Ne'matlar kaliti
Ayni kunlarda nafaqat yurtimizning taniqli ulamolari Toshkent shahridagi masjidlarga tashrif buyurishib, o'zlarining go'zal mav'izalari bilan namozxonlarni yaxshilikka chaqirmoqda, shu bilan birga, mo'min-musulmonlar ham olimlarimizni hayratga solishyapti.
Ana shunday uchrashuv poytaxtimizdagi "Siroj solih" jomesida bo'lib o'tdi. O'zbekiston musulmonlari idorasi Raisi o'rinbosari Ibrohim domla Inomov xazratlari masjidga tashrif buyurib, jamoat bilan peshin namozini ado etdi, keyin qavmga shukronalik tug'risida suhbat qilib berdi.
Darvoqe, bandalarini hamisha va har qachon shukr qilishga buyurgan Alloh taolo, birinchi navbatda, O'zini shukrni qabul qiluvchi deb atadi: «Agar shukr qilsangiz va imon keltirsangiz, Alloh sizlarni azoblab nima ham qiladi?! Alloh shukrni qabul etuvchi va biluvchi Zotdir» (Niso surasi, 147-oyat).
Aslida, biz qancha shukr qilsak ham kam. Chunki Rabbimiz bergan ne'matlarning shukrini to'liq ado eta olmaymiz.
Bishr Hofiy rahmatullohi alayh aytadi: «A'zolaridan faqat tili bilan shukr qilgan kishining shukri noqis bo'ladi. Chunki ko'zning shukri biror yaxshilik ko'rganda unga qarash, yomonlikni ko'rganda, ko'zni yumishdir. Quloqning shukri yaxshilikni eshitganda yod olish, yomonlikni esa unutishdir. Qo'llarning shukri noshoyitsa narsalarni ushlamaslikdir. Me'da (qorin)ning shukri halol narsalar bilan oziqlanish, aql va qalbning shukri esa ilm va hilm bilan ziynatlanishdir. Oyoqlarning shukri esa yaxshilikdan boshqa yo'lda yurmaslikdir. Kim mana shularni bajarsa, haqiqiy shukr qiluvchilardan bo'ladi».
Ulamolarning masjidlarga tashrifi davom etmoqda.
O'zbekiston musulmonlari idorasi matbuot xizmati
O‘zbekistonda vaqf tizimini rivojlantirish istiqbollari muhokama qilindi
Shu yilning 3 avgust kuni O‘zbekiston Respublikasi Din ishlari bo‘yicha qo‘mitasi, BMT Taraqqiyot dasturi va Islom taraqqiyot banki hamkorligida “O‘zbekistonda vaqf tizimini rivojlantirish: imkoniyatlar va qiyinchiliklar” mavzusida davra suhbati tashkil etildi. Unda mutaxassislar tomonidan ishlab chiqilgan O‘zbekistonda vaqf tizimini joriy etish konsepsiyasining natijalari va tavsiyalari taqdim etilib, atroflicha muhokama qilindi.
Davra suhbatida qator davlat, nodavlat va diniy-ma’rifiy tashkilotlar vakillari, jumladan, O‘zbekiston musulmonlari idorasi, “VAQF” xayriya jamoat fondi, Ijtimoiy himoya milliy agentligi, Istiqbolli loyihalar milliy agentligi, Iqtisodiyot va moliya, Adliya hamda Madaniyat vazirliklari, Markaziy bank, Soliq qo‘mitasi va Savdo-sanoat palatasi mas’ullari, shuningdek, O‘zbekiston xalqaro islom akademiyasi va Toshkent islom instituti ustozlari hamda islom moliyasi yo‘nalishida faoliyat yuritayotgan konsalting kompaniyalari vakillari ishtirok etdi.
Islom ijtimoiy moliyasining muhim vositasi bo‘lgan vaqf tarixan ijtimoiy farovonlik va jamiyat rivojini ta’minlashning muhim institutsional mexanizmi bo‘lib xizmat qilgan. Zamonaviy sharoitda u barqaror rivojlanishga ulkan hissa qo‘shuvchi tizim sifatida e’tirof etilmoqda. Jahon banki, Xalqaro islom moliya ta’limi markazi (INCEIF) va Xalqaro islom moliyasi shariat tadqiqot akademiyasi (ISRA)ning hamkorlikdagi hisobotiga ko‘ra, bugungi kunda global vaqf aktivlarining qiymati 100 milliarddan 1 trillion AQSH dollarigacha baholanmoqda.
Tadbir davomida soha mutaxassislari tomonidan qator dolzarb mavzularda ma’ruzalar qilindi. Xususan, islom moliyasi bo‘yicha xalqaro ekspert, doktor A’lam Asadov “Vaqfning asosiy tamoyillari, barqaror rivojlanish va xalqaro ilg‘or tajriba” mavzusida hamda BMTTD eksperti, doktor Ixtiyorjon To‘raboyev “O‘zbekistondagi hozirgi vaqf tizimining holati: asosiy kamchiliklar va tarkibiy muammolar” mavzusida taqdimot qilishdi. Taqdimotlar yakunida “Al-Muomalat” kompaniyasi rahbari Iskandar Tursunov, “Mezon kengashi” direktori Muzaffar Xusniddinov hamda “Islamic Business and Finance” (IsBF) ta’sischisi Jahongir Imamnazarovlar tizimni rivojlantirish bo‘yicha o‘zlarining amaliy taklif va mulohazalarini o‘rtoqlashdi.
Xulosa qilib aytganda, mazkur tadbir manfaatdor tomonlar uchun O‘zbekistonda tizimli vaqf mexanizmini joriy etishning tegishli huquqiy, me’yoriy va institutsional bazasini ishlab chiqish bo‘yicha muhim muhokama maydoni bo‘lib xizmat qildi.
O‘zbekiston musulmonlari idorasi
Matbuot xizmati
