar vakillari, din olimlari, ulamolar, tegishli vazirlik va idoralar mutaxassislari hamda boshqa rasmiy vakillar qatnashdi.

Buxoro deklaratsiyasi “Deklaratsiyalar muloqoti” xalqaro forumining yakuniy hujjati hisoblanadi. Hujjat dunyoning 10 mamlakati etakchi dinshunoslari, islomshunoslari, din va rasmiy vakillari tomonidan tasdiqlanadi.
Buxoro deklaratsiyasida O'zbekiston hamda jahon hamjamiyatining e'tiqod erkinligini targ'ib qilish borasidagi amaliy qadamlari o'z ifodasini topgan. Hujjat barcha din vakillarini jamiyatda konfessiyalararo muloqot va totuvlikni mustahkamlashga qaratilgan tashabbuslar va dasturlarni amalga oshirishga chaqiradi.

Deklaratsiyada insonning asosiy huquqi sifatida e'tiqod erkinligiga qat'iy rioya qilish, BMT Inson huquqlari bo'yicha qo'mitasining faqat jamoat xavfsizligi, tartibi, fuqarolarning asosiy huquq va erkinliklarini ta'minlash maqsadida e'tiqod erkinligini cheklashga yo'l qo'ymaslik to'g'risidagi pozitsiyasini ma'qullash, kuchayib borayotgan murosasizlikning, din yoki e'tiqodga asoslangan zo'ravonlik harakatlarining kuchayishini qoralash, axborot makoni, jumladan, ijtimoiy tarmoqlarda diniy murosasizlik va kamsitish tashviqotini oldini olishga alohida e'tibor qaratilgan.

Bundan tashqari, hujjatda terrorizm, ekstremizm va ularning barcha shakllarida hech qanday din, tsivilizatsiya, millat, etnik guruh yoki e'tiqod tizimi bilan bog'lanishi mumkin emasligi ham bayon etiladi. Diniy binolar, ziyoratgohlarning tarixiy va madaniy ahamiyatini hisobga olgan holda ularni asrab-avaylash muhimligi ta'kidlanadi.

Qayd etish joizki, Buxoro deklaratsiyasi avval qabul qilingan deklaratsiyalarning tamoyillarini o'z ichiga qamrab olgan. Dinlarning tinchliksevar mohiyati, dinlararo muloqotning muhimligi, diniy ta'limning ekstremizm va terrorizmning oldini olish, e'tiqod erkinligini ta'minlashning muhim omili sifatidagi ahamiyati shular jumlasidandir.

O'zbekiston musulmonlari idorasi Matbuot xizmati