Alloh sizdan rozi bo'lsin!
Bugun diniy idoramizga Namanganlik bir nuroniy otaxondan minnatdorlik maktubi keldi. Maktubni o'qib chiqib, uni sizlarga ilingimiz keldi. Quyida maktubni o'qish oson bo'lishini o'ylab oqqa ko'chirgan holda, to'laligicha sizlarga havola qilamiz. Maktub bunday boshlanadi:
“Joriy yil 16 dekabr' kuni O'zbekiston musulmonlari idorasi raisi, muftiy Nuriddin domla hazratlarining Namangan shahrida qurilgan “Yusufxon o'g'li Qosimxon” jome masjidiga peshin namoziga tashrif buyurib, namozxonlarga mav'iza qilib berishini eshitib, juda xursand bo'ldim. Lekin masjidga borib mav'iza tinglashga keksalik aslo yo'l bermas edi.
Honadonimda mahzun holda o'tirgan edim, buni sezgan nabiram, bobojon hafa bo'lmang, muftiy hazratning mav'izalarini ijtimoiy tarmoqlar orqali to'g'ridan-to'g'ri olib berilar ekan, birgalikda tinglaymiz, deganda qanchalik sevinganimni tasavvur ham qila olmaysiz.
Va nihoyat peshin vaqti bo'ldi. Viloyatimiz bosh imom-xatibi hurmatli Abdulhay domla Muftiy hazratni juda berilib tanishtirib, so'zni u kishiga berdilar. Muftiy hazratning “Alloh rozi bo'ladigan uch amal” mavzusidagi mav'izalarini nabiramning telefoni orqali to'g'ridan-to'g'ri tinglash baxtiga muyassar bo'ldim.
Shanba kuni barcha farzand va nabiralarim bilan dasturxon atrofida o'tirar ekanman, beixtiyor Muftiy hazratning so'zlaridan keltirib, ularga nasihatlar qildim, xursandchilik ustiga yana bir xursandchilik, bir nabiram eshikdan shoshilib kirib keldida bobojon Muftiy hazratning Namangandagi mav'izalarini bugun televideniye orqali namoyish qilinar ekan, dedi.
Shunda qalbim sururlarga to'ldi. Inson keksayganda shunday bo'lib qolar ekan. Endi bir o'zim emas, balki barchamiz Muftiy hazratlarining masjid minbaridan turib baralla aytgan so'zlari, nasihatlarini tinglar ekanmiz, deb Yaratganga shukronalar keltirdim.
Oila a'zolarim bilan birga miriqib Hazratning mav'izalarini televideniye orqali tomosha qilib, tinglashga muyassar bo'ldik. Albatta, bunga amal qilishga ham erishamiz, insha Alloh. Muftiy hazratdan Alloh rozi bo'lsin!
Janobingizga uzoq umr tilab, keksa nuroniy muxlisingiz Hasanxon hoji MUMINOV”
Namangan viloyati vakilligi matbuot xizmati
Soha rahbarlari mahallalardagi targ‘ibot va obodonlashtirish ishlari bilan tanishdi
Mamlakatimizda mustaqillik bayramining 35 yilligi munosabati bilan “Mahallada obodlik va mehr-saxovat oyligi” hamda “Dolzarb 40 kunlik” tadbirlari doirasida hududlarda keng ko‘lamli targ‘ibot-tashviqot, obodonlashtirish, xayriya va mehr-oqibat ishlari amalga oshirilmoqda.
Mazkur jarayon bilan yaqindan tanishish maqsadida 4 avgust kuni O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev hamda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari boshchiligidagi mutasaddilar Toshkent shahri Sergeli tumanidagi “No‘g‘ayqo‘rg‘on”, “Qumariq” va “Ittifoq” mahallalarida bo‘lishdi.
Tashrif davomida soha rahbarlari mahallalardagi ijtimoiy-ma’naviy muhitni yanada sog‘lomlashtirish, xayriya va saxovat ishlarini kengaytirish, obodonlashtirish hamda bunyodkorlik ishlarining borishi bilan tanishdi. Shuningdek, mahalliy hokimiyat vakillari, “mahalla yettiligi”, nuroniylar hamda diniy soha xodimlari ishtirokida ushbu yo‘nalishlarda amalga oshirilayotgan ishlar muhokama qilindi.
Mahallalarda o‘tkazilgan sayyor yig‘inlarda “Jaholatga qarshi ma’rifat bilan kurashish”, oilalarda totuvlikni mustahkamlash, yoshlarni ilm-ma’rifatga yo‘naltirish, ehtiyojmand oilalarni qo‘llab-quvvatlash, farzand tarbiyasi hamda aholi muammolarini hal etishda hamjihatlikni kuchaytirish masalalariga alohida e’tibor qaratildi.
Shu bilan birga, xonadonlar atrofi, ko‘chalar, ariqlar va qabristonlarni obod qilish, ularning ozodaligini ta’minlash bo‘yicha olib borilayotgan ishlar yuzasidan ham tegishli tavsiya va ko‘rsatmalar berildi.
Darhaqiqat, Prezidentimiz ta’kidlaganlaridek, amalga oshirilayotgan islohotlar samarasi, eng avvalo, mahallalar hayotida yaqqol namoyon bo‘lishi va aholi kayfiyatida o‘z aksini topishi lozim. Shu ma’noda, joriy yil yakunida mamlakatimiz bo‘ylab “Eng orasta xonadon”, “Eng fayzli hovli”, “Eng obod ko‘cha” va “Eng namunali mahalla” nominatsiyalari bo‘yicha g‘oliblarning aniqlanishi mazkur ezgu tashabbuslarning mantiqiy davomi bo‘ladi.
O‘zbekiston musulmonlari idorasi Matbuot xizmati
