Turizm va sport vazirligining Ziyorat turizmini rivojlantirish departamenti hamda Surxondaryo viloyat Turizm va sport Bosh boshqarmasi tashabbusi bilan birgalikda «Yashil makon» umummilliy loyihasi yuzasidan bir qator ishlar amalga oshirilmoqda.

Jumladan, Surxondaryo viloyati Boysun tumanida joylashgan ziyorat ob'ektlari hududida 40 dan ortiq archa ko'chati o'tkazildi.

Bu borada 2-noyabr' kuni Prezident Shavkat Mirziyoev raisligida yashil maydonlarni kengaytirish chora-tadbirlari muhokamasi yuzasidan videoselektor yig'ilishda aniq vazifalar belgilab olingan. Shuningdek, 10-dekabrga qadar daraxt ekish bo'yicha «dolzarb 40 kunlik» e'lon qilingan.

Davlat rahbari tashabbusi bilan yo'lga qo'yilgan«Yashil makon» umummilliy loyihasi doirasida yiliga 200 million tup daraxt va buta ko'chatlarini ekish, shu orqali shaharlardagi yashil maydonlarni hozirgi 8 foizdan 30 foizga oshirish rejalashtirilgan. Bugungi va kelgusidagi ekologik vaziyatni inobatga olib, daraxt ekishni davlat siyosati darajasiga ko'tarilishi ushbu loyihada belgilangan vazifalarni puxta tayyorgarlik bilan bajarishni taqozo etadi.

Birinchi navbatda, mavjud va yangidan barpo etiladigan yashil maydonlarga tuman yoki shahar hokimi tomonidan tayinlangan mutasaddi daraxtlarni parvarishlash bilan birga, ushbu hududni obod saqlashga ham mas'ul hisoblanadi.

"Ziyoratgohlarda tashrif buyuruvchilar sonini oshirishning asosiy yo'llaridan biri bu- ziyoratgohlar atrofini obodonlashtirish, ziyoratchilar uchun qulay shart-sharoitlar yaratishdir. Shu o'rinda ko'chatlar o'tqazish atrof-muhit landshaftining rivojlanishiga, pirovadida esa turistlar soni oshishiga xizmat qiladi",- deydi Ziyorat turizmi departamenti direktori J.Sayidov.

Ta'kidlash joizki, ziyorat turizmini rivojlantirish departamenti tomonidan Surxondaryo viloyatidagi Ziyorat turizmi hamda madaniy meros ob'ektlarida mahalliy va xorijiy turistlar uchun yaratilgan imkoniyatlar hamda ziyoratchilar sonini oshirish yuzasidan aniq takliflar tayyorlash maqsadida monitoring ishlari olib borilmoqda.

O'zbekiston musulmonlari idorasi matbuot xizmati