Qirg'iziston ulamolarining Buxoro ziyorati (Fotolavha)
Qirg'iziston musulmonlari diniy idorasi raisi, muftiy Zamir domla Rakiyev boshchiligidagi delegatsiya Buxoro shahriga tashrif buyurdi. Buxoro viloyati hokimi o'rinbosari Erkin Majidov, viloyat bosh imom-xatibi Jobir domla Buxoriy, Mir Arab oliy madrasasi rektori Haydar domla Yo'ldoshxo'jayev, Mir Arab o'rta maxsus islom bilim yurti mudiri Jaloliddin domla Saburov, shuningdek, imom-xatiblar martabali mehmonlarni kutib olib, hamrohlik qildi.
Mehmonlar dastavval Buxoro shahrida joylashgan tarixiy obidalardan Masjidi Kalon jome masjidi, Poyi kalon ansambili va Mir Arab o'rta maxsus islom bilim yurti bilan yaqindan tanishdi.
Shundan so'ng mehmonlar 1127 yil qurilgan Minorai kalon va 500 yillik tarixga ega bo'lgan Mir Arab madrasasini ko'rib, Buxoroning qadamiy tarixi mehmonlarda hayrat va havas uyg'otdi. Shuningdek, Labi Hovuz majmuasi, Ko'kaldosh madrasasi va Nodir Devonbegi taxiriy obidalarni ziyorat qilishdi.
Keyin esa martabali mehmonlarni mezbon mutassaddilar bilan birga Bahouddin Naqshband maqbarasini ziyorat qilishdi. Muborak qadamjoda Qur'on tilovat qilinib, Haq taolodan xalqimiz tinchligi va farovonligini so'rab xayrli duolar qilindi.
Martabali mehmonlar peshin namozini Buxoro shahridagi “Fayzobod” jome masjidida ado qilishdi. Ikki mamlakat o'rtasidagi aloqalar bundanda rivojlanishi va mustahkamlanishi uchun xayrli duolar qilinib, termir yo'l vakzaliga kuzatib qo'yildi.
O'zbekiston musulmonlari idorasi matbuot xizmati
“Arab Tourist”: Samarqand, Buxoro va Xiva — islom sivilizatsiyasi va jahon madaniy merosining bebaho durdonalari
Saudiya Arabistonining turizm va sayohatlarga ixtisoslashgan “Arab Tourist” elektron nashrida “Markaziy Osiyoning qoq markazida joylashgan va Buyuk ipak yo‘li bilan bog‘langan mamlakat” sarlavhali tahliliy maqola e’lon qilindi, deb xabar bermoqda “Dunyo” AA.
Maqolada Buyuk ipak yo‘li tarixida o‘zbek shaharlarining tutgan o‘rni alohida e’tirof etiladi. Xususan, Samarqand, Buxoro va Xiva kabi tarixiy shaharlar asrlar davomida Sharq va G‘arb o‘rtasidagi savdo, fan va madaniyat markazlari sifatida xizmat qilgani ta’kidlanadi. Registon maydoni, Ichan-qal’a va Buxorodagi me’moriy obidalar islom sivilizatsiyasi hamda jahon madaniy merosining bebaho durdonalari sifatida tilga olinadi.
Bundan tashqari, nashr O‘zbekistonning rang-barang tabiati va geografik relefiga to‘xtalib o‘tgan. Qizilqum cho‘li, serhosil Farg‘ona vodiysi, Tyan-Shan va Pomir-Oloy tog‘ tizmalari aholi joylashuvi va qishloq xo‘jaligi rivojida muhim o‘rin tutishi qayd etiladi.
Nashr, shuningdek, Buyuk Mirzo Ulug‘bek kabi donishmandlarning astronomiya va matematika sohasidagi buyuk kashfiyotlarini alohida e’tirof etgan.
Xulosada ta’kidlanganidek, Toshkent, Samarqand, Buxoro, Namangan va Andijon kabi shaharlar bugungi kunda nafaqat ma’muriy va iqtisodiy, balki jadal rivojlanayotgan yirik madaniy-turistik markazlar sifatida dunyo sayyohlari e’tiborini o‘ziga jalb etmoqda.
O‘zbekiston musulmonlari idorasi Matbuot xizmati
