Mozori-Sharif shahrida joylashgan “Turkiston” xususiy universitetida Afg'onistonda o'zbek tili rasmiy til maqomini olganining 18 yilligiga bag'ishlangan tadbir bo'lib o'tdi, deb xabar bermoqda “Dunyo” AA. Unda Balx davlat universtiteti va “Turkiston” universitetining o'qituvchi va talabalari, mahalliy o'zbek diasporasi ziyolilari ishtirok etdi.

Anjumanda so'zga chiqqan “Turkiston” universiteti rektori Abdul Hodiy Qodiriy 2004 yilda bo'lib o'tgan Loyi-Jirg'ada mamlakatda pushtu va dariy tillari qatorida o'zbek tiliga ham rasmiy maqom berilganini ta'kidladi. Mamlakat muvaqqat hukumati bugungi kunda yangi Konstitutsiya loyihasini ishlab chiqish jarayonida o'zbek tilining Afg'onistonda tutgan mavqeini e'tiborga olishga ishonch bildirayotgani qayd etildi.

“Turkiston” universtitetining ilmiy ishlar bo'yicha prorektori Abdul Qayum Turobiy O'zbekiston tomonidan Afg'onistonga ko'rsatilayotgan iqtisodiy va gumanitar ko'mak, O'zbekiston buyuk muhaddis allomalar Imom Buxoriy va Imom Termiziyning yurti ekani, o'zbek xalqining jahon ilm-fani va taraqqiyotiga qo'shgan munosib hissasi to'g'risida so'z yuritdi. U o'z ma'ruzasida bugungi Afg'oniston yoshlari qo'shni davlatlar, jumladan, O'zbekiston yoshlari bilan madaniy-ma'rifiy aloqalarni rivojlantirishi muhim ahamiyat kasb etishini urg'uladi. Shu bilan birga prorektor O'zbekiston oliy o'quv yurtlarida tahsil olayotgan afg'on yoshlari o'z vataniga qaytishgach, xalq xo'jaligining turli sohalarida samarali faoliyat olib borishiga ishonch bildirdi.

Balx davlat universiteti tibbiyot fakul'teti katta o'qituvchisi va Afg'oniston turkiy xalqlar ziyolilari uyushmasi a'zosi Abdulsattor Samadiy Afg'onistonda yashayotgan barcha millat va elatlar vakillarini o'zaro birdamlikka chaqirar ekan, o'zbek xalqining jahon tamadduni va islom madaniyati rivojiga qo'shgan beqiyos hissasi hamda uning milliy an'analari haqida atroflicha fikr yuritdi.

Anjuman chog'ida Afg'oniston oliy o'quv yurtlarining vakillari o'zbek tili va adabiyoti asoschisi Alisher Navoiyning boy ijodiy va ma'naviy merosi, buyuk mutafakkir qalamiga mansub asarlar, shuningdek, Afg'onistonda o'zbek tili va adabiyotining rivojiga katta hissa qo'shgan olim va mutaxassislar ijodi haqidagi fikrlarini bayon qildi.

O'zbekiston musulmonlari idorasi matbuot xizmati