Yaponiyadagi eng yirik va ilk qurilgan masjidlardan biri “Tokio” jomeidir. U poytaxtning Sibuya tumanida joylashgan. Yaponiyaga ko'chib kelgan tatar muhojirlari tomonidan uch yilda qurib bitkazilgan. 1938 yili Mavlidun Nabiy sanasida foydalanishga topshirilgan.

1998 yili Turkiya hukumati tomonidan qayta ta'mirlangan. 2000 yili 1200 kishini sig'dira oladigan yangi va ko'rkam masjid ishga tushdi. Ayollar uchun ham alohida namozxona ajratilgan.

Masjid ikki qavatdan iborat bo'lib, birinchi qavatda namozgoh va ikkinchi qavatida esa madaniyat markazi joylashgan. Masjidning bitta minorasi bor. Uning uzunligi 41 metr, gumbazining balandligi esa 23 metr. Jomeda Islom dini, tahorat, namoz saboqlaridan hamda Qur'oni karimdan ta'lim beriladi.

Gumbazning ichki qismiga “Ixlos” surasi, atrofiga esa Alloh, Muhammad sollallohu alayhi vasallam lafzi va to'rt sahoba ismlari tushirilgan. Masjid kiraverishiga “Oyatul kursi”, devorlariga Alloh taoloning go'zal ismlari, mehrobning yuqorisiga «Mashriq ham, Mag'rib ham Allohnikidir. Bas, qaysi tarafga yuzingizni qaratsangiz, o'sha tomonda Allohning “yuzi” mavjuddir» (Baqara surasi, 115-oyat) oyati bitilgan.

Davron NURMUHAMMAD