muslim.uz
Уламоларни камситиш ёхуд мусулмонлар бир тану жондир
Ўзгаларни ҳурмат қилиш, ўзаро ҳамжиҳатликда яшашга интилиш жамиятнинг бирлигини сақлашда, унинг аъзолари орасида муҳаббатни кучайтиришда, душманлик ва келишмовчилик сабабларини йўқотишда муҳим аҳамият касб этади. Аллоҳ таоло Қуръони Каримда бундай марҳамат қилади: “Эй, иймон келтирганлар! Бир қавм бошқасини масхара қилмасин, эҳтимол, улар булардан яхшироқдир. Ва аёллар ҳам бошқа аёлларни (масхара қилмасин), эҳтимол, улар булардан яхшироқдир. Ва ўзингизни ўзингиз мазах қилманг, бир-бирингизга лақаб қўйманг. Иймондан кейин фосиқлик исми нақадар ёмон! Ва ким тавба қилмаса, бас, ана ўшалар ўзлари золимлардир” (Ҳужурот сураси, 11-оят).
Аллоҳ таоло бу оятда мусулмонларни ўзидан бошқаларни ҳурмат қилишга, уларнинг обрўсини тўкмасликка, ҳис-туйғуларини таҳқирламасликка буюради. Эркакми ёки аёлми ҳеч кимни масхара қилиб, камситиб бўлмайди, хоҳ гап билан, хоҳ қўл билан ишора қилиб ёки бошқа йўллар билан бўлсин. Эҳтимол, масхара қилинган кишилар кўриниши бечораҳол кўринар, аммо, масхара қилувчидан яхшироқдир.
Бугунги кунимизга назар солсак, ижтимоий тармоқларда мусулмонларнинг айбини очиш, камситиш, масхара қилиш оддий бир ҳолга айланиб қолганига гувоҳ бўламиз.
Бундай кимсаларга Жаҳаннамнинг ўзи паноҳ сўрайдиган – Вайл азоби бўлиши ҳақида Аллоҳ таоло Ҳумаза сурасида марҳамат қилиб айтадики: “Ҳар бир обрў тўкувчи ва айбловчига «вайл» бўлсин. У мол жамлади ва уни санаб турди. У, албатта, уни абадий қолдирур, деб ҳисоблар. Йўқ! Албатта у «ҳутома»га хор-зор этиб ташланар. «Ҳутома» қандоқ нарса эканини сенга нима билдирар? У Аллоҳнинг шиддатли, ўчмас оловидир. Қалбгача етиб борадир. Албатта, у уларни устидан қоплангандир. Узун-узун устунларга боғлангандирлар”.
Ўзларини оқлаш учун ҳар бир киши сўз, фикр эркинлигига ҳақли деган ҳужжатни келтириб, ўзгалар шаъни, қадр-қиммати, обрўсини тўкишади. Нафслари нимани хоҳласа, нимага буюрса шуни қилишади. Мусулмон хаёлига келган, кимлардандир эшитган, кўрган нарсасига кўркўрона амал қилиб кетавермайди. Оппоқ вароқдаги бир дона қора нуқтани кўриб, ҳаммасини қорага чиқариш ақлли кишининг иши эмас. Бу қалбда иллат борлигидан нишонадир. Бир олимни таҳқирлаб, масхаралаб иккинчисини кўтарган инсонни ҳақиқий комил мўмин дейиш қийин.
Инсоннинг қалби соф бўлса, унинг тилидан яхши гаплар чиқади. Ҳар бир кишининг сўзига қараб унинг кимлигини, қандай инсонлигини англаса бўлади. Пайғамбаримиз Муҳаммад соллаллоҳу алайҳи васаллам айтадиларки: “Банданинг қалби тўғриланмас экан, унинг имони тўғри бўлмайди ва банданинг тили тўғриланмас экан, унинг қалби тўғриланмайди” (Имом Аҳмад ривояти).
Пайғамбаримиз соллаллоҳу алайҳи васаллам умматларини гўзал хулқли бўлишга чақирганлар: “Қиёмат кунида банданинг барча амаллари тарозига қўйилганда энг тош босадиган амал яхши хулқидир. Аллоҳ таоло шармсиз, беҳаё сўз айтувчиларни ўзига дўст тутмас”.
Абу Дардо розияллоҳу анҳу айтадиларки: “Киши мунофиқлигининг илк аломати ўз имомига таъна қилишидир”.
Ҳузайфа ибн Ямон розияллоҳу анҳу: “Бугунги мунофиқлар Набий алайҳиссаломнинг даврларидагидан ёмондир. Чунки улар мунофиқликни яшириб, махфий қилардилар. Булар эса ошкор қилмоқдалар”, деганлар.
Аллоҳ таоло Нисо сураси 145-оятида бундай марҳамат қилади: “Албатта мунофиқлар оловнинг энг остки қаватидадирлар ва уларга ёрдамчи топа олмассан”.
Хулоса қилиб айтганда, одамларни айниқса уламоларни масхара қилиш қалбнинг хасталиги, мунофиқлик аломатидир. Бу кишилар ўртасида дўстлик алоқаларини бузилишига, жамият аъзолари орасида адоват пайдо бўлишига, Расулуллоҳ алайҳиссаломнинг меросхўрларига нисбатан беҳурматлик қилинишга олиб келади. Натижада халқ тўғри йўлдан адашади, ҳалок бўлади. Имом Аҳмад ибн Ҳанбал раҳматуллоҳи алайҳ айтадилар: “Олимларнинг гўшти заҳарликдир. Ҳидини ҳидлаган касал бўлади. Еганлар эса ҳалок бўлади!”.
Расулуллоҳ алайҳиссалом айтганларидек, мусулмонлар худди бир жон, бир танага ўхшайди. Қачонки бир мусулмон бошқа бир мусулмон биродарини айбласа, худди ўзини айблагандек бўлади. Аслида киши ўз айбини тузатиш билан машғул бўлса, бошқаларнинг айби унинг кўзига кўринмайди.
Аллоҳ таоло барчамизни бир-биримизга меҳр-оқибатли, уламолар, илм аҳлига муҳаббатли, итоатли қилсин. Қиёматда севикли Пайғамбаримиз Муҳаммад алайҳиссалом билан жаннатда бирга бўлишимизни насиб этсин.
Жасурбек ЛАТИПОВ,
Шофиркон туман “Хожа Ориф Ревгарий Моҳитобон” жоме масжиди имом-хатиби.
“Сузук ота” мажмуасини сақлаш учун қўшимча маблағлар ажратилди
Вазирлар Маҳкамаси “Тошкент шаҳар ҳокимлиги ҳузуридаги Мустақиллик майдонини кўкаламзорлаштириш, ободонлаштириш ва сақлаш департаментини махсус техника ва автотранспорт воситалари билан таъминлаш тўғрисида”ги қарорни қабул қилди. Бу ҳақда norma.uz хабар берди.
Унга кўра, Тошкент шаҳрининг Шайхонтоҳур туманида барпо этилган “Сузук ота” мажмуасида ободонлаштириш, сунъий суғориш иншоотлари ва кўкаламзорлаштириш объектларини қуриш ишлари якунлангани ҳамда мажмуани сақлаш ва ундан фойдаланиш Тошкент шаҳар ҳокимлиги ҳузуридаги Мустақиллик майдонини кўкаламзорлаштириш, ободонлаштириш ва сақлаш департаментига (кейинги ўринларда – Департамент) юкланди.
2020-2021 йилларда Тошкент шаҳар ҳокимлиги ҳузуридаги Департаментни таъминлаш учун махсус техника ва автотранспорт воситалари рўйхати иловага мувофиқ (14 та) ва ходимлар штатини ошириш (+ 33 та) тасдиқланди.
Тошкент шаҳар ҳокимлигига 2020 йилда қўшимча штат бирликлари, “Сузук ота” мажмуасидан фойдаланиш ва сақлаш харажатларига ҳамда махсус техника ва автотранспорт воситаларини харид қилиш учун зарур маблағларни Тошкент шаҳар маҳаллий бюджети маблағлари ҳисобидан ажратиш топширилди.
Тошкент шаҳар ҳокимлиги ва Молия вазирлигига 2021 йилдан бошлаб Тошкент шаҳар маҳаллий бюджети параметрларини шакллантиришда “Сузук ота” мажмуасидан фойдаланиш ва уни сақлаш харажатларига ҳамда махсус техника ва автотранспорт воситаларини харид қилиш учун зарур маблағларни назарда тутиш белгиланди.
Маълумот учун, ушбу қарор Қонун ҳужжатлари маълумотлари миллий базасида эълон қилинган ва 6.08.2020 йилдан кучга кирди.
Ўзбекистон мусулмонлари идораси матбуот хизмати
Саҳобалар ҳаёти: Зайдул Хайр розияллоҳу анҳу (Аудио)
ЎМИ матбуот хизмати
Меъёр дастуримиз бўлсин!
Меъёр – ўртача йўлни тутиш, мўътадиллик демак. Ҳар соҳада, ҳар бир мавзуда ўрта йўлни тутиш марғуб саналади. Ҳатто яхши, савобли ишни бажаришда ҳам меъёр шарт. Аллоҳ таоло марҳамат қилади: “Улар эҳсон қилганларида исроф ҳам, хасислик ҳам қилмаслар, (тутган йўллари) бунинг ўртасида – мўътадилдир” (Фурқон, 67).
Намоз – диннинг устуни, рўза – имон қалқони. Аммо бу ибодатларни бажаришнинг ҳам меъёри бор. Пайғамбаримиз соллаллоҳу алайҳи васаллам Аллоҳ ажр беришдан чарчамайди, лекин сиз зерикиб қоласиз, шунинг учун ўртаҳол ибодат қилинг, деган мазмунда ўгит берадилар. У зот яна ифротга ҳам, тафритга ҳам кетиб қолишдан қайтарадилар. Яъни, ўта бепарво ҳам бўлиб қолманг, таркидунёчиликка ҳам берилиб кетманг, деб огоҳлантирадилар.
Ҳадиси шарифларда айтилишича, Аллоҳ йўлида бир киши билан дўст тутиниш бошқа соя бўлмайдиган Кунда Аршнинг соясидан жой олишга сабаб бўлади.
Аммо яна шу ҳадисларда мазкур хусусда ҳам ўртача йўл тутиш – дўстни меъёрида яхши кўриш билан бирга душманни ёмон кўришда ҳам чегарадан ошмаслик кераклиги насиҳат қилинади. Доимо ишларнинг ўртачаси яхши экани уқтирилади.
Буларнинг барчасидан хулоса чиқарсак, ўртачалик – инсон табиатига мос, хилқатига хос хислат. Айнан, у билан дунёнинг низоми, жамият интизоми барқарор бўлади. Меъёрдан оғишмасак, эътиқодимизу амалларимиз Китоб ва суннатга мос бўлади. Ўтмиш солиҳ аждодларимиз тутган йўл ҳам шу аслида.
“Hidoyat” журналидан
Ўзбекистон ва Индонезия зиёрат туризм соҳасидаги ҳамкорликни кенгайтириш бўйича мулоқотни давом эттиришга келишиб олди
Ўзбекистоннинг Индонезиядаги элчиси Улуғбек Розуқулов Индонезиядаги энг йирик мусулмон ташкилоти “Наҳдатул уламо” Ижроия қўмитаси раиси Саид Оқил Сирож билан учрашди, дея хабар бермоқда "Дунё" ахборот агентлиги.
“Наҳдатул уламо” 1926 йилда ташкил топган бўлиб, бугунги кунда унинг 90 миллионга яқин аъзоси бор.
Учрашув чоғида Саид Оқил Сирож Ўзбекистоннинг Ислом цивилизациясининг ривожига қўшган ҳиссасини алоҳида таъкидлади. Ўзбек халқининг Имом ал-Бухорий, Абу Али Ибн Сино, Муҳаммад ал-Хоразмий ва бошқа буюк ўғлонлари каби Ислом оламининг етук вакиллари асарларини ўрганиш муҳимлигига алоҳида эътибор қаратилди.
Ўзбекистоннинг бой тарихий, маданий ва маънавий меросидан Индонезия яхши хабардор эканини таъкидлади.
Музокаралар якунида томонлар зиёрат туризми соҳасидаги ҳамкорликни кучайтириш, хусусан, "Ўзбекистон+зиёрат" ва "Ўзбекистон+Умра" қўшма сайёҳлик пакетларини илгари суриш бўйича мулоқотни давом эттиришга келишиб олдилар.
Шунингдек, томонлар жорий йилнинг октябр ойидан янги туристик пакетларнинг ташкилий-техник жиҳатлари бўйича иш олиб борадиган қўшма ишчи гуруҳини тузишга келишиб олдилар.
Ўзбекистон мусулмонлари идораси матбуот хизмати
Янгиликлар
