Qozog'iston safari asnosida O'zbekiston musulmonlari idorasi raisi, muftiy Nuriddin domla hazratlari bugungi juma namozini Nur-Sulton shahrida bir necha o'n minglab jamoat to'plangan “Hazrati Sulton” jome masjidida ado etish uchun tashrif buyurdilar. Juma namozi avvalida Qozog'iston bosh muftiysi Navro'zbay hoji mav'iza qilib, so'ng so'zni Muftiy Nuriddin domla hazratlariga berdi

Muftiy hazratlari qardosh xalq mo'min-musulmonlariga Qur'oni karimning Niso surasidagi: “Ey, odamlar! Sizlarni bir jon (Odam)dan yaratgan va undan jufti (Havvo)ni yaratgan hamda ikkisidan ko'p erkak va ayollarni taratgan Rabbingizdan qo'rqingiz! Shuningdek, o'rtalaringizdagi o'zaro muomalada nomi keltiriluvchi Allohdan va qarindoshlar (aloqasini uzish)dan qo'rqingiz! Albatta, Alloh sizlarni kuzatib turuvchidir” mazmunidagi oyati karimani aytib, uni tafsir qilib berdilar.

Shuningdek, insonlar bir-biriga do'st-qardosh bo'lishi lozimligi haqidagi hadisi shariflardan aytib, sharhlab berdilar.

Ma'ruza davomida Muftiy hazratlari Qozog'istonda o'tgan “Mustaqil Qozog'iston va Islom qadriyatlari” nomli xalqaro anjuman muvaffaqiyatli bo'lgani, nufuzli tadbir, uchrashuvlar, umuman yaxshilik yo'lidagi hamkorlik aloqalari qardosh xalqlar do'stligiga katta hissa qo'shganini alohida qayd etdilar.

Ikki davlat prezidentlarining sa'y-harakatlari bilan so'nggi yillarda mamlakatlarimiz o'rtasidagi o'zaro hamkorlik aloqalari yangi bosqichga chiqib, jadal rivojlanib borayotganini ta'kidladilar.

Juma namozi davomida Muftiy hazratlaridan duo talabida bo'lgan o'n minglab namozxonlar, xususan turli sabablar ila ushbu shaharda bo'lib turgan vatandoshlarimiz haqqiga jamoat bilan birga xayrli duolar qildilar.

O'zbekiston musulmonlari idorasi Matbuot xizmati