Prezident maslahatchisi Jiddadagi nufuzli sammitda qatnashdi
Shu yil 24 -25 noyabr' kunlari Saudiya Arabistonining Jidda shahrida "Rossiya - Islom olami" strategik qarashlar guruhi (SQG) ning ikkinchi yillik yig'ilishi bo'lib o'tdi. Bu haqda O'zbekistondagi Islom tsivilizatsiyasi matbuot xizmati xabar berdi.
“Muloqot va hamkorlik ufqlari” shiori ostida bo'lib o'tgan sammitda Prezident maslahatchisi, O'zbekistondagi Islom tsivilizatsiyasi markazi rahbari Shoazim Minovarov ma'ruza bilan ishtirok etdi.
Sh.Minovarov sammit tashkilotchilariga minnatdorchilik bildirgan holda, so'nggi yillarda O'zbekistonda davlat rahbari boshchiligida diniy-ma'rifiy sohada olib borilayotgan keng ko'lamli islohotlar, xususan, buyuk ajdodlarmiz merosini tadqiq qilish maqsadida ilmiy-tadqiqot markazlari va o'quv yurtlarining tashkil etilganligi, ma'rifiy islom mohiyatini yanada chuqurroq anglashga qaratilgan ijobiy sa'y-harakatlar haqida so'z yuritdi.
Shuningdek, markaz rahbari O'zbekiston ushbu yo'nalishda barcha xalqaro turdosh tashkilotlar bilan hamkorlik qilishga doimo tayyor ekanligini bildirdi.
– Birlashgan Arab Amirliklarining Dubay shahrida Ekspo 2020-2022 umumjahon ko'rgazmasida jonajon O'zbekistonimiz ham o'z pavil'oni bilan ishtirok etdi, – deydi Prezident maslahatchisi, O'zbekistondagi Islom tsivilizatsiyasi markazi rahbari Shoazim Minovarov. – O'zimizning yigit-qizlardan iborat xorij tillartda bemalol muloqot qilayotgan gid-boshlovchilar, bugunimiz va shavkatli ajdodlarimiz faoliyati birgalikda namoyish etilgani, Islom tsivilizatsiyasi markazining ham ko'rgazmaga qo'yilgani, ayniqsa, pavil'onimizdan odam arimaganini ko'rib, faxrlandim va tashkilotchilarga tasanno aytdim. Pavil'onimizda xattotlik san'ati namoyish qildi. Shuningdek, milliy taomlarni ham tortiq qilindi. Biz jahonni, jahon bizni kashf etmoqda.
Ma'lumot o'rnida: "Rossiya - Islom olami" strategik qarashlar guruhi 2006 yilda tashkil etilgan bo'lib, hozirgi kunda unga 28 ta musulmon davlatlaridan 60 ga yaqin jamoat va hukumat faollari a'zo hisoblanadi. Hozirda mazkur guruhga Tatariston prezidenti Rustam Minnixonov boshchilik qilmoqda.
O'zbekiston musulmonlari idorasi matbuot xizmati
24–29 avgust kunlari Toshkentda “Islom sivilizatsiyasi: yangi nigoh, yangi kashfiyotlar” mavzusida xalqaro mediaforum bo‘lib o‘tadi
24–29 avgust kunlari O‘zbekiston poytaxtida “Islom sivilizatsiyasi: yangi nigoh, yangi kashfiyotlar” mavzusida xalqaro mediaforum o‘tkaziladi, deb xabar bermoqda “Dunyo” AA.
Tadbirning asosiy qismi O‘zbekistondagi Islom sivilizatsiyasi markazida o‘tkaziladi. Unda xorijiy ommaviy axborot vositalari vakillari, xalqaro ekspertlar va media sohasi mutaxassislari jam bo‘ladi.
Forum dasturidan tantanali ochilish marosimi, yalpi majlislar, mavzuga oid media-ko‘rgazmalar, matbuot anjumanlari va ikki tomonlama uchrashuvlar o‘rin olgan. Sho‘ba yig‘ilishlari doirasida hujjatli kino va tarixiy xotira, nashriyot loyihalari, zamonaviy texnologiyalar, shuningdek, media sohasidagi xalqaro loyihalarni rivojlantirish masalalari muhokama qilinadi.
Bundan tashqari, O‘zbekiston talabalari uchun jahon media sanoatining yetakchi mutaxassislari ishtirokida mahorat darslari tashkil etiladi. Ishtirokchilar zamonaviy jurnalistika, media mahsulotlar yaratish va xalqaro axborot makonida samarali faoliyat yuritish borasida tajriba almashadi.
27 avgust kuni forum qatnashchilari uchun Samarqand shahriga sayohat uyushtiriladi. Dastur doirasida mehmonlar Imom Buxoriy majmuasini ziyorat qiladi va shaharning tarixiy-madaniy merosi bilan tanishadi. Shuningdek, Toshkent shahrida xorijiy OAV vakillari uchun maxsus media-tur o‘tkazilishi rejalashtirilgan.
Forum 28 avgust kuni yakuniy yalpi majlis va tantanali yopilish marosimi bilan o‘z ishini yakunlaydi. Xorijlik mehmonlar, O‘zbekiston davlat mustaqilligining 35 yilligiga bag‘ishlangan tadbirlarda ham ishtirok etadi.
O‘zbekiston musulmonlari idorasi Matbuot xizmati
