“World Expo 2030” ko'rgazmasi Saudiya Arabistonida o'tkaziladi
Saudiya Arabistoni poytaxti Ar-Riyod shahri 2030 yilgi Butunjahon ko'rgazmasini o'tkazish uchun tanlandi, deb xabar berdi Al-Arabiya telekanali.
Tadbir tashkilotchisi – Halqaro ko'rgazmalar byurosi Parijda ovoz berishda 119 davlat vakillari Ar-Riyodni yoqlab ovoz berdi, uning raqiblari Seul va Rim esa mos ravishda 29 ta va 17 ta ovoz oldi.
SAP tashqi ishlari vaziri, shahzoda Faysal bin Farxon o'z mamlakati nomzodini qo'llab-quvvatlagan davlatlarga minnatdorchilik bildirdi.
Saudiya Arabistoni o'z salohiyatini butun dunyoga namoyish etish va turizm, biznes va sarmoyani o'ziga jalb etish maqsadida “World Expo 2030” va boshqa jahonga mashhur xalqaro tadbirlarni o'tkazishga erishish uchun ko'p mehnat qildi.
Avvalgi Butunjahon ko'rgazmasi 2021 – 22 yillarda Dubayda bo'lib o'tgan edi.
O'zbekiston musulmonlari idorasi
Matbuot xizmati
YUNЕSKO bilan O‘zbekiston mahalla tizimi tajribasini xalqaro darajada targ‘ib qilish masalasi muhokama qilindi
O‘zbekiston va YUNЕSKOning Nomoddiy madaniy merosni muhofaza qilish to‘g‘risidagi konvensiyasi kotibiyati vakillari o‘rtasida onlayn uchrashuv bo‘lib o‘tdi, deb xabar bermoqda “Dunyo” AA.
Mamlakatimizning YUNЕSKO huzuridagi Doimiy vakolatxonasi ko‘magida tashkil etilgan muloqotda mahalla bilan bog‘liq madaniy an’ana va urf-odatlar, ularni xalqaro darajada targ‘ib qilish istiqbollari muhokama qilindi.
YUNЕSKOning Nomoddiy madaniy merosni muhofaza qilish to‘g‘risidagi konvensiyasi kotibi Fumiko Oxinata va Osiyo-Tinch okeani mintaqasi uchun mas’ul dastur mutaxassisi Nikolas Tan mavzu yuzasidan o‘z fikr-mulohazalarini bayon etdi.
O‘zbekiston tomonidan Tashqi ishlar vazirligi, O‘zbekiston mahallalari uyushmasi hamda YUNЕSKO huzuridagi Doimiy vakolatxonasi vakillari mahallaning ko‘p asrlik tarixi, uning jamiyat hayotidagi alohida o‘rni va milliy an’analarni saqlashdagi ahamiyati haqida so‘z yuritdi.
Uchrashuvda mahalla O‘zbekiston xalqi turmush tarzining ajralmas qismi ekani ta’kidlandi. U insonlarni yaxshi qo‘shnichilik, o‘zaro yordam, hamjihatlik va katta avlod vakillariga hurmat tamoyillari asosida birlashtiradi.
YUNЕSKO Kotibiyati vakillari taqdim etilgan materiallarga katta qiziqish bildirdi. Ular O‘zbekistonda mahalla bilan bog‘liq shakllangan jamoat hayoti tartibining o‘ziga xos xususiyatlarini e’tirof etdi.
Suhbat davomida O‘zbekistonning nomoddiy madaniy merosni targ‘ib qilishdagi roli alohida qayd etildi. Shu nuqtayi nazardan, o‘zbek mahalla tizimi tajribasi YUNЕSKO Kotibiyati mutaxassislarida katta qiziqish uyg‘otdi.
O‘zbekiston musulmonlari idorasi Matbuot xizmati
