Alloh sizdan rozi bo'lsin!
Bugun diniy idoramizga Namanganlik bir nuroniy otaxondan minnatdorlik maktubi keldi. Maktubni o'qib chiqib, uni sizlarga ilingimiz keldi. Quyida maktubni o'qish oson bo'lishini o'ylab oqqa ko'chirgan holda, to'laligicha sizlarga havola qilamiz. Maktub bunday boshlanadi:
“Joriy yil 16 dekabr' kuni O'zbekiston musulmonlari idorasi raisi, muftiy Nuriddin domla hazratlarining Namangan shahrida qurilgan “Yusufxon o'g'li Qosimxon” jome masjidiga peshin namoziga tashrif buyurib, namozxonlarga mav'iza qilib berishini eshitib, juda xursand bo'ldim. Lekin masjidga borib mav'iza tinglashga keksalik aslo yo'l bermas edi.
Honadonimda mahzun holda o'tirgan edim, buni sezgan nabiram, bobojon hafa bo'lmang, muftiy hazratning mav'izalarini ijtimoiy tarmoqlar orqali to'g'ridan-to'g'ri olib berilar ekan, birgalikda tinglaymiz, deganda qanchalik sevinganimni tasavvur ham qila olmaysiz.
Va nihoyat peshin vaqti bo'ldi. Viloyatimiz bosh imom-xatibi hurmatli Abdulhay domla Muftiy hazratni juda berilib tanishtirib, so'zni u kishiga berdilar. Muftiy hazratning “Alloh rozi bo'ladigan uch amal” mavzusidagi mav'izalarini nabiramning telefoni orqali to'g'ridan-to'g'ri tinglash baxtiga muyassar bo'ldim.
Shanba kuni barcha farzand va nabiralarim bilan dasturxon atrofida o'tirar ekanman, beixtiyor Muftiy hazratning so'zlaridan keltirib, ularga nasihatlar qildim, xursandchilik ustiga yana bir xursandchilik, bir nabiram eshikdan shoshilib kirib keldida bobojon Muftiy hazratning Namangandagi mav'izalarini bugun televideniye orqali namoyish qilinar ekan, dedi.
Shunda qalbim sururlarga to'ldi. Inson keksayganda shunday bo'lib qolar ekan. Endi bir o'zim emas, balki barchamiz Muftiy hazratlarining masjid minbaridan turib baralla aytgan so'zlari, nasihatlarini tinglar ekanmiz, deb Yaratganga shukronalar keltirdim.
Oila a'zolarim bilan birga miriqib Hazratning mav'izalarini televideniye orqali tomosha qilib, tinglashga muyassar bo'ldik. Albatta, bunga amal qilishga ham erishamiz, insha Alloh. Muftiy hazratdan Alloh rozi bo'lsin!
Janobingizga uzoq umr tilab, keksa nuroniy muxlisingiz Hasanxon hoji MUMINOV”
Namangan viloyati vakilligi matbuot xizmati
Bog‘otda "Erali eshon bobo" masjidi yangi binosi ochildi (fotolavha)
O‘zbekiston Respublikasi davlat mustaqilligining 35 yilligi arafasida Xorazm viloyati Bog‘ot tumanidagi "Erali eshon bobo" jome masjidi zamonaviy asosda qayta qurilib, mo‘min-musulmonlar ixtiyoriga topshirildi.
Masjidning ochilish tantanasida Xorazm viloyati bosh imom-xatibi Xayrulla domla Abdullayev, Bog‘ot tumani hokimi Jahongir Nazarov, viloyat va tuman bosh imom-xatiblari, soha mutaxassislari hamda keng jamoatchilik vakillari ishtirok etdi.
Marosim Qur’oni karim tilovati bilan boshlanib, yangi masjidning el-yurtimiz ma’naviyatini yanada yuksaltirish, aholi o‘rtasida ezgulik va ma’rifatni mustahkamlashga xizmat qilishini so‘rab duolar qilindi. Shuningdek, ushbu bunyodkorlik ishlariga hissa qo‘shgan saxovatpesha insonlar haqqiga ezgu tilaklar bildirildi.
Ma’lumot o‘rnida, barcha zamonaviy talablarga javob beradigan va zarur sharoitlar yaratilgan mazkur jome masjid bir vaqtning o‘zida 1000 nafar namozxonni qabul qilish sig‘imiga ega.
Alloh taolo ushbu muborak masjidni qiyomatga qadar Qur’on tilovati, ibodat va ma’rifat ziyosi taraladigan qutlug‘ dargohlardan qilsin!
O‘zbekiston musulmonlari idorasi
Matbuot xizmati
