— Yangi tug'ilgan chaqaloqlar va yangi oila qurganlar chilla saqlaydi: shomda ko'chaga chiqmaydi, qorong'ugacha uyga qaytadi. Chilla saqlash nima degani? Tushuntirib bersangiz.

— Dinimizda “chilla” degan narsa yo'q. Ammo chaqaloq va bolalarni shom namozi kira boshlagan vaqtdan to qop-qorong'u to'la tushgunicha ko'chaga chiqarmasdan turish haqida hadisda ko'rsatma kelgan. Islom dinida ota-ona farzandini har tomonlama avaylab, ehtiyot qilishga mas'ul ekani uqtiriladi. Buning uchun dinimiz ta'limotida farzandni, hatto ko'z tegishi yoki jinlardan saqlash uchun ham muayyan ko'rsatmalar keltirilgan. Jumladan, Jobir roziyallohu anhudan rivoyat qilingan hadisda Rasululloh sollallohu alayhi vasallam: “Kechqurun, farzandlaringizni uyda ushlab turing. Bu vaqtda shaytonlar (jinlar) izg'ib yuradi. Biror soat o'tgach, bolalaringizni erkin qo'ying. Allohning nomini zikr etib eshiklaringizni berkiting. Zero, shayton berkitilgan eshikni ochmaydi”, deganlar (Muttafaqun alayh).

Muhammad Ayyub HOMIDOV