“Yashil makon” umummilliy loyihasi doirasida Ho'ja Ismoil shaharchasida yangi bog' barpo etildi
Shu kunlarda davlatimiz rahbari tashabbusi ostida mamlakatimiz bo'ylab davom etayotgan va keyin ham muntazamlik kasb etadigan “Yashil makon” umummilliy loyihasi mohiyati jihatidan kelajak avlod taqdiriga dahldorligi bilan ahamiyatli. 10 dekabrga qadar daraxt ekish bo'yicha e'lon qilingan dolzarb 40 kunlik doirasida Samarqand viloyati Payariq tumani Ho'ja Ismoil shaharchasida O'zbekiston musulmonlari idorasi viloyat vakilligi rahbarligida viloyat diniy soha vakillari tomonidan “Imom Buxoriy avlodlari bog'i” barpo etildi.
Mazkur bog' barpo etilishi munosabati bilan o'tkazilgan tadbir avvalida qo'y so'yilib, o'tgan alloma ajdodlarimiz xotirasiga bag'ishlab Qur'on tilovat qilindi. Viloyat hokimligi mutasaddilari, diniy tashkilot va idoralar xodimlari, viloyat jamoatchiligi vakillari, Imom Buxoriy xalqaro ilmiy tadqiqot markazi jamoasi, Hadis ilmi oliy maktabi pedagog xodim va talabalari ishtirok etgan marosimda viloyat hokimining diniy va jamoat tashkilotlar bilan aloqalar bo'yicha o'rinbosari D.Mamadqulov va viloyat bosh imom-xatibi o'rinbosari Hayrullo domla Sattarov so'zga chiqib, kelajakka bebaho sarmoya tariqasida yo'naltirilayotgan ezgu tashabbus – “Yashil makon” umummilliy loyihasining global murakkab ekologik vaziyatni yumshatish va atrof-muhit musaffoligini ta'minlash hamda inson salomatligini mustahkamlashdagi yuksak ahamiyatini qayd etdi. Tadbirda shuningdek, viloyatning diniy sohada faoliyat yuritayotgan uch avlod vakillari tomonidan mazkur loyiha doirasida yaratilayotgan bog' hayot farovonligiga, mo'minlar manfaat olishlariga, qolaversa, tabiatning yanada ko'rkam bo'lishiga munosib xizmat qilishi alohida ta'kidlandi.
Tadbirdan so'ng, bog' uchun ajratilgan hududda ko'chat o'tqazishga kirishildi. Jarayon davomida 600 nafarga yaqin ishtirokchi 1 gektar bo'lgan hududga 1500 dan ziyod mevali va manzarali daraxt ko'chati o'tqazishdi.
Ko'chat ekish jarayonida tuproq unumdorligiga alohida e'tibor qaratilib, er avvalo sug'orishga tayyor holatga keltirildi. Bog'da o'tqazilgan ko'chatlarni parvarish qilish bo'yicha alohida chora-tadbirlar belgilandi va mas'ullar biriktirildi. Mas'ullarga daraxtlarni parvarishlash bilan birga hududo bodligini ta'minlash vazifasi ham yuklatildi.
Mamlakatimiz bo'ylab “Yashil makon” umummilliy loyihasi doirasidagi amaliy tadbirlar davom etmoqda.
O'MI Samarqand viloyat vakilligi matbuot xizmati
O‘zbekiston musulmonlari idorasida navbatdagi “Fuqarolar qabuli” bo‘lib o‘tdi
Har haftaning chorshanba kuni O‘zbekiston musulmonlari idorasida an’anaviy tarzda tashkil etiladigan fuqarolar qabuli bu safar ham aholi vakillarining murojaatlarini o‘rganish, muammolarga yechim topishga qaratildi.
Joriy haftadagi qabulda O‘zbekiston musulmonlari idorasi raisi o‘rinbosari Muhammadolim domla Muhammadsiddiqov poytaxtimizdan hamda yurtimizning turli shahar va tumanlaridan tashrif buyurgan fuqarolarning shaxsiy va jamoaviy masalalari, taklif va mulohazalarini tingladi.
- - Aholi vakillari tomonidan turli masalalar bo‘yicha shar’iy hukmlar, ularning amaliy tatbiqlari yuzasidan savollar berildi;
- - Nikoh, oilaviy munosabatlar, farzand tarbiyasi kabi mavzulardagi murojaatlar ko‘rib chiqildi;
- - Ayrim ehtiyojmand fuqarolar tomonidan tushgan moddiy ko‘mak so‘rovlari tegishli tartibda ko‘rib chiqilishi belgilandi;
- - Sohani yanada rivojlantirish, masjidlarni obod qilish, yoshlar o‘rtasida ilmiy-ma’rifiy targ‘ibotlarni kuchaytirish kabi bir qator konstruktiv takliflar bildirildi.
Qabul yakunida mas’ullarga aniq topshiriqlar berilib, fuqarolar murojaatlarini tezkor va adolatli hal etish bo‘yicha choralar belgilandi. Shu bilan birga, fuqarolar bilan bevosita muloqot qilish, ularning fikrlarini eshitish va islohotlarga jamoatchilikni faol jalb etish borasidagi ishlar doimiy e’tiborda ekani ta’kidlandi.
O‘zbekiston musulmonlari idorasi
Matbuot xizmati
