Umraga borishga tayyormisiz?
Umra so'zi qanday ma'noni anglatadi? “Umra” so'zining lug'aviy ma'nosi “ziyorat”, shar'iy ma'nosi Baytullohning maxsus ziyoratidir.
Umra qanday ibodat? Umra dinimizda Baytullohni tavof qilib, Safo va Marva oralig'ida etti marta sa'y qilishdir. Hanafiy mazhabida umr davomida bir marta umra qilish – sunnati muakkadadir. Umra ulug' savoblarga erishtiradigan ibodatdir.
Umrada qanday amallar bajariladi? Umra amallari quyidagilar:
- Ehromga kirish.
- Ka'bai muazzamani tavof qilish.
- Safo va Marva tepaliklari orasida sa'y qilish.
- Sochni oldirish yoki qisqartirish.
Hajning shartlari umra uchun ham shartdir.
Umra ibodatini bajarish uchun qanday niyat qilinadi? Umraning niyati:
“Allohumma inniy uriydul umrata fayassirha liy va toqabbalha minniy. Navaytul umrata va ahramtu biha lillahi taola”.
Ma'nosi: Allohim, men umra qilmoqni iroda qilmoqdaman. Uni menga oson et va qabul ayla. Umrani niyat qildim va Alloh taolo uchun umraga ehrom bog'ladim.
Umraning sunnat amallari qaysilar? Umraning sunnatlari:
– Ehrom bog'lash oldidan g'usl qilish;
– Ehromga kirish oldidan xushbo'yliklar surtish;
– Talbiya aytish;
– Tavof ul-qudum qilish;
– Tavofni uzluksiz etti marta ado etish
– Safo va Marva orasida etti marta sa'y qilish;
– Sa'yda tahoratli bo'lish.
Ziyoratchi sochini qachon va qanday qisqartiradi, ayollar-chi? Ziyoratchi sa'yni ado etib bo'lgach, sochini tagi bilan oldiradi yoki qisqartiradi, afzali tagi bilan oldirishdir. Ayollar sochlarini barmoqning bir bo'g'imi miqdorida qisqartiradilar. Ular uchun afzali sochlarining hammasini bir joyga to'plab turib, uchidan bir barmoq bo'g'imicha qisqartirishdir. Sochni oldirish yoki qisqartirish bizning Hanafiy mazhabimizda vojib amallardandir, uni tark qilgan kishi qurbonlik so'yishi lozim bo'ladi. Mana shu bilan umra ibodati tamom bo'ladi va shundan so'ng ehrom man etgan hamma narsa mumkin bo'ladi.
O'MI Matbuot xizmati
Din ilmining barakaci
Padari buzrukvorim shunday dedilar: "Birodar! Darhaqiqat, ilm ato qilish va foyda yetkazish na ustozning, na voizning va na nasihat qiluvchining ishi. U narsa boshqa bir Zotning ato etganidir. Ilmni Alloh beradi. Biror vosita orqali beradi, kimnidir sabab ham qiladi. Agar biror odam ilm tolibi bo‘lib haqiqiy talab ila kelsa, u holda Alloh taolo ustozning qalbida uning uchun foydali bo‘ladigan narsani solib qo‘yadi. Yo‘qsa, biror kimsada o‘zgaga biror foyda yetkazish qudrati yo‘qdir. Toki, Alloh taoloning tavfiqi bo‘lmasa va U Zot iroda qilmasa, biror shaxs o‘zgaga foyda yetkaza olmaydi. Alloh xohlasa, bir jumla ila foyda yetkazishi mumkin. Agar xohlamasa, uzun va mazmundor va’zlar hammasi bekor ketadi".
Ulug‘larimizning bir gapi bor: "Tolibning (ilm) talabi barakotidan (ilm) aytuvchining qalbi va tiliga Alloh taolo eshituvchilar uchun foydali narsani joriy qilib qo‘yadi".
Din ilmining barakalari
Shayxul islom, Alloma Shamsul Haq Afg‘oniy rahmatullohi alayh aytadilar: «Devbandagi "Dorul ulum" madrasasida hadis ilmining bir talabasi vafot etdi. Janoza o‘qilib, dafn qilindi. Keyin vorislariga xat yuborildi. Masofa uzoqligi uchun xat olti oy deganda yetib bordi. Marhumning qarindoshlari kelishdi... Rektor Qori Muhammad Toyyib hazratlari bilan uchrashishdi va: "Biz mayyitni qabrdan qazib olib, yurtimizga olib ketishni xohlaymiz", deyishdi. Qori Muhammad Toyyib hazratlari ularga uzoq tushuntirdilar. Lekin ular juda qaysar edi, gapga kiray deyishmasdi. Shunda Qori Muhammad Toyyib hazratlari ularni mening huzurimga yubordilar. Men ham ularga uzoq tushuntirdim. Ular esa: "Biz mayyitni yo olib ketamiz, yoki butun qarindoshlarimiz bilan bu yerga ko‘chib kelib olamiz", deyishdi...
Xullas, qabr qazildi, ne xolki, olti oydan keyin mayyit kafanida bus-butun yotgan edi. Undan ajib xushbo‘y taralardi. Mayyitning jasadi qutiga solindi va hurmat yuzasidan bir talaba ular bilan birga yuborildi. Uning yurtiga temir yo‘l orqali borilar edi. Temir yo‘l vokzalida bojxona va nazoratchi xodimlar to‘xtatib: "Bu qutida mayyit emas, noqonuniy yo‘l ila olib ketilayotgan mushki anbar bor", deb, tobutni ochishga majburlashdi. Ochib qarasalar, ne ko‘z bilan ko‘rsinlarki, unda o‘lik jasad, ammo hadis ilmini o‘rganayotgan talabaning jasadi bor edi, undan judayam xush hid taralayotgan edi.
"Nasihatlar guldastasi" kitobidan
- «
- »