Umra to'lovi tafsiloti
Allohga shukr, ikki yil sabr ila kutilgandan so'ng umra ziyorati boshlanmoqda. O'tgan kuni joriy umra mavsumi narxlari, navbatlari, uchish vaqtlari va vaktsinalar haqida xabar berildi.
Shu kunlarda ayrim ijtimoiy tarmoq yurituvchilari pandemiyadan avval, ya'ni 2020 yil fevral' oyiga qadar qilingan umra to'lovi miqdoriga qo'shilgan qiymat borasida turli mulohazalar bildirmoqda.
Shu bois, qo'shimcha to'lov tafsilotini quyidagi jihatlar orqali bayon qilamiz:
Birinchi, koronavirus pandemiyasi umra xizmatlari ko'rsatishga ham salbiy ta'sir ko'rsatdi. Avval qayd etganimizdek, mehmonxonada 4 kishilik xonaga 2 nafar ziyoratchi, 50 o'rindiqli avtobusga 25 kishi joylashtirish kabi talablar o'rnatildi.
Har bir fuqaroning safarga chiqqandan to ona-Vatanga qaytib kelgunga qadar epidemiologik me'yorlarga javob beradigan tashkiliy va tibbiy xizmatlar yo'lga qo'yildi. Masalan, oziq-ovqat mahsulotlari maxsus qadoqlangan holda tarqatiladi, tibbiy xizmat ko'rsatishda qo'shimcha shifokorlar va maxsus dori-darmonlar bilan ta'minlanadi.
Shuningdek, ishlab chiqarish va xizmat ko'rsatishda ikki yil avvalgi holatga nisbatan narx-navo ko'tarildi. Buning ustiga qirollikda 15 foiz qo'shimcha qiymat solig'i ham joriy etildi.
Ikkinchi, tabarruk zaminda ziyoratchi har bir daqiqasini g'animat bilib, faqat toatu ibodatga sarflashi uchun Makka va Madina shaharlarida Ikki Haramga yaqin bo'lgan mehmonxonalar buyurtma qilindi. Masjidi Nabaviyga yaqin bo'lgan 5 yulduzli “Pulman zam-zam” va Baytulloh atrofidagi “Jabal Umar” hududida joylashgan 5 yulduzli mehmonxona olindi. Qiyos uchun, oldingi yillarda ziyoratchilarimiz Makka shahrida Haram masjididan chamasi 1,2 km. bo'lgan mehmonxonada istiqomat qilishgan.
Bular ziyoratchilarga besh mahal namozni Harami shariflarda ado etish, duoyu iltijolar bilan band bo'lishda engillik beradi. Yo'l, taomlanish va boshqalar uchun ketadigan vaqtni tejaydi. Shuningdek, mehmonxonalarda tibbiyot va ishchi guruhlari xizmat ko'rsatadi.
O'zbekiston Saudiyada umra safarini tashkil qilish bo'yicha bir necha shirkat imkoniyatlarini o'rganganini avval ham xabar qilgan edik. Bunda Saudiya haj va umra vazirligi talabiga asosan umrani tashkil etish bo'yicha litsenziyaga ega bo'lgan shirkatlar bo'lishiga e'tibor qaratildi. Shu kunlarda, ijtimoiy tarmoqlarda muqobil taklif bilan chiqayotgan ba'zi shirkatlar umra xizmatini ko'rsatish uchun yangilangan ruxsatnomaga ega emasligini bildirish bilan kifoyalanamiz.
Oldingi uzoq yillik hamkor shirkat ham pandemiyadan keyin litsenziya ololmagani uchun boshqa, imkoniyati kengroq “Abu Sarhad” shirkati bilan shartnoma imzolanganini alohida ta'kidlash o'rinlidir.
Qo'shimcha to'lovlar yuzasidan yana bir jihat. Har bir Haj yoki umra mavsumi to'lovlari uchun alohida hisob raqam ochiladi va sarf-xarajatlar amalga oshiriladi. Mablag'lar bankdagi maxsus hisob raqamda saqlanadi. Mablag'lardan muborak safarga tegishli yo'nalishlardan boshqa maqsadda foydalanishga imkoniyat mavjud emas. 2020 yil fevral' oyiga qadar umra uchun to'lov amalga oshirgan, pandemiya sabab borish istagidan qaytgan fuqarolarning murojaatiga asosan to'lovlari qaytarib berildi. Qolgan fuqarolarning mablag'lari o'z ixtiyorlariga ko'ra, umra hisob raqamida saqlanmoqda.
Mo'min-musulmonlarni umra ibodatiga boshchilik qilishda ko'p yillik tajribaga ega, diniy mutaxassislar bilan ta'minlaydigan va bu borada vakolatli, rasmiy tashkilot hisoblangan O'zbekiston musulmonlari idorasi orqali muborak safarni xavfsiz ado etishga chaqiramiz.
O'zbekiston musulmonlari idorasi muntazam ravishda xalqimizning talab-istaklarini inobatga olgan holda umra safari narxlarini maqbullashtirishni davom ettiradi, bu borada yangiliklar bo'lsa, rasmiy matbuotda e'lon qiladi.
So'zimiz yakunida, ijtimoiy tarmoq foydalanuvchilari hamda axborot tarqatuvchilardan to'liq o'rganilmagan axborot tarqatish shar'iy jihatdan to'g'ri emasligi va qonuniy javobgarlikka sabab bo'lishini hisobga olib, biror xabar e'lon qilishdan oldin ikkinchi tomonning ham fikrini olishlari uchun doimiy hamkorlikka tayyorligimizni bildiramiz.
Alloh taolo umraga otlanganlarning safarlarini muborak qilsin, Ikki Harami sharif ziyoratini barchamizga nasib etsin!
O'zbekiston musulmonlari idorasi
Matbuot xizmati
Ilmiy-amaliy anjuman doirasida bir guruh ustoz va xodimlar munosib taqdirlandi
O‘zbekiston musulmonlari idorasi tomonidan tashkil etilgan «Zamonaviy diniy ta’lim: pedagogika, ilm-ma’rifat va innovatsiya» mavzusidagi I ilmiy-amaliy anjumani doirasida sohada alohida o‘rnak ko‘rsatgan ustozlarni taqdirlash marosimi bo‘lib o‘tdi.
Anjumanda Davlatimiz Rahbari tashabbuslari bilan har jabhada amalga oshirilayotgan islohotlar qatorida ilm-fanni taraqqiy ettirish, ajdodlar merosini o‘rganish, diniy ta’limni rivojlantirish va sohaga ko‘rsatilayotgan yuksak e’tibordan mamnunlik kayfiyati hukm surdi.
Diniy idora tasarrufidagi oliy va o‘rta maxsus diniy ta’lim muassasalarida samarali faoliyat yuritib, yoshlarga ta’lim-tarbiya berish, soha rivojiga munosib hissa qo‘shish hamda dinimizning sofligini asrash yo‘lida fidokorona mehnat qilayotgan bir guruh pedagog va mudarrislar mehnati munosib e’tirof etildi.
Tadbir davomida sohadagi fidokorona va samarali mehnatlari uchun quyidagi ustoz va pedagoglar Faxriy yorliq hamda Umra yo‘llanmalari bilan mukofotlandi:
- Rahmatulla Umarov — Sayyid Muhyiddin maxdum o‘rta maxsus islom ta’lim muassasasi o‘qituvchisi.
- Maxtumquli Toshqulov — Xoja Buxoriy o‘rta maxsus islom ta’lim muassasasi o‘qituvchisi.
- Azimxon Abdullayev — Hidoya o‘rta maxsus islom ta’lim muassasasi o‘qituvchisi.
- Abdulbosit Rahimov — Mir Arab o‘rta maxsus islom ta’lim muassasasi o‘qituvchisi.
Shuningdek, anjuman doirasida diniy ta’lim tizimida namunali rahbarlik qilgan, fidokorona pedagogik va ilmiy-faoliyat olib borgan,ta’lim muassasalarining moddiy-texnik bazasini mustahkamlash, to‘garaklarni samarali tashkil etishdagi alohida xizmatlari uchun yana 15 nafar rahbar va o‘qituvchilar O‘zbekiston musulmonlari idorasining Faxriy yorliqlari hamda esdalik sovg‘alari — televizor, noutbuk va planshetlar bilan taqdirlandi.
O‘zbekiston musulmonlari idorasi jamoasi taqdirlangan barcha ustoz va xodimlarni ushbu yuksak e’tirof bilan samimiy muborakbod etib, ularning kelgusi ilmiy va pedagogik faoliyatlarida ulkan zafarlar tilaydi.
O‘zbekiston musulmonlari idorasi Matbuot xizmati
- «
- »