Peshovar universiteti huzuridagi Alisher Navoiy markazida «H.E. Shavkat Mirziyoyev: A visionary statesman» (“Shavkat Mirziyoev: uzoqni ko'ra biladigan davlat arbobi”) nomli tahliliy maqolalar kitob-to'plami taqdimoti o'tkazildi, deb xabar bermoqda “Dunyo” AA.

Mamlakatimizning Islomoboddagi elchixonasi ma'lumotiga ko'ra, kitob-to'plam diplomatiya missiyasi tomonidan Islomobod global va strategik tadqiqotlar markazi (GSTM) bilan hamkorlikda nashr etilgan bo'lib, unda Yangi O'zbekiston erishgan yutuqlar, Prezidentimiz Shavkat Mirziyoev rahnamoligida amalga oshirilayotgan demokratik o'zgarishlar, ichki va tashqi siyosat, xususan, mintaqaviy va global tashabbuslar, jumladan, Toshkentda bo'lib o'tgan Markaziy va Janubiy Osiyoning mintaqaviy o'zaro bog'liqligiga bag'ishlangan xalqaro konferentsiyada ilgari surilgan 10 ta tashabbusga bag'ishlangan 14 ta tahliliy material jamlangan.

GSTM ijrochi direktori Holid Taymur Akrom to'plam nusxalarini Peshovar universitetining Mintaqaviy (Rossiya, Hitoy va Markaziy Osiyo) tadqiqotlar markazi direktori, professor Shabir Ahmad Honga topshirdi.

Professor Shobir Ahmad Hon Prezident Shavkat Mirziyoev rahnamoligida O'zbekiston mintaqadagi qudratli mamlakatga aylanganini ta'kidladi. Ekspert O'zbekiston rahbari tomonidan Markaziy va Janubiy Osiyoning o'zaro bog'liqligini mustahkamlash bo'yicha ilgari surilgan tashabbuslarni alohida qayd etdi.

Shuningdek, u bunday akademik tashabbuslar ikki mintaqa madaniyati va ijtimoiy-iqtisodiy dinamikasini o'zaro anglash uchun zarurligini ta'kidladi.

Kitoblar Peshovar universiteti kutubxonasi va Alisher Navoiy markaziga topshirildi.

O'zbekiston musulmonlari idorasi matbuot xizmati