Bir necha kundan buyon yurtimizda o'tkazilayotgan “Deklaratsiyalar muloqoti” xalqaro forumi nihoyasiga etmoqda. Shimoliy Amerika, Yevropa, Osiyo, Yaqin Sharq va Afrika mamlakatlarining turli din vakillari, ilohiyotshunoslar, dinshunoslar va huquqshunoslardan iborat delegatsiyalari a'zolari 19 may kuni tadbirning asosiy qismida ishtirok etdilar va “Buxoro deklaratsiyasi”ni bir ovozdan qabul qilindilar. Buxoro deklaratsiyasi» ma'rifat g'oyalari va bag'rikenglik madaniyatini targ'ib qilishga qaratilganligi bilan yanada ahamiyatlidir.

Forum yakunida “Buxoro deklaratsiyasi” qabul qilinib, O'zbekiston tajribasidan kelib chiqib jahon hamjamiyati bilan dunyoda ma'rifat va diniy bag'rikenglik tamoyillarini qaror toptirish, shuningdek, turli dinlar o'rtasidagi muloqotni kuchaytirishga alohida e'tibor qaratildi.

Shuningdek, xalqaro mutaxassislar forum doirasida e'tiqod erkinligi ta'minlash, diniy qadriyatlar kabi insoniyat uchun azaliy masalalarni muhokama qilishib, xalqlar o'rtasida tinchlik, birdamlikni mustahkamlash yo'lidagi mavjud to'siqlarni aniqlash, muammolarni bartaraf etish yo'llari haqida fikr almashishdi.

E'tiborlisi, anjumanda ko'plab mamlakatlardan tashrif buyurgan dinshunos olimlar va amaliyotchi mutaxassislar yurtimizdagi o'zgarishlar borasida o'z fikr-mulohazalarini bildirib, O'zbekiston ko'pmillatli mamlakat sifatida o'z hududida diniy bag'rikenglik va millatlaro totuvlikni ta'minlay olayotgan davlat sifatida e'tirofga loyiq ekanini alohida ta'kidlashdi.

Jahonda yuz berayotgan bugungi tendentsiyalarni hisobga olib, qabul qilingan “Buxoro deklaratsiyasi”ni har tomonlama muhokama qilgan holda, dunyoning turli qit'a, mintaqalaridan kelgan nomdor ilohiyotshunoslar, dinshunos va huquqshunoslar ushbu hujjatda avval qabul qilingan barcha deklaratsiyalarning asosiy tamoyillari aks etishiga erishishni ko'zlamoqdalar.

“Buxoro deklaratsiyasi”ni ishlab chiqishda turli mamlakatlar keng doiradagi vakillari ishtirok etishi mamlakatimizning e'tiqod erkinligi va diniy bag'rikenglikni ta'minlash sohasidagi siyosati samaradorligi xalqaro hamjamiyat tomonidan e'tirof etilayotganidan dalolat.

“Buxoro deklaratsiyasi” butun jahon hamjamiyati uchun ma'rifat g'oyalari va bag'rikenglik madaniyatini ilgari surish, turli din vakillari milliy an'analarini hurmat qilish, ularning huquqlarini ta'minlash, global miqyosda bunyodkorlik muloqotini mustahkamlashga qaratilgan muhim hujjat bo'ladi.

“Buxoro deklaratsiyasi» qarama-qarshilik va kelishmovchiliklarning oldini olish, jahon miqyosida o'zaro hamjihatlikni mustahkamlashda O'zbekistonning etakchi rolini ta'minlovchi tarixiy hujjatdir.

O'zbekiston musulmonlari idorasi Matbuot xizmati