IQNA – Misrda Qur’on oyatlarini to‘g‘ri o‘qish, talaffuzni to‘g‘rilash va tajvid qoidalarini o‘zlashtirishni o‘rgatish maqsadida “Maqra’at al-Majlis” (Majlis tilovati) deb nomlangan milliy Qur’on tilovatini tuzatish loyihasi yo‘lga qo‘yildi.

IQNA saytining “newsroom.info” axborot portaliga tayanib xabar berishicha, Misr Islom ishlari bo‘yicha Oliy Kengash “Maqra’at al-Majlis” (Majlis qiroati) nomli yangi loyihani ishga tushirgan. Ushbu loyihadan Allohning kalomiga xizmat qilish va uning ilmlarini kishilar o‘rtasida targ‘ib qilish, Qur’onni to‘g‘ri tilovat qilishni o‘rgatish, talaffuzini to‘g‘rilash, tajvid qoidalarini o‘zlashtirish maqsad qilingan.

Mazkur loyiha Islom ishlari bo‘yicha oliy kengashning Qur’on karim madaniyatini tarqatish va to‘g‘ri qiroatni o‘rganishga ko‘maklashish bo‘yicha majburiyatlarining bir qismidir. U interfaol o‘quv uchrashuvi shaklida o‘tkazilmoqda.

Ishtirokchilar ushbu yig‘ilish orqali to‘g‘ri talaffuz va qiroatni to‘g‘rilashni o‘rganadilar, shuningdek, qiroatini mukammallik va to‘liqlikka yaqinlashtirish uchun tajvidning asosiy tamoyillari bilan tanishadilar.

 “Majlis tilovati bilan... Talaffuzingni to‘g‘irla va Qur’on tilovatingni mukammal qil” shiori ostidagi ushbu dastur Islom ishlari bo‘yicha Oliy kengash Media markazi a’zosi Shayx Marvon Yahyo tomonidan taqdim etilmoqda.

Ushbu dastur orqali Misrdagi Islom ishlari bo‘yicha Oliy Kengash diniy ommaviy axborot vositalarini Qur’on ta’limi xizmatiga jalb etish va uni o‘qitishni osonlashtirish, shuningdek, qiroat, fikr yuritish va jiddu jahd bilan g‘ayrat qilish orqali avlodlarni Allohning Kitobi bilan bog‘lashni maqsad qilgan.

Ilyosxon Ahmedov
tayyorladi