Hazrat Mavlono Zulfiqor Ahmad Naqshbandiy hafizahulloh aytadilar:

“Ayolning duolari ila insonning farzandlari dinida baraka bo‘ladi. Bu nozik jihatni yodda tuting! Siz ko‘rasizki, bir necha buyuk dindor odamlar bo‘ladilar. Magar, xarakterlari juda yomon va og‘ir bo‘lgani sababli, ayollariga doimo yomon muomala qilaveradilar. Shu sababli ularning farzandlari dindor bo‘lmaydi. Endi, bular o‘zlari katta olimlar, muftiylar. Lekin farzandlari benamozligidan tashvishda bo‘ladilar”.

Bir voqea

Mening oldimga bir kuni bir katta muftiy janoblari farzandini olib keldi va: “Hazrat, men o‘g‘limni hadis davralariga qatnashtirdim. Uning haqqiga duo qiling. U farz namozlarni o‘qimaydi” dedi.

Men buni eshitib titrab ketdimki, bola hadis davrasiga qatnashgan, shundan keyin ham farz namozini o‘qimaydi...

Men unga: “Farzandingiz dindor bo‘lishini xohlaysizmi?” dedim.

U: “Ha, albatta” dedi.

Men: “Ayolingizning duolarini oling”, dedim. Shunda, u qahqaha otib kulib yubordi.

Men: “Siz buni oddiy narsa deb tushunmang. Men buni ulug‘larimizdan eshitganman va barakasini ko‘rganman. Siz ayolingizga mehr qo‘ying. Ayolingizning duolarini oling. Keyin, Alloh taolo farzandlaringizni qanday solih qilishini tomosha qiling” dedim.

Allohning qudratiki, ikki yildan keyin o‘sha muftiy hazrat yana keldi va “o‘g‘lim tarovehda xatmi Qur’onga o‘tdi” dedi.

Men: “Farz namozlarni o‘qimaydigan bola qanday qilib xatmi Qur’onga o‘tdi?" dedim.

U: “Hazrat! Siz aytgach, men ayolimga mehr qo‘ydim va unga “farzandlarimizning solih bo‘lishi uchun duo qil” dedim. Alloh taolo uning duosini qabul qildi va farzandlarimizni solih qildi” dedi.

Ota-onaning duolar ila moddiy rizqda baraka bo‘ladi. Ustozning duolari ila fayzda baraka bo‘ladi. Ayolining duolari ila insonning farzandlari solih bo‘ladi.

“Taaba manzil sirf devane gaye” kitobidan
Abdulqayyum Komil tarjimasi