Orziqib kutilgan onlar keldi. Bugun, 22 yanvar' kuni erta tongda “Umra – 2022” mavsumining ilk ziyoratchilari Toshkent xalqaro aeroportidan Saudiya Arabistoniga jo'nab ketdilar.

Mana shunday ulug' baxtga erishgan yurtdoshlarimizni kuzatish uchun taniqli ulamolar, imom-domlalar, mutasaddilar va OAV vakillari Toshkent xalqaro aeroportida jam bo'lishdi.

Muborak safarga otlangan hamyurtlarimizning ko'zlarida quvonch, tillarida shukronalik so'zlari sira arimaganiga guvoh bo'ldik. Kuzatish jarayonida Alloh taoloning bayti sari yo'l olayotgan ziyoratchilar eson-omon muborak qadamjolarni ziyorat qilib kelishlari, ushbu ziyoratni yurtimiz va butun dunyo musulmonlarga bardavom qilishini so'rab xayrli duolar qilindi.

Ziyoratchilardan ota-onalarimiz va yaqinlarimiz bilan birga Ka'batulloh atrofida tavof qilish baxtini nasib etishini so'rab, duolar qilishlarini iltimos qilindi.

Alloh taolo umraga otlanganlarning safarlarini muborak qilsin, Baytulloh yonida duo qilishni barchamizga nasib etsin!

O'zbekiston musulmonlari idorasi Matbuot xizmati