O'zbekiston delegatsiyasining Rossiya safari muvaffaqiyatli o'tdi
Shu yil 17 apreldan 1 mayga qadar O'zbekiston musulmonlari idorasi raisi o'rinbosari Ibrohimjon domla Inomov O'zbekiston delegatsiyasi tarkibida Rossiya Federatsiyasida bo'lib qaytdi.
O'zbekiston delegatsiyasi a'zolari mazkur mamlakat rasmiylari va ish beruvchi tashkilot rahbarlari bilan uchrashib, u erda vaqtincha mehnat qilayotgan, ta'lim olayotgan yurtdoshlarimizga munosib sharoitlar yaratish bo'yicha muloqotlar o'tkazib, mavjud muammolar hal qilindi.
Muloqotlarda Rossiya va O'zbekiston vakillari tomonlaridan bu yil “Ma'naviy ipak yo'li” V xalqaro ilmiy-diniy anjumani o'tkazilishi rejalashtirayotgani aytildi.
Shuningdek, mazkur mamlakat tadbirkorlari, o'zbekzabon ishbilarmon vakillari bilan iqtisodiy hamkorlik bo'yicha muzokaralar olib borishdi.
Tashrif davomida Ibrohimjon domla Inomov mazkur mamlakatning Moskva, Sankt-Peterburg, Tula, Voronej, Murmansk, Kaliningrad shaharlari va viloyatlarida oliy o'quv dargohlarida, turli tashkilot va korxonalarda musofir hamyurtlarimizga diniy-ma'rifiy mavzularda ma'ruzalar qilib, ularni qiziqtirgan savollarga batafsil javob berdi.
Hususan, Ibrohimjon domla Inomov Rossiya Federatsiyasi musulmonlari idorasi raisi, Rossiya muftiylari kengashi raisi, muftiy Shayx Ravil' hazrat Gaynutdin bilan uchrashuv o'tkazdi.
Samimiy uchrashuv chog'ida Ibrohimjon domla Inomov muftiy Shayx Ravil' hazrat Gaynutdinga O'zbekiston musulmonlari idorasi raisi, muftiy Nuriddin domla Holiqnazarovning duoi-salomlari, ramazon tabriklarini etkazdi. O'zbekistonlik migrantlarga Rossiyada o'qish va mehnat qilish uchun munosib sharoit yaratish muhokama qilingan asosiy mavzulardan biri bo'ldi.
Do'stona muloqotlar davomida ikki davlat diniy soha vakillarining iliq munosabati, yaxshilik yo'lidagi hamkorligi yaxshi natijalar berishi qayd etildi.
Bir so'z bilan aytganda, O'zbekiston delegatsiyasining ikki haftalik safari davomida Rossiya Federatsiyasining ko'plab shahar va tumanlarida mamlakat rasmiy vakillari bilan yaxshi hamkorlik aloqalari o'rnatilib, tegishli kelishuvlarga erishildi, o'qish yo ish masalasida ushbu davlatga borgan vatandoshlarga munosib sharoitlar yaratishga kelishib olindi.
Ma'rifiy suhbatlarda musofir hamyurtlar diniy va ijtimoiy, huquqiy mavzularda ma'ruzalardan bahra olib, o'zlarini o'ylantirayotgan masala va savollarga javob olishdi.
Uchrashuvlar davomida O'zbekiston delegatsiyasi vakillariga Diniy soha rahbarlari, xususan, O'zbekiston musulmonlari idorasi raisi, muftiy Nuriddin domla hazratlari va Din ishlari bo'yicha qo'mita raisi Sodiqjon Toshboyev nomlariga tashakkurnoma va minnatdorchiliklar izhor etildi.
O'zbekiston musulmonlari idorasi Matbuot xizmati
Pol Kapur: «Bu yerda tarixni nafaqat ko‘rasiz, balki uni his qilasiz»
AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur O‘zbekistondagi Islom sivilizatsiyasi markaziga tashrif buyurdi, xabar bermoqda iccu.uz.
Islom sivilizatsiyasining ko‘p asrlik tarixi, uning ilm-fan, madaniyat va ma’rifat taraqqiyotiga qo‘shgan ulkan hissasi O‘zbekistondagi Islom sivilizatsiyasi markazi ekspozitsiyalarida yaxlit va ta’sirchan tarzda namoyon etilgan. Tashrif davomida Samir Pol Kapur islomgacha bo‘lgan davr sivilizatsiyalaridan tortib, Yangi O‘zbekiston davriga qadar bo‘lgan tarixiy jarayonlarni aks ettiruvchi galereyalar, buyuk allomalarning ilmiy-ma’rifiy merosi, noyob qo‘lyozmalar, muqaddas yodgorliklar hamda zamonaviy raqamli texnologiyalar asosida yaratilgan interaktiv ekspozitsiyalar bilan yaqindan tanishdi.
Mehmon ekspozitsiyalarning mazmunan izchilligi va tarixiy jarayonlarni bir-biri bilan uzviy bog‘liq holda namoyon etish usuliga alohida e’tibor qaratdi. Uning qayd etishicha, bu yerda muzey eksponatlari orqali o‘tmish haqida ma’lumot olish bilan cheklanib qolmay, tarixiy davrlar ruhini his qilish, ular o‘rtasidagi bog‘liqlikni anglash imkoni ham mavjud.
Samir Pol Kapur o‘z taassurotlarini quyidagicha ifodaladi:
«Bu muhtasham maskan. Islom tarixi va madaniyatining asrlar davomidagi taraqqiyoti bilan yaqindan tanishish men uchun unutilmas tajriba bo‘ldi. Bu yerda tarixni shunchaki kitob sahifalari orqali emas, balki o‘z ko‘zingiz bilan ko‘rasiz, uni his qilasiz va go‘yo o‘sha davrlarning ichida bo‘lasiz. Shu bois ushbu noyob maskanni barpo etishga hissa qo‘shgan barcha insonlarga samimiy minnatdorchilik bildiraman.
Yoshlarga ham bu yerga kelishni albatta tavsiya qilaman. Chunki bu maskan nafaqat tarixni o‘rganish, balki o‘tmish bilan kelajak o‘rtasidagi uzviy bog‘liqlikni anglash imkonini beradi. Men uchun eng esda qolarli lahzalardan biri Qur’oni karimga bag‘ishlangan golografik namoyish bo‘ldi. U menda katta taassurot va hayajon uyg‘otdi.
Menimcha, bu dargoh islom sivilizatsiyasining jahon tamadduniga qo‘shgan ulkan hissasini butun dunyoga namoyon etishga xizmat qiladi. Shuning uchun har bir inson bu yerga tashrif buyurib, ana shu boy va bebaho meros bilan shaxsan tanishishi lozim».
Pol Kapurning fikricha, Markazning ahamiyati uning tarixiy merosni namoyon etish bilangina cheklanmaydi. Ushbu maskan yosh avlod uchun o‘tmish saboqlarini anglash, ilm-fan va ma’rifatning sivilizatsiya taraqqiyotidagi o‘rnini his etish, milliy va umuminsoniy qadriyatlarga hurmat ruhini shakllantirish uchun ham muhim ma’naviy-ma’rifiy maydon vazifasini o‘taydi.
Tashrif yakunida AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur Islom sivilizatsiyasi markazidan olgan taassurotlari yuksak ekanini qayd etib, ushbu maskan boy tarixiy merosni zamonaviy muzey texnologiyalari va ta’sirchan taqdimot usullari orqali jahon jamoatchiligiga yetkazishda muhim ahamiyat kasb etishini ta’kidladi.
O‘zbekiston musulmonlari idorasi Matbuot xizmati
