Yaxshilikni kichik sanamang!
Salim ibn Jobir Hujaymiy roziyallohu anhu Rasululloh sollallohu alayhi va sallamning huzurlariga kelib dedi:
– Ey Allohning Rasuli! Menga vasiyat qiling!
Rasululloh sallollohu alayhi va sallam unga dedilar:
– Allohga taqvo qilgin! Idishingdagi suvni boshqaning idishiga bo'shatib berish, birodaringga ochiq yuz bilan gapirish kabi bo'lsada, yaxshiliklardan biror-bir ishni kichik sanama. Izoringni osiltirib yurishdan saqlan. U kibrdandir. Uni Alloh yaxshi ko'rmaydi. Agar bir kishi seni sendagi biladigan narsasi ila ayblasa, sen uni undagi biladigan narsang bilan ayblama. Uni o'z holiga qo'y. Gunohi o'ziga, ajri senga bo'ladi. Hech kimni so'kib haqoratlama!
Yaxshilikni kichik hisoblamang. Sizni qaysi amalingiz jannatga olib kirishini bilmaysiz!
Oddiygina mushuk o'tib ketishi uchun mashinangizni to'xtatib turishingiz ham yaxshilikdir. Bir qariyani qo'lidan tutib yo'ldan o'tkazib qo'yishingiz ham yaxshilikdir. Nogiron insonning nogironlik aravachasini etaklashingiz ham yaxshilikdir. Ko'chada ishlab yurgan ishchiga bir idishchada suv berishingiz ham yaxshilikdir. Bir qariyaga og'irlik qilib turgan yukini uning qo'lidan olishingiz ham yaxshilikdir. Bir er-xotinning o'rtasini yarashtirib qo'yishingiz ham yaxshilikdir. Hotiningizning ayblarini ko'rmaslikka olishingiz ham yaxshilikdir. Farzandlaringizni kechirishingiz ham yaxshilikdir. Qo'shningizga biror narsa hadya qilishingiz ham yaxshilikdir. Bir bemorning davolanishi uchun yordam berishingiz ham yaxshilikdir!
Yaxshilikning nihoyasi yo'q. Holiqqa olib boradigan yo'lning soni xaloyiqning nafasi miqdorichadir. Oldida shuncha ko'p yo'l bo'laturib undan yurmaganlar naqadar baxtsizdir!
Axloqingiz uchun insonlarni mezon qilib olmang. Menga yaxshilik qilsa men ham unga yaxshilik qilaman, demang. Agar yomonlikka yomonlik bilan javob beraversak yomonlik qachon tugaydi?!
Dunyoda bir ajib xulq bor. Uning nomi “o'zni baland tutish”dir. Hech kimga sizni o'zining axloqi darajasiga tushirishiga ruxsat bermang. Har qanday janjalga aralashavermang. Oldingizda paydo bo'lib qolgan har-bir urushga qatnashavermang. Kundalik hayotimizdagi ko'p janjallar arzimas maqsadlar uchun bo'ladi. Unda g'alaba qozonsangizda, g'olib bo'la olmaysiz. Ammo mag'lub bo'lsangiz mag'lubiyat alamini tortasiz. O'z axloqidan voz kechgan kishi bilan tenglashish uchun biz ham axloqimizdan voz kechsak undan nima farqimiz qoladi?!
Aqlli inson o'zi uchun baho deb faqatgina jannatni biladi. Jannatga olib bormaydigan har qanday muammoni qo'ying. Ana shunda natija qanday bo'lmasin, siz g'olib bo'lasiz. Banda birodarini avf qilsa, Alloh uning izzati va qudratini ziyoda qiladi!
Kunlar aylanaveradi. Oxirida baribir haq sohiblari g'olib bo'lishadi. Botil egalari mag'lub bo'lishadi. Bu narsa zamindagi Allohning qonunidir. Yusuf alayhissalomni quduqqa tashlagan qo'llar kuni kelib u kishidan egulik so'rab cho'zilgan edi!
Rasululloh sallollohu alayhi va sallamni jinni, yolg'onchi deganlar Fath kunida rahm qilishlarini so'rab “Sen oliyjanob kishining o'g'li oliyjanob kishisan!”, deyishgan edi!
Abdulqodir Polvonov
Saudiya Arabistoni xalqaro qorilar tanlovining ikkinchi kunida 33 nafar ishtirokchi o‘zaro bellashdi
Makkada bo‘lib o‘tayotgan 46-Saudiya xalqaro qorilar musobaqasining ikkinchi kunida 28 mamlakatdan 33 nafar erkak va ayol musobaqa qatnashchilari o‘zaro bellashdi.
IQNA "Saudiya axborot agentligi"ga tayanib xabar berishicha, Makkada Saudiya Arabistoni Islom ishlari, da’vat va hidoyat vazirligi shafeligida o‘tkazilgan tanlovning final bosqichi turli mamlakatlardan kelgan erkaklar va ayollar ishtirokida davom etdi.
Tadbirning ikkinchi kunida erkaklar va ayollardan iborat hakamlar hay’ati 28 mamlakatdan 33 nafar erkak va ayol ishtirokchining Qur’on tilovatiga baho berdi.
Ikki bosqichda, ertalab va kechqurun o‘tkazilgan hakamlar hay’ati Katta masjid hovlisida 17 nafar erkak va tanlov o‘tkaziladigan joydagi ayollar bo‘limida 16 nafar ayolni o‘z ichiga oldi. Shunday qilib, birinchi va ikkinchi kunlarda erkaklar va ayollar hay’ati oldida yangragan chiqishlarning umumiy soni 40 dan ortiq mamlakatdan 66 taga yetdi.
Tadbir kelasi payshanbagacha (2026 yil 20 avgust) davom etadi, bu ishtirokchilarning Saudiya Arabistonidan jo‘nab ketish kuni bo‘ladi. Qur’on ilmlari, qiroat va qiroat qoidalari bo‘yicha erkak va ayol mutaxassislardan iborat hakamlar guruhi elektron hakamlik tizimidan foydalangan holda chiqishlar, qorilar va matnni yod olgan ijrochilarni baholaydi, bu esa baholashning aniqligini oshiradi va turli yo‘nalishlarda adolatni ta’minlaydi.
Ayni paytda 133 mamlakatdan 334 nafar erkak va ayol besh yo‘nalishda, jumladan, yetti xil qiroat asosida Qur’oni Karimni to‘liq yodlash (qiroat va nazariy bilimlarni, shuningdek, tajvid qoidalarini a’lo darajada bajarish va rioya qilishni o‘z ichiga oladi); a’lo darajada ijro etish, tajvidga rioya qilish va so‘zlarni sharhlash bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan ketma-ket o‘n beshta juzni yodlash; a’lo darajada ijro etish va tajvidga rioya qilish bilan ketma-ket beshta juzni yodlash bo‘yicha bellashmoqda.
Tadbir 6 avgust kuni boshlangan bo‘lib, uning maqsadi yosh musulmonlarni Qur’onni yodlash va tushunishga, oyati karimalar ustida mulohaza yuritishga va halol raqobatni yaratishga undashdir.
Ushbu musobaqada u boshlanganidan beri rekord darajadagi ishtirokchilar - 133 mamlakatdan 334 kishi ishtirok etdi va umumiy sovrin jamg‘armasi 10 260 000 saudiya rialini tashkil etdi, bu musobaqa boshlanganidan beri eng yuqori miqdordir.
Mazkur musobaqada O‘zbekiston sharafini "Mir Arab" o‘rta maxsus islom ta’lim muassasasi, "Sayyid Muhiddin maxdum" o‘rta maxsus islom ta’lim muassasasi, Imom Buxoriy nomidagi Toshkent islom instituti hamda "Xadichai Kubro" qizlar o‘rta maxsus islom bilim yurti talabalari himoya qilishi haqida avval xabar berilgan edi.
O‘zbekiston musulmonlari idorasi Matbuot xizmati
