Birlashgan Arab Amirliklari rasmiylari ikki yillik tanaffusdan so'ng Muqaddas Ramazon oyida an'anaviy chodirlarning qaytishini e'lon qildi. Mazkur chodirlar an'anaviy suhbatlar va iftorlik uchun mo'ljallangan.
Islam.ru xabariga ko'ra, pandemiyadan oldin masjidlar yonida chodirlar o'rnatilar, faqirlar u erda ovqatlanishlari mumkin edi. 2020 yil pandemiya davrida xayriya tashkilotlari ommaviy yig'ilishlardan qochish maqsadida iftorlik taomlarini to'g'ridan-to'g'ri muhtojlarning uylariga etkazib berishdi.
Mahalliy hokimiyat qaroriga ko'ra, bu chodirlarga kirish uchun Al Hosn ilovasining "yashil" o'tish guvohnomasi talab qilinadi. Chodirni o'rnatish uchun Qizil yarim oy tashkilotidan ruxsat olinishi kerak.
Shuningdek, bu chodirlarda niqob rejimi va ijtimoiy masofaga rioya qilish qoidalari saqlanib qolinadi va u iftordan bir soat oldin ochiladi.
Bu erda bir martalik idish va oshxona jihozlaridan foydalanish tavsiya etilgan. Bunda tashkilotchilar dezinfektsiyalovchi vositalarni taqdim etishlari kerak. Qaror epidemiologik vaziyatning yaxshilanishi fonida qabul qilindi, deb xabar beradi The National nashri.

O'zbekiston musulmonlari idorasi matbuot xizmati