Umra to'lovi tafsiloti
Allohga shukr, ikki yil sabr ila kutilgandan so'ng umra ziyorati boshlanmoqda. O'tgan kuni joriy umra mavsumi narxlari, navbatlari, uchish vaqtlari va vaktsinalar haqida xabar berildi.
Shu kunlarda ayrim ijtimoiy tarmoq yurituvchilari pandemiyadan avval, ya'ni 2020 yil fevral' oyiga qadar qilingan umra to'lovi miqdoriga qo'shilgan qiymat borasida turli mulohazalar bildirmoqda.
Shu bois, qo'shimcha to'lov tafsilotini quyidagi jihatlar orqali bayon qilamiz:
Birinchi, koronavirus pandemiyasi umra xizmatlari ko'rsatishga ham salbiy ta'sir ko'rsatdi. Avval qayd etganimizdek, mehmonxonada 4 kishilik xonaga 2 nafar ziyoratchi, 50 o'rindiqli avtobusga 25 kishi joylashtirish kabi talablar o'rnatildi.
Har bir fuqaroning safarga chiqqandan to ona-Vatanga qaytib kelgunga qadar epidemiologik me'yorlarga javob beradigan tashkiliy va tibbiy xizmatlar yo'lga qo'yildi. Masalan, oziq-ovqat mahsulotlari maxsus qadoqlangan holda tarqatiladi, tibbiy xizmat ko'rsatishda qo'shimcha shifokorlar va maxsus dori-darmonlar bilan ta'minlanadi.
Shuningdek, ishlab chiqarish va xizmat ko'rsatishda ikki yil avvalgi holatga nisbatan narx-navo ko'tarildi. Buning ustiga qirollikda 15 foiz qo'shimcha qiymat solig'i ham joriy etildi.
Ikkinchi, tabarruk zaminda ziyoratchi har bir daqiqasini g'animat bilib, faqat toatu ibodatga sarflashi uchun Makka va Madina shaharlarida Ikki Haramga yaqin bo'lgan mehmonxonalar buyurtma qilindi. Masjidi Nabaviyga yaqin bo'lgan 5 yulduzli “Pulman zam-zam” va Baytulloh atrofidagi “Jabal Umar” hududida joylashgan 5 yulduzli mehmonxona olindi. Qiyos uchun, oldingi yillarda ziyoratchilarimiz Makka shahrida Haram masjididan chamasi 1,2 km. bo'lgan mehmonxonada istiqomat qilishgan.
Bular ziyoratchilarga besh mahal namozni Harami shariflarda ado etish, duoyu iltijolar bilan band bo'lishda engillik beradi. Yo'l, taomlanish va boshqalar uchun ketadigan vaqtni tejaydi. Shuningdek, mehmonxonalarda tibbiyot va ishchi guruhlari xizmat ko'rsatadi.
O'zbekiston Saudiyada umra safarini tashkil qilish bo'yicha bir necha shirkat imkoniyatlarini o'rganganini avval ham xabar qilgan edik. Bunda Saudiya haj va umra vazirligi talabiga asosan umrani tashkil etish bo'yicha litsenziyaga ega bo'lgan shirkatlar bo'lishiga e'tibor qaratildi. Shu kunlarda, ijtimoiy tarmoqlarda muqobil taklif bilan chiqayotgan ba'zi shirkatlar umra xizmatini ko'rsatish uchun yangilangan ruxsatnomaga ega emasligini bildirish bilan kifoyalanamiz.
Oldingi uzoq yillik hamkor shirkat ham pandemiyadan keyin litsenziya ololmagani uchun boshqa, imkoniyati kengroq “Abu Sarhad” shirkati bilan shartnoma imzolanganini alohida ta'kidlash o'rinlidir.
Qo'shimcha to'lovlar yuzasidan yana bir jihat. Har bir Haj yoki umra mavsumi to'lovlari uchun alohida hisob raqam ochiladi va sarf-xarajatlar amalga oshiriladi. Mablag'lar bankdagi maxsus hisob raqamda saqlanadi. Mablag'lardan muborak safarga tegishli yo'nalishlardan boshqa maqsadda foydalanishga imkoniyat mavjud emas. 2020 yil fevral' oyiga qadar umra uchun to'lov amalga oshirgan, pandemiya sabab borish istagidan qaytgan fuqarolarning murojaatiga asosan to'lovlari qaytarib berildi. Qolgan fuqarolarning mablag'lari o'z ixtiyorlariga ko'ra, umra hisob raqamida saqlanmoqda.
Mo'min-musulmonlarni umra ibodatiga boshchilik qilishda ko'p yillik tajribaga ega, diniy mutaxassislar bilan ta'minlaydigan va bu borada vakolatli, rasmiy tashkilot hisoblangan O'zbekiston musulmonlari idorasi orqali muborak safarni xavfsiz ado etishga chaqiramiz.
O'zbekiston musulmonlari idorasi muntazam ravishda xalqimizning talab-istaklarini inobatga olgan holda umra safari narxlarini maqbullashtirishni davom ettiradi, bu borada yangiliklar bo'lsa, rasmiy matbuotda e'lon qiladi.
So'zimiz yakunida, ijtimoiy tarmoq foydalanuvchilari hamda axborot tarqatuvchilardan to'liq o'rganilmagan axborot tarqatish shar'iy jihatdan to'g'ri emasligi va qonuniy javobgarlikka sabab bo'lishini hisobga olib, biror xabar e'lon qilishdan oldin ikkinchi tomonning ham fikrini olishlari uchun doimiy hamkorlikka tayyorligimizni bildiramiz.
Alloh taolo umraga otlanganlarning safarlarini muborak qilsin, Ikki Harami sharif ziyoratini barchamizga nasib etsin!
O'zbekiston musulmonlari idorasi
Matbuot xizmati
Diniy ta’lim sohasida ilk bor Respublika anjumani bo‘lib o‘tadi
Joriy yilning 19-20 avgust kunlari O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» nomli I ilmiy-amaliy anjumani Islom sivilizatsiyasi markazida bo‘lib o‘tadi.
Davlatimiz Rahbari tomonidan har jabhada olib borilayotgan yangilanish va islohotlarga hamohang tarzda Diniy idora tarixida ilk bor o‘tkazilayotgan ushbu tadbirda jami 700 nafar pedagog va soha mutaxassisi, jumladan, 300 nafar ishtirokchi bevosita anjuman zalida, 400 nafar ishtirokchi esa hududlardan videoselektor orqali qatnashadi.
Anjumandan ko‘zlangan maqsad sohadagi istiqbolli rejalarni muhokama qilish, diniy ta’limda pedagogik va kasbiy mahoratni oshirish, ta’lim jarayoniga zamonaviy texnologiyalarni yanada keng tatbiq etish hamda diniy ta’limni yangi bosqichga olib chiqishdir.
Dastur doirasida soha rahbarlari ishtirokida tahliliy ma’ruzalar, taniqli professorlar tomonidan mahorat darslari, ilmiy-metodik mashg‘ulotlar bo‘lib o‘tadi. Shuningdek, ishtirokchilar O‘zbekiston musulmonlari idorasi, Islom sivilizatsiyasi markazi bilan yaqindan tanishib, Hazrati Imom majmuasidagi tarixiy qadamjo va obidalarni ziyorat qilishadi.
O‘zbekiston musulmonlari idorasi Matbuot xizmati
