Habaringiz bor, Qirg'iziston musulmonlari diniy idorasi raisi, muftiy Zamir hoji Rakiyev boshchiligidagi bir guruh ulamolar tashrif yurtimizda bo'lib turibdi.

Bugun kunning birinchi yarmida O'zbekiston musulmonlari idorasi raisi, muftiy Nuriddin domla Holiqnazarov hazratlari va Qirg'iziston musulmonlari idorasi raisi, muftiy Zamir hoji Rakiyev hazratlari uchrashuv o'tkazdilar.

Shundan so'ng ikki qardosh xalq ulamolari juma namozini ado etish maqsadida poytaxtimizdagi ko'rkam jomelardan biri bo'lgan “Hazrati Imom” masjidiga tashrif buyurdilar.

Juma ma'ruzasi asnosida mo'min-musulmonlarga Qirg'iziston ulamolarining yurtimizga tashrifi, ikki el din peshvolarining iliq va samimiy hamkorlik aloqalari haqida ma'lumot berildi.

Ikki xalq ulamolari muborak masjidda minglab namozxonlar bilan birga juma namozini ado etdilar, so'ngra Qur'oni karimdan tilovotni qorilarimiz, duoni esa qardosh ulamolari qilib berishdi.

Tashrif asnosida mehmonlar "Hazrati Imom" majmuasidagi Hazrati Usmon Mushafini ziyorat qilib, Imom Buxoriy nomli Toshkent islom instituti bilan yaqindan tanishdilar.

Alloh taolo din va qon qarindosh birodarlar o'rtasidagi ahlligimizni yanada ziyoda qilsin!

O'zbekiston musulmonlari idorasi Matbuot xizmati