Muborak oy mohiyatiga monand tashrif
Munosabat
Bismillahir Rohmanir Rohim.
Prezidentimiz 8 aprel' kuni Toshkent shahri Olmazor tumanida olib borilayotgan bunyodkorlik va mahallalarni obodonlashtirish ishlari bilan tanishdi. Albatta, muborak Ramazon oyining birinchi jumasida amalga oshirilgan ushbu tashrifda katta ramziy ma'no bor. Chunki Ramazon oylar ichida eng ulug'i bo'lsa, juma kunlarning sayyididir. Shu bois bu kunlarda qilingan har qanday ezgu amal, albatta, xayrli natija beradi.
Ramazonda yaxshi amallarning ajru savobi bir necha barorbariga ko'paytirib beriladi. Ramazon haqida Salmon Forsiydan rivoyat qilingan uzun hadisda jumladan: “Kim unda ixtiyoriy ravishda bir yaxshi ish qilsa, xuddi bir farzni ado etgandek bo'ladi. Kim unda bir farzni ado etsa, xuddi etmishta farzni bajargandek bo'ladi”, deyilgan.
Davlatimiz rahbari tashrif davomida Islom tsvilizatsiya markazi qurilish jarayonini ko'zdan kechirib, bu markaz xalqimizning ma'naviy va ma'rifiy qudrati timsoli bo'lib qolishini ta'kidladi. Olmazor tumanidagi Universitet mahallasiga tashrifi chog'ida mahalla faollari, nuroniylar bilan suhbatlashib, ularni Ramazon va mahallalarining obod bo'lgani bilan tabrikladi.
Prezidentimizning tumandagi 102-sonli zaif eshituvchi bolalar uchun ixtisoslashtirilgan maktab-internatni borib ko'rgani, o'qituvchilar bilan suhbatlashgani, tarbiyalanuvchilarning mashg'ulot jarayonlarini ko'zdan kechirganini alohida ta'kidlash lozim. Zero, mehr-oqibat, o'zaro hurmat va hamjihatlik singari yuksal fazilatlarni asrlar davomida qadrlab kelayotgan xalqimiz Ramazon oyida bunday ezgu amallarga alohida urg'u beradi. Bu bejiz emas, albatta. Chunki bu oyda har bir qilingan amalning evaziga 70 tadan 700 tagacha savob berilishi hadisi sharifda bayon etilgan: “Har bir xayrli amalga o'n barobardan etti yuz barobargacha savob beriladi” (Imom Tabaroniy rivoyati).
Maktab-internatda yurtimizdagi shunday ijtimoiy muassasalardagi sharoitlarni yaxshilash bo'yicha manfaatli videoselektor yig'ilishi o'tkazildi. Ushbu yig'ilishni Prezidentimiz Qur'oni karimning “Rahmon” surasidagi “Yaxshilikning mukofoti faqat yaxshilikdir”, degan oyat bilan boshladi. Haqiqatan, shunday. Hayrli ishga qo'l urgan kishi borki, albatta, mukofotga sazovar bo'ladi.
Dinimizda o'zgalarga yaxshilik qilish, o'zi yashab turgan jamiyatdagi insonlarning hojatini chiqarish, ulardan turli xil mushkulotlarni aritish fazilatli ish sanaladi. Jumladan, Payg'ambarimiz sollallohu alayhi vasallam: “Farzlarni ado qilishdan keyingi o'rinda turadigan Allohga eng suyukli bo'lgan amal bu musulmoning qalbiga xursandchilikni kiritishdir”, dedilar.Darhaqiqat, kishilarga beriladigan savoblarning darajasi amalga qarab belgilanadi. Eng savobi ko'p amal bu farz hisoblansa, boshqalarga yaxshilik ulashish undan keyingi o'rinda turadigan ulug' ibodatdir!
Boshqa bir hadisi sharifda bunday deyiladi: “Bir birodarim bilan biror hojati yuzasidan birga piyoda yurishim men uchun mana bu masjidda ‒ ya'ni Madina masjidida ‒ bir oy e'tikof o'tirishimidan suyuklidir”. Ushbu hadis har bir insonni boshqalarga yaxshilik qilishga undashi, shubhasiz. Zero, buyuk bobokalonimiz Hazrat Alisher Navoiy aytadilar:
Kimki bir ko'ngli buzuqning xotirin shod aylagay,
Oncha borkim, Ka'ba vayron o'lsa, obod aylagay.
Ko'nglimizni yanada nurafshon etgani – inson qadrini ulug'lash, mehr va yordamga muhtoj aholini qo'llab-quvvatlash – davlatimiz ijtimoiy siyosatining muhim yo'nalishi. Bu borada olib borilayotgan xayrli ishlar ifodasini davlatimiz rahbarining Olmazor tumaniga tashrifi jarayonida yana bir bor ko'rdik, chuqur his qildik.
Alloh taolo Ramazon oyini aziz diyorimiz va xalqimiz uchun ham xayrli va manfaatli qilsin.
Homidjon IShMATBYeKOV,
O'zbekiston musulmonlari idorasi
raisi birinchi o'rinbosari.
“Solombo Times”: O‘zbekistonda “Uchinchi Renessans” g‘oyasini amalga oshirish davlat siyosatiga aylangan
Shri-Lankaning “Solombo Times” nashrida “O‘zbekistonda Yangi uyg‘onish davri: kelajak texnologiyalari yordamida buyuk o‘tmishni qayta tiklash” sarlavhali tahliliy maqola e’lon qilindi, deb xabar bermoqda “Dunyo” AA.
Shri-Lankalik taniqli jurnalist Fazan Navaz tomonidan yozilgan ushbu materialda so‘nggi o‘n yilda O‘zbekistonda Prezident Shavkat Mirziyoyev tashabbusi bilan Yangi O‘zbekistonni bunyod etish, “Uchinchi Renessans” g‘oyasini amalga oshirishga qaratilgan islohotlar va ularning samarali natijalari xususida so‘z yuritilgan.
Muallifning yozishicha, Markaziy Osiyo markazida sokin, ammo ulkan ahamiyatga ega inqilob yuz bermoqda. Bu kurash qurol-yarog‘ bilan emas, balki qo‘lyozmalar, muzeylar va mikrochiplar yordamida amalga oshirilmoqda.
Prezident Shavkat Mirziyoyev rahbarligida O‘zbekiston Samarqand va Buxoro kabi shaharlar jahon ilm-fani, she’riyati va falsafasining yetakchi markazlari bo‘lgan O‘rta asrlardagi “Oltin asr” shon-shuhratini qayta tiklashga intilmoqda.
Bu jarayonning o‘ziga xos jihati shundaki, O‘zbekiston ming yildan ziyod tarixga ega madaniy merosni asrash, qayta tiklash va keng ommaga yetkazish uchun sun’iy intellekt hamda raqamli texnologiyalardan faol foydalanmoqda.
Nashrda O‘zbekistonning boy madaniy va tarixiy merosi hamda uni saqlash bo‘yicha islohotlarga to‘xtalib o‘tilgan. Qayd etilganidek, bu zamin insoniyat tarixidagi eng buyuk allomalarga beshik bo‘lgan. Astronom va davlat arbobi Mirzo Ulug‘bek Samarqandda yulduzlarni hayratlanarli darajada aniq kuzatish imkonini bergan rasadxona barpo etgan. Xorazmdagi Ma’mun akademiyasi olimlari esa Yevropada Renessans boshlanishidan ancha avval matematika va tibbiyot sohalarida yuksak yutuqlarga erishgan edi.
O‘zbekiston yetakchisi bu tarixiy merosni tez-tez tilga olib, Mirzo Ulug‘bekni nafaqat buyuk olim, balki ilm-fanni eng yuksak qadriyat deb bilgan davlat arbobi sifatida ta’riflaydi. Davlat rahbari bugungi yangilanish jarayonini “Uchinchi Renessans” deb atab, uni O‘zbekistonning ilmu ma’rifat va madaniyat markazi sifatidagi mavqeini qayta tiklashga qaratilgan umummilliy loyiha sifatida baholaydi. Tarixchilar ta’biri bilan aytganda – bu atama mintaqada avval mavjud bo‘lgan ikki buyuk yuksalish davridan keyingi navbatdagi uyg‘onish bosqichini anglatadi.
Muallifning fikricha, O‘zbekistonda Uchinchi Renessans g‘oyasini amalga oshirish shunchaki gap emas, balki davlat siyosatiga aylangan.
“Bu ulkan maqsadning eng yorqin ramzi joriy yil Toshkentda qad rostlagan Islom sivilizatsiyasi markazidir. 2026 yil mart oyida 40 mamlakatdan tashrif buyurgan 1500 dan ortiq mutaxassis ishtirokida qurib bitkazilgan mazkur markaz o‘z bag‘rida islom olamining eng noyob yodgorliklaridan biri – VII asrga mansub Usmon Mus'hafini saqlaydi. Shuningdek, bu yerda ilmiy laboratoriyalar, restavratsiya ustaxonalari va arxivlar faoliyat yuritadi. Markaz allaqachon dunyodagi eng chiroyli yangi muzeylardan biri sifatida e’tirof etilgan”, – deya qayd etgan jurnalist.
Materialda ta’kidlanishicha, O‘zbekiston yondashuvining boshqalardan ajratib turadigan muhim jihati – bu sun’iy intellektdan iqtisodiy taraqqiyot vositasi sifatidagina emas, balki madaniy merosni muhofaza qilish vositasi sifatida ham foydalayotganidadir.
Sun’iy intellekt turizm sohasini ham tubdan o‘zgartirmoqda. Bu tashabbus 2026 yilda mamlakatga 12 million sayyohni jalb qilish rejasining bir qismi hisoblanadi.
Fazan Navaz o‘z maqolasini “Uchinchi Renessans” o‘z oldiga qo‘ygan maqsadlarga to‘liq erishadimi-yo‘qmi, buni vaqt ko‘rsatadi. Biroq bugunning o‘zidayoq O‘zbekiston qanday yo‘ldan odimlab borayotgani aniq ko‘rinib turibdi”, – degan so‘zlar bilan yakunlagan.
O‘zbekiston musulmonlari idorasi Matbuot xizmati