Ayni kunlarda nafaqat yurtimizning taniqli ulamolari Toshkent viloyatidagi masjidlarga tashrif buyurishib, o'zlarining go'zal mav'izalari bilan namozxonlarni yaxshilikka chaqirmoqda, shu bilan birga, mo'min-musulmonlar ham olimlarimizni hayratga solishyapti.

Hufton namoziga Zangiota tumanidagi “Imomi A'zam” jomesiga kelgan O'zbekiston musulmonlari idorasi raisi o'rinbosari Ibrohimjon domla Inomov kunning so'nggi namozini jamoat bilan ado etgach, ma'ruzadan keyin yoshi ulug' bir otaxonning qilgan ajoyib ishidan hayratlanganini gapirib berdilar.

–  Masjidga kirayotsam, – deydi Ibrohimjon domla, – 85 yoshlar chamasi bir otaxon hassasining uchini dastro'moli bilan artib, so'ngra Allohning uyiga qadam bosdi. Yurtimiz bo'ylab turli hududlarga boramiz, lekin bunday holatlar kam kuzatiladi. Chunki qalbi pok odam masjidni ham toza, ozoda saqlaydi. Tabarruk yoshli otaxonning bu go'zal xatti-harakati barchamizga ibrat bo'lishi kerak. Halkimizning taqvosi –- Hudodan qo'rqish fazilati eng oliy va beqiyos darajada. Bu tahsinga sazovor, albatta. Ana shunday jamoani shakllantirgan masjid imom-xatibi va xodimlariga tashakkur izhor qilaman.

Darhaqiqat, masjid Allohning uyi. Bu tabarruk maskanda avvalo surat va siyrat go'zal bo'lishi kerak. Shundagina ibodatlarimiz mukammal bo'ladi.