— Janoza o'qilgandan keyin hamma ham mozorga bormaydi, yarmi uyda qoladi. Shunda uyda qolganlar mayyit hali mozorga etib bormasidan Fotiha surasini, umuman Qur'on suralaridan o'qishlari mumkinmi?

— Mayyitning haqiga dafndan keyin Qur'on tilovat qilish afzaldir. Hanafiy olimlari keltirishlaricha, “Fatavoi hindiyya” kitobida: “Mayyit dafn etilgach, qabr oldida bir hayvonni so'yib, go'shtini taqsimlab bo'lguncha miqdorda tilovat qilib, mayyitga duo qilish mustahabdir”, – deyilgan.

Imom Navaviyning “Al-Azkor” kitobida keltiriladi: “Mayyitni dafn qilib bo'lingach, bir hayvonni so'yib, taqsimlangunicha qabr boshida o'tirish mustahab amaldir. O'tirganlar Qur'on tilovati, mayyitga duo, va'z, xayr ahlining hikoyalari va solihlarning suhbatlariga mashg'ul bo'lishadi. Imom Shofe'iy va u zotning ashoblari Qur'ondan ba'zi qismlari o'qiladi. Bordiyu Qur'onning barchasi xatm qilinsa, yanada yaxshiroq bo'ladi”, – deyishgan.

Muhammad Ayyub domla Homidov