Halqaro anjuman o'tkazilmoqda (fotolavha)
Bugun, 25 noyabr' kuni Qozog'istonning Nur-Sulton shahrida Qozog'iston musulmonlari diniy boshqarmasi tomonidan mamlakat mustaqilligining 30 yilligiga bag'ishlangan “Mustaqil Qozog'iston va islom qadriyatlari” mavzusida xalqaro ilmiy-amaliy konferentsiya boshlandi.
Anjumanda Qozog'istonning mustaqillik yillarida ma'naviy sohada erishgan yutuqlari, Qozog'istonning Birinchi Prezidenti Nursulton Nazarboyevning Islom dini rivoji va dinlararo totuvlikni mustahkamlashga qo'shgan hissasi hamda Qozog'iston Respublikasi Prezidenti Qasim-Jomart Tokayev tashabbusi bilan bog'liq masalalar muhokama qilinmoqda.
Shuningdek, qo'shni va xorij mamlakatlar bilan do'stona aloqalar, mo'min-musulmonlarning ittifoqligi yo'lida diniy peshvolar tomonidan amalga oshirilayotgan ishlar va hamkorlik aloqalarining yangi bosqichi to'g'risida so'z bormoqda.
Ushbu nufuzli tadbirda O'zbekiston musulmonlari idorasi raisi, muftiy Nuriddin domla hazratlari, Rossiya Federatsiyasi musulmonlari diniy idorasi raisi, muftiy Shayx Ravil Gaynutdin, Rossiya musulmonlari Markaziy diniy idorasi raisi, Shayx-ul Islom, muftiy Talgat Safo Tajuddin, Qirg'iziston musulmonlari idorasi raisi, muftiy Zamir hoji Rakiyev, Tojikiston islom markazi raisi, muftiy Saidmukarram Abduqodirzoda hazratlari, Mo'g'iliston musulmon tashkilotlari ittifoqi raisi Hadis Botirbek hoji, Qozog'istondagi “Nur-Muborak” Misr islom madaniyati universiteti rektori Muhammad ash-Shahhat al-Jindiy, Rossiya Oltoy Respublikasi musulmonlari diniy boshqarmasi muftiysi, Osiyo musulmonlari diniy boshqarmasi raisi Janbolat Oxtaubayev, Omsk va Omsk viloyati raisi Bota Bakulin singari Islom olamining martabali ulamolari, muftiylari, ekspertlari va mahalliy yirik din peshvolari qatnashmoqda.
Shuningdek, xalqaro anjumanda davlat va jamoat arboblari, ziyolilar, tarixchilar, xorijiy davlatlar elchilari, viloyatlar bosh imom-xatiblari ham ishtirok etmoqda.
Halqaro anjuman faoliyatini sayt va ijtimoiy tarmoqlarimiz orqali kuzatib boring.
O'zbekiston musulmonlari idorasi Matbuot xizmati
Banklar va mikromoliya tashkilotlari o‘z faoliyatini islomiy bank faoliyatiga o‘zgartirishi mumkin
Adliya vazirligi Mikromoliya tashkiloti va bank faoliyatini o‘zgartirish tartibi to‘g‘risidagi nizomga o‘zgartirish va qo‘shimchalarni davlat ro‘yxatidan o‘tkazdi (ro‘yxat raqami 3656-1, 01.08.2026 y.), xabar bermoqda huquqiyaxborot Telegram kanali.
Mazkur idoraviy hujjat "O‘zbekiston Respublikasining ayrim qonun hujjatlariga O‘zbekistonda islomiy bank faoliyatini joriy etishga qaratilgan qo‘shimcha va o‘zgartirishlar kiritish to‘g‘risida" 2026 yil 27 martdagi O‘RQ–1126-son Qonunga muvofiq ayrim kredit tashkilotlari faoliyatini o‘zgartirishning quyidagi tartib-taomillarini belgilaydi:
- mikromoliya tashkilotini faqat islomiy bank faoliyatini amalga oshiruvchi mikromoliya bankiga o‘zgartirish;
- faqat islomiy bank faoliyatini amalga oshiruvchi mikromoliya bankini faqat islomiy bank faoliyatini amalga oshiruvchi bankka o‘zgartirish;
- faqat islomiy bank faoliyatini amalga oshiruvchi bankni faqat islomiy bank faoliyatini amalga oshiruvchi mikromoliya bankiga o‘zgartirish;
- faqat islomiy bank faoliyatini amalga oshiruvchi mikromoliya bankini mikromoliya tashkilotiga o‘zgartirish;
- bankni faqat islomiy bank faoliyatini amalga oshiruvchi bankka o‘zgartirish.
Shuningdek, o‘z faoliyatini faqat islomiy bank faoliyatini amalga oshiruvchi bankka o‘zgartirishga faqat islomiy bank faoliyatini amalga oshiruvchi mikromoliya banki haqli.
Mikromoliya bankini davlat ro‘yxatidan o‘tkazish va bank faoliyatiga doir tegishli litsenziya (litsenziyalar) olish uchun nogironligi bo‘lgan shaxslar uchun mikromoliya banki binolarida shaharsozlik normalari va qoidalarida belgilangan talablarga muvofiq qulay shart-sharoitlar yaratilganligi bo‘yicha Qurilish va uy-joy kommunal xo‘jaligi sohasida nazorat qilish inspeksiyasining xulosasi mavjud bo‘lishi kerak.
Tashabbus Fors ko‘rfazi mamlakatlaridan investitsiyalarni jalb qilishga qaratilgan bo‘lib, dastlabki hisob-kitoblarga ko‘ra, ushbu chora-tadbirlarni amalga oshirish iqtisodiyotga depozitlar va to‘g‘ridan to‘g‘ri investitsiyalar ko‘rinishida taxminan 1 milliard dollar jalb qilishi mumkin. Mutaxassislarning prognozlariga ko‘ra, 2035 yilga borib O‘zbekiston ushbu tizim ishga tushirilgandan beri dunyoda islom moliyasining eng tez o‘sishini namoyish etadi.
O‘zbekiston musulmonlari idorasi Matbuot xizmati
