Yurtimizning barcha hududlarida bo'lgani singari Toshkent viloyatida ham xayrli ishlar bir-biriga ulanib ketyapti. Deyarli har hafta biror yangi jomening ochilish marosimiga yoki ilk g'isht qo'yish tadbiri o'tkazilayotganiga guvoh bo'lyapmiz. Bu, albatta, so'nggi yillarda yurtimizda diniy-ma'rifiy sohaga qaratilayotgan alohida e'tibor va g'amxo'rlikning amaldagi in'ikosidir.

Bugun, 9 may – Hotira va qadrlash kunida Angren shahrida yangi masjidga ilk g'isht qo'yish marosimi bo'lib o'tdi. Tadbirda tuman hokimi, mutasaddi rahbarlar, viloyat bosh imom-xatibi Jasurbek domla Raupov, nuroniy otaxonlar, mahalla faollari hamda saxovatpesha homiylar ishtirok etdi.

Bu masjidga ezgu niyatda “Imom Muhammad” deb nom qo'yildi.
Masjidning barcha hujjatlari qonunchiligimizda belgilangan tartibda tayyorlanib, daylat ro'yxatidan o'tkazilmoqda.

Masjidning ahamiyatli jihati shundaki, bu jome Toshkent bilan Farg'ona vodiysi viloyatlarini bir-biriga bog'lovchi katta yo'l bo'yida joylashgan. Shu bois bu maskanda yo'lovchilar va sayyohlar uchun barcha zarur shart-sharoitlar yaratiladi.

Mamlakatimizda turizmni rivojlantirishga qaratilayotgan e'tibor tufayli bunday xayrli ishlar amalga oshirilayotganini alohida ta'kidlash maqsadga muvofiqdir.

Hayrli niyat bilan yangi masjidga qo'yilgan ilk g'ishtni Alloh taolo muborak qilib, tez va qisqa fursatda bu jome qurib bitkazilishini nasib aylasin.

O'zbekiston musulmonlari idorasi

Toshkent viloyati vakilligi Matbuot xizmati