O'zbekiston va Qozog'iston muftiylari muloqot qildilar
Bugun, 25 noyabr' kuni Nur-Sulton shahrida O'zbekiston musulmonlari idorasi raisi, muftiy Nuriddin domla hazratlari “Mustaqil Qozog'iston va Islom qadriyatlari” nomli xalqaro anjuman oldidan Qozog'iston musulmonlari idorasi raisi, bosh muftiy Navro'zbay hoji Tag'anuli janoblari bilan uchrashuv o'tkazdilar.
Samimiy muloqot chog'ida Qozog'iston bosh muftiysi Navro'zbay hoji janoblari muftiy Nuriddin domla hazratlariga nufuzli anjumanga tashrif uchun tashakkur aytib, yangi lavozimga saylanganlari munosabati bilan muborakbod etib, xayrli duo va tilaklarni bildirdilar. O'z navbatida muftiy Nuriddin domla ham Navro'zbay hoji Tag'anuliga samimiy taklif, xayrli duo va tilaklar uchun minnatdorlik bildirib, u kishining din yo'lidagi faoliyatiga ulkan muvaffaqiyat tiladilar.
Uchrashuv avvalida O'zbekiston bilan Qozog'iston o'rtasidagi hamkorlik diniy-ma'rifiy jabhada ham izchil rivojlanib, xalqlarimiz o'rtasidagi birodarlikni yanada mustahkamlanib borayotgani, bu ikki Davlat rahbarlarining oqilona siyosati tufayli o'zaro munosabatlar yangi bosqichga ko'tarilgani alohida ta'kidlandi.
Qozog'iston muftiysi Navro'zbay hoji O'zbekistondagi tarixiy obidalar, muborak qadamjolar ziyoratchilarning dunyoqarashi va ruhiy olamini boyitishini mamnuniyat ila qayd etdi.
Muftiy Nuriddin domla O'zbekiston musulmonlari idorasida amalga oshirilayotgan xayrli ishlar, mo'min-musulmonlarning diniy ehtiyojlarini qondirish, xususan Fatvo bo'limini kengaytirish, diniy savol-javoblarga ixtisoslashgan koll-markaz faoliyatini rivojlantirish va diniy ta'lim sifatini oshirish, kadrlar tayyorlash tizimini takomillashtirish kabi o'zgarishlarga alohida to'xtaldilar.
Muloqot yakunida O'zbekiston va Qozog'iston muftiylari ikki davlat rahbarlarining dinga muhabbatlari ziyodaligi bois mamlakatlarimizda Islom ma'rifatini keng taratish bo'yicha katta sa'y-harakatlar olib borilayotganini alohida e'tirof etishdi.
Marosim oxirida Qozog'iston bosh muftiysi Navro'zbay hoji O'zbekiston musulmonlari idorasi raisi, muftiy Nuriddin domla hazratlariga hadyalar ulashdilar.
Ikki davlat diniy idoralari raislari muloqotidan so'ng muftiy Nuriddin domla boshchiligidagi O'zbekiston delegatsiyasi vakillari Qozog'iston muftiysi naibi O'ngar domla Yershat Agibay o'g'li hamrohligida Qozog'iston musulmonlari diniy boshqarmasi faoliyati bilan yaqindan tanishdilar.
O'zbekiston musulmonlari idorasi matbuot xizmati
Imom-xatiblar: «Islom sivilizatsiyasi markazi Uchinchi Renessans g‘oyasining amaliy ifodasi»
O‘zbekistonda Uchinchi Renessans g‘oyasini hayotga tatbiq etish, milliy va diniy merosni chuqur o‘rganish hamda ma’naviy-ma’rifiy bilimlarni kengaytirishga qaratilgan tashabbuslar doirasida Farg‘ona, Qashqadaryo va boshqa hududlardan kelgan imom-xatiblar O‘zbekistondagi Islom sivilizatsiyasi markazida bo‘ldilar. Ular Markazdagi muzey ekspozitsiyalari, noyob qo‘lyozmalar, Renessans davrlariga bag‘ishlangan bo‘limlar va zamonaviy interaktiv yechimlar bilan tanishib, ushbu maskanni ilm, ta’lim va ma’naviyatni uyg‘unlashtirgan muhim milliy platforma sifatida baholadilar, xabar bermoqda iccu.uz.
Farg‘ona viloyati Buvayda tumani «Katta mahalla» masjidi imom-xatibi Rahmatulloh G‘oyibnazarov Prezident Shavkat Mirziyoyev tashabbusi bilan barpo etilgan mazkur Markazni yosh avlod uchun muhim ma’rifat maskani sifatida baholadi.
«Bu yerda Birinchi va Ikkinchi Renessans davrlari, buyuk allomalarimiz qoldirgan ilmiy meros va mamlakatimiz taraqqiyoti haqidagi ekspozitsiyalarni ko‘rib katta taassurot oldik. Bu yerga kelgan har bir inson o‘z tarixini chuqurroq anglaydi, yoshlar esa ilmga va vatanparvarlikka yanada ko‘proq intiladi. Bu yerda olgan bilim va taassurotlarimizni xalqimizga yetkazishni o‘zimizga vazifa deb bilamiz», — dedi u.
Farg‘ona viloyati Qo‘shtepa tumani bosh imom-xatibi, «Muborak» jome masjidi imom-xatibi Otabek Xolmurodov Markaz kutubxonasida ilmiy izlanishlar uchun yaratilgan sharoitlarga e’tibor qaratdi.
Uning ta’kidlashicha, elektron kitoblar fondi, Brayl alifbosidagi adabiyotlar, maxsus tadqiqot xonalari va noyob manbalarning bir joyda jamlangani Markazni nafaqat muzey, balki keng qamrovli ilmiy resurs markaziga aylantirgan.
«Bu kutubxona ilmiy izlanish bilan shug‘ullanuvchilar uchun haqiqiy bilim maskani ekan. Bu yerda yaratilgan sharoitlar ilm ahlini yanada ko‘proq izlanishga undaydi. Biz bu imkoniyatlar haqida yoshlarimizga albatta targ‘ibot olib boramiz», — dedi u.
Farg‘ona viloyati Bag‘dod tumani bosh imom-xatibi Ahmadxon Nizomov esa Markazning ilmiy konsepsiyasiga alohida to‘xtaldi.
Uning fikricha, har bir ekspozitsiya ortida keng ko‘lamli tadqiqotlar va ilmiy izlanishlar mujassam bo‘lib, bu yerdagi interaktiv muhit tashrif buyuruvchilarni faqat tomoshabin emas, balki izlanuvchiga aylantiradi.
«Bu yerga bir marta kelib barchasini to‘liq anglash qiyin. Har bir ekspozitsiya ortida katta ilmiy mehnat mujassam. Ayniqsa, allomalarimiz merosi, tadqiqot markazlari va interaktiv imkoniyatlar insonni yanada chuqur izlanishga chorlaydi. Bu maskan kelajak avlod uchun ulkan ma’naviy boylik va Yangi O‘zbekistonning ilm-fan taraqqiyotiga xizmat qiladigan muhim poydevordir», — dedi u.
Tashrif yakunida ishtirokchilar Markazda jamlangan boy ilmiy va madaniy meros, raqamli ekspozitsiyalar hamda ta’lim imkoniyatlarini keng jamoatchilik, ayniqsa yoshlar o‘rtasida targ‘ib qilish Uchinchi Renessans g‘oyalarini hayotga tatbiq etish, milliy o‘zlikni anglash va ilmiy merosga qiziqishni yanada kuchaytirishga xizmat qilishini qayd etdilar.
O‘zbekiston musulmonlari idorasi Matbuot xizmati
