Bugun, 14 may kuni Muftiy Nuriddin domla hazratlari Islom olami robitasi Halqaro yordam, farovonlik va taraqqiyot tashkiloti Bosh kotibi doktor Abdulaziz Sarhan janoblari bilan O'zbekiston musulmonlari idorasida uchrashuv o'tkazdilar.

Muloqot chog'ida Muftiy hazratlari mamlakatimizda so'nggi yillarda mo'min-musulmonlarning talab va ehtiyojlarini qondirish borasida ishlar qilinayotganini so'zlab, respublikada masjidlar soni 2114 taga etgani, kun sayin yangi masjidlar ochilayotgani, 13 ta diniy ta'lim muassasasi ishlayotgani, hududlardagi ilmiy maktablar faoliyat yuritayotgani, 21 hududda “Qur'oni karim va tajvid” bo'yicha o'quv kurslari jadal ishlayotgani, umra ziyoratiga cheklanmagan adadda fuqarolar borib kelayotgani, Ramazon oyida imom-xatiblarimiz AQSh, Yevropa, Rossiya va MDH mamlakatlarida masjidlarda xizmat qilayotgani kabilarni so'zlab berdilar. Shuningdek, Islom dinini keng yoyish borasida qilinayotgan ilmiy-ma'rifiy ishlarga ham alohida to'xtaldilar.

Abdulaziz Sarhan janoblari O'zbekiston Islom ilmlari ravnaq topgan tabarruk zamin ekani, Imom Buxoriy bu diyorni butun olamga mashhur qilgani, barcha mo'min-musulmonlar bu ulug' zot bilan iftixor qilishini izhor etdi. Bosh kotib mamlakatdagi bunyodkorlik ishlarini ko'rib hayratda ekani, ayniqsa, barpo etilayotgan Islom tsivilizatsiyasi markazi musulmon olami uchun ham juda katta faxr bo'lishiga ishonch bildirdi.

Martabali mehmon dunyoning turli erlarida o'zbek millatiga mansub insonlar istiqomat qilishi, xususan, Saudiya Arabistonining Makka, Madina va Toif shaharlarida ham ko'pligi, ular orasida islom ulamolari ham borligini e'tirof etdi. Shuningdek, ushbu o'zbeklar o'zlarining milliyligi, urf-odatlarini saqlab qolganlari tahsinga loyiq ekaniga to'xtaldi. Ko'p jihatlarda Saudiya Arabistoni va O'zbekiston o'rtasida mushtarak o'xshashliklar mavjud ekanini so'zladi.

Abdulaziz Sarhan Islom olami robitasi musulmon olamida nufuzli tashkilot ekani, uning dunyo bo'ylab 70 dan ortiq muassasalari faoliyat yuritishi, masjidlar qurish, quduqlar qazish kabi xayriya ishlarini ham amalga oshirishi haqida ma'lumot berdi.

Kelgusida Islom olami robitasi delegatsiyasi O'zbekistonga tashrifi rejalashtirilgani, mazkur safar asnosida yurtimiz allomalari va mutafakkirlari merosi bilan yaqindan tanishish, diniy-ma'rifiy sohadagi faoliyatni o'rganish va o'zaro tajriba almashishni aytishi barobarida muftiy Nuriddin domla hazratlarini Saudiya Arabistonidagi Islom olami robitasi qarorgohida ko'rishdan juda ham mamnun bo'lishini izhor etdi Bosh kotib doktor Abdulaziz Sarhan janoblari.

Uchrashuv do'stona va samimiy ruhda o'tdi.

O'zbekiston musulmonlari idorasi Matbuot xizmati