13 yanvar' kuni Imom Buxoriy xalqaro tadqiqot markazi Buyuk Britaniyaning «Al-Furqon» fondi bilan hamkorlokda islom qo'lyozmalari kodikologiyasiga bag'ishlangan onlayn-seminar tashkil etdi, deb xabar bermoqda “Dunyo” AA.

O'zbekistonning Londondagi elchixonasi ko'magida uyushtirilgan tadbirda O'zbekiston Din ishlari bo'yicha qo'mitasi, Islom tsivilizatsiyasi markazi, Madaniy qadriyatlarni o'rganish markazi, Halqaro islom akademiyasi, Imom Termiziy va Imom Moturidiy xalqaro tadqiqotlar markazlari vakillari va boshqalar ishtirok etdilar.

Anjumanda «Al-Furqon» fondi ijrochi direktori Sali Shahsivariy «O'zbekistonning boy ilmiy merosi «Jahon islom qo'lyozmalari sharhida» mavzusidagi taqdimot o'tkazdi. Unda O'zbekistonning yozma ilmiy merosi, islomiy qo'lyozmalar saqlanadigan shaharlar va kutubxonalar, ularning soni, yo'nalishi, o'rganilganlik darajasi, kataloglashtirish va raqamlashtirish haqidagi ma'lumotlar o'z ifodasini topdi. Sali Shahsivariy O'zbekistonning boy ilmiy merosi mamlakat hududining ma'rifatli islom markazlaridan biri bo'lganidan dalolat berishini alohida ta'kidladi.

Tadbir yakunlari bo'yicha «Al-Furqon» fondi va O'zbekiston ilmiy-tadqiqot muassasalari o'rtasida qo'lyozmalar kataloglarini o'zaro almashish, yangi kataloglar tuzish va ularni tarjima qilish, O'zbekistondagi to'plamlar haqidagi ma'lumotlarni fond tomonidan yaratilgan islom qo'lyozmalarining jahon ma'lumotlar bazasiga kiritish, birgalikda tadqiqot va tadbirlar o'tkazish, shuningdek, kodikologiya sohasida treninglar tashkil etish bo'yicha kelishuvlarga erishildi.

Ma'lumot o'rnida qayd etish joizki, «Al-Furqon» fondi 1988 yilda Londonda tashkil topgan bo'lib, butun dunyoda islom merosiga oid qo'lyozmalarni o'rganish, kataloglashtirish va saqlanishini ta'minlash ushbu jamg'arma faoliyatining asosiy maqsadi hisoblanadi. «Al-Furqon» mutaxassislari dunyoning turli mintaqalarida ilmiy-tadqiqot ishlarini olib boradi. Fond tomonidan 60 dan ortiq nashr chop etilgan. Ular, asosan, kataloglardan, shu jumladan, «Islom qo'lyozmalarining jahon sharhi» ko'p jildli kitobidan iborat.

O'zbekiston musulmonlari idorasi matbuot xizmati