Hushxabar

Masjid – Allohning bayti. Bu maskanni har qancha obod qilsak – yarashadi. Bugun yurtimizda yangidan bunyod etilayotgan, qayta qurilayotgan masjidlarni ko'rib, bu xayrli ishlarga hissa qo'shayotgan saxovatpesha homiylarning haqqiga xayrli duolar qilamiz.

Navoiy viloyati Hatirchi tumani Tasmachi qishlog'idagi “Abu Hanifa” masjidining yangi binosiga ilk g'isht qo'yish marosimi bo'lib o'tdi. Unda tuman bosh imom-xatibi Mustafo domla Yunusov, Navbahor tumani bosh imom-xatibi Fazliddin domla Toshev, “Abu Hanifa” masjidi imomi Qabriddin domla Sagdinov, hoji otalar, mahalla faollari, homiylar ishtirok etdi.

Masjidning eski binosi 1990 yili qurilgan bo'lib, unda, ayvoni bilan qo'shib hisoblaganda, 180 kishi ibodat qilar edi. Allohning inoyati, istiqlol sharofati hamda yurtimizda diniy-ma'rifiy sohadagi islohotlar natijasida namozxonlar safi kengayib, masjid torlik qildi. Shu bois jomening qayta qurishga kirishildi.

Yangi masjid ishga tushgach, bu ma'rifat maskanida bir vaqtning o'zida 1000 kishi bemalol ibodat qila oladi, Shunga mos ravishda yangi tahoratxona ham ishlab turibdi.

Alloh taolo Qur'oni karimda: «Allohning masjidlarini faqat Allohga va oxirat kuniga imon keltirgan, namozni barkamol o'qigan, zakot bergan va faqat Allohdangina qo'rqqan kishilar obod qilurlar» (Tavba surasi, 18-oyat).

Ibn Kasir rahimahulloh aytadi: «Alloh taolo mazkur oyatda masjidlarni obod qiluvchilarning mo'min ekanligiga guvohlik bermoqda. Hadisi sharifda: “Agar masjidga doimiy qatnashni odat qilgan kishini ko'rsangiz, uning mo'minligiga guvohlik bering”, deyilgan» (Imom Termiziy rivoyati).

Darhaqiqat, “Abu Hanifa” masjidini ham mo'minlar-musulmonlar obod qilishyapti. Bu ishning boshida turgan imom domla, noiblarga, mutavalliga, Sirojiddin hoji aka va boshqa barcha azizlarga Alloh taolo O'zi va'da qilgan ulug' mukofotlarni ato etsin.

Tez va qisqa fursatda masjidning mo'min-musulmonlar ixtiyoriga topshirilishi Alloh taolo nasib etsin. Buyuk Rabbimiz homiylarning ishlariga baraka bersin.

Marosim so'ngida Alloh uchun qurbonlik qilinib, osh tarqatildi.

T.NIZOM