Сайт тест ҳолатида ишламоқда!
20 Ноябр, 2026   |   10 Жумадул сони, 1448

Тошкент шаҳри
Бомдод
05:54
Қуёш
07:12
Пешин
12:14
Аср
15:18
Шом
17:03
Хуфтон
18:19
Bismillah
20 Ноябр, 2026, 10 Жумадул сони, 1448

Имом Жаъфарнинг 3 насиҳати

30.04.2024   1111   3 min.
Имом Жаъфарнинг 3 насиҳати

Суфёни Саврий раҳматуллоҳи алайҳ Расулуллоҳ соллаллоҳу алайҳи васалламнинг авлодларидан бўлмиш Имом Жаъфар Содиқ раҳматуллоҳи алайҳнинг ҳузурларига бориб: “Менга насиҳат қилмагунингизча ёнингиздан кетмайман”, деди.

Мен сизга нима кўпроқ фойда келтирса, шуни айтаман, эй Суфён, деб Имом Жаъфар қуйидаги учта ҳикматли насиҳатларини баён қилди:

1. Агар Аллоҳ сизга бирор нарсани берган бўлсаю, уни давомли ва барқарор бўлишини истасангиз, бу инъоми учун Аллоҳга кўпроқ ҳамд ва шукр айтинг. Дарҳақиқат, Аллоҳ таоло ўз Китобида: “Қасамки, агар шукр қилсангиз, албатта, сизга зиёда қилурман”, деган (Иброҳим, 7).

2. Агар ризқингиз кечикса, гуноҳларингиз учун Аллоҳга тез-тез истиғфор айтинг. Зеро, Аллоҳ таоло: “Бас, ўз Роббингизга истиғфор айтинг, албатта, У гуноҳларни кўплаб мағфират қилувчидир, дедим. У зот осмондан устингизга кетма-кет барака ёмғирини юборадир”, деб марҳамат қилган (Нуҳ, 10-12).

3. Ва агар бирор нарса сизни хафа қилган бўлса, унда “Аллоҳдан бошқада куч ва қудрат йўқдир” – “Лаа ҳавла ва лаа қуввата илла биллаҳ” сўзини кўп такрорланг, чунки бу сўз жаннат хазиналаридан, хурсандчилик ва енгиллик калитидир”.

Шунда Суфён: “Бу уч насиҳат нақадар ажойиб-а”, деди.

Абу Абдуллоҳ Жаъфар ибн Муҳаммад ҳижрий 83, милодий 700 йили Мадинада туғилган. Насаблари ота томондан Ҳазрати Алига, она томонидан эса Абу Бакр Сиддиқ розияллоҳу анҳумга боради. Табаъ тобеъинлардан, аҳли байтнинг энг таниқли уламоларидан, тафсир, ҳадис, фиқҳ илмларидан ташқари кимё, физика, ҳисоб каби табиий илмларда ҳам пешқадам бўлганлар. Баъзи манбаларга кўра Абу Ҳанифа ва Имом Моликнинг ҳам устози бўлганлар. Ҳижрий 148, милодий 765 йили вафот этган. Қабрлари Бақиъ қабристонида, оталари Муҳаммад Боқир, боболари Зайнулобидин, катта амакилари Имом Ҳасан ёнларига дафн этилган.

Суфёни Саврий ҳижрий 97, милодий 716 йил Куфада туғилиб, ҳижрий 161, милодий 778 йил вафот этган. Абу Абдуллоҳ Суфён ибн Саъид ибн Масруқ Саврий Куфий, у зотнинг тўлиқ исми шарифи ҳисобланади. Мужтаҳид, ҳадис бўйича мўминлар амири унвонига эга, “Ал-жомеъ” китоби муаллифи, илмига амал қилувчи, ўз замонасидаги олимларнинг саййиди бўлган. Суфёни Саврий Расулуллоҳ соллаллоҳу алайҳи васалламнинг ўн еттинчи боболари Илёс ибн Музарнинг чевараси Савр ибн Абдуманот авлодига мансуб бўлгани учун “Саврий” дейилади!

Абу Нуаймнинг "Ҳилятул авлиё”, Зириклийнинг "Ал-Аълом" асарлари асосида ТИИ Ҳадис ва Ислом тарихи фанлари кафедраси катта ўқитувчиси Пўлатхон КАТТАЕВ тайёрлади.

 

Мақолалар
Бошқа мақолалар
Янгиликлар

Дунё олимлари Термизда: халқаро анжуман икки шўъбада давом этмоқда

20.11.2026   2505   1 min.
Дунё олимлари Термизда: халқаро анжуман икки шўъбада давом этмоқда

Бугун, 20 ноябрь куни Термиз шаҳридаги Имом Термизий халқаро илмий-тадқиқот марказида буюк аллома таваллудининг 1200 йиллигига бағишланган «Ҳаким Термизий илмий-маънавий меросининг бугунги кундаги аҳамияти» мавзусидаги халқаро илмий конференция бўлиб ўтмоқда.

Қуръони карим тиловати билан бошланган тадбирнинг очилиш маросимида Сурхондарё вилояти ҳокими Улуғбек Қосимов, Президент Администрацияси масъул ходими Эргаш Даминов, Дин ишлари бўйича қўмита раиси ўринбосари Даврон Махсудов, Ўзбекистон мусулмонлари идораси раисининг биринчи ўринбосари Ҳомиджон домла Ишматбеков ҳамда Қирғизистон Ислом академияси ректори Эрмамат Эргешов сўзга чиқдилар.

Анжуманда Ўзбекистон, Малайзия, Миср, Қирғизистон, Италия, Сурия ва Афғонистон каби мамлакатлардан 50 дан зиёд хорижий ва маҳаллий олим ва исломшунос мутахассислар қатнашмоқда.

Очилиш маросимида Ҳомиджон домла Ишматбеков алломанинг «Хатм ал-авлиё», «Наводир ал-усул» каби юздан ортиқ нодир асарларида илгари сурилган қалб поклиги, нафс тарбияси ва ҳадис ҳикматларига оид ғоялар бугунги глобаллашув даврида ёт оқимларга қарши курашиш ҳамда ёшлар тарбиясида мустаҳкам маърифий асос эканини таъкидлади. Шунингдек, юртимизда Ислом цивилизацияси маркази ва илмий-тадқиқот марказларининг ташкил этилиши, Ҳаким Термизий мажмуасининг обод қилиниши буюк аждодлар меросини тиклаш йўлидаги ислоҳотлар самараси экани қайд этилди.

Ялпи мажлисда Ўзбекистон, Малайзия, Миср ва Қирғизистоннинг етакчи олимлари Ҳаким Термизий асарларини замонавий илм-фан асосида ўрганиш ва халқаро илмий ҳамкорликни кучайтириш юзасидан маърузалар қилдилар.

Айни пайтда анжуман «Ислом цивилизацияси ривожида Ҳаким Термизий мактаби» ҳамда «Ҳаким Термизий маънавий мероси – замонавий глобал таҳдидларга ечим» номли икки шўъбада давом этмоқда. Уларда олимларнинг ўттиздан ортиқ маърузалари тингланиб, якунда илмий таклиф ва тавсиялар ишлаб чиқилади.

Ўзбекистон мусулмонлари идораси Матбуот хизмати

Ўзбекистон янгиликлари