Bugun, 6 may kuni Qozog'iston Respublikasi Turkiston viloyati markazida turkiy davlatlar din peshvolari ishtirokida “Turkiy xalqlarning islom tsivilizatsiyasi rivojiga qo'shgan hissasi” mavzusida xalqaro ilmiy-amaliy konferentsiya bo'lib o'tmoqda.

Halqaro anjuman ishtirokchilari kunni Hoja Ahmad Yassaviy maqbarasini ziyorat qilishdan boshladilar. Din peshvolari Hoja Ahmad Yassaviy maqbarasiga tashrif buyurib, u kishining haqlariga o'qilgan 100 ta xatmi Qur'onni yakunini qilib, duolar qildilar.

Tarixiy manbalardan ma'lumki, Qozog'istonning eng muhtasham tarixiy yodgorligi Hazrat Ahmad Yassaviy xonaqohi Amir Temur tomonidan bunyod etilgan. Bu yodgorlik Temur davridan beri saqlanib qolgan eng katta majmuadir. Muhtasham majmua maqbara, masjid, kutubxona, katta va kichik saroy, madrasa va 35 ta hujra, quduqxona va oshxonani o'z ichiga qamrab olgan. Uni Amir Temurning o'zi shaxsan loyihalashtirgan va o'lchovlarini chizib bergan deyiladi manbalarda. Bu esa Amir Temurning Ahmad Yassaviyga bo'lgan yuksak hurmat-ehtiromi ramzidir.
Din peshvolari ziyorat asnosida majmua bilan yaqindan tanishar ekan, uning qurilishiga va Sohibqironning Ahmad Yassaviyga bo'lgan ehtiromini yuqori baholadilar.

O'zbekiston musulmonlari idorasi matbuot xizmati