Imom Buxoriy xalqaro ilmiy-tadqiqot markazi, O'zbekiston xalqaro islom akademiyasi, O'zbekiston musulmonlari idorasi hamda “Hilol-nashr” matbaa-nashriyoti hamkorligida chop etilgan Imom Buxoriyning “Sahihi Buxoriy” asari o'zbek tilidagi sharhi kitobi haqida Misrning Cairo 24.com elektron nashri, elbalad.news sayti hamda Al-Azhar universitetining “Al-Azhar ovozi” gazetasida chop etildi.

Maqolalarda buyuk ajdodlarimizning islom ilmlari sohasidagi ilmiy merosi ayni kungacha dunyo musulmonlari hayotida muhim ahamiyat kasb etib kelayotgani, xususan Movarounnahr hududidan chiqqan buyuk muhaddis allomalarning hadis ilmi borasidagi boy ilmiy-ma'naviy tajribasi islom tsivilizatsiyasi rivojiga munosib hissa qo'shgani e'tirof etilgan.  

Imom Buxoriy xalqaro ilmiy-tadqiqot markazi axborot xizmatining ma'lum qilishicha, Cairo 24.com elektron nashrida “Ilk marotaba... Sahihi Buxoriyning o'zbek tiliga tarjimasi” nomi ostida chop etilgan maqola “Islom tarixi buyuk alloma va mutafakkirlarga boy. Islom kutubxonasini turli ilmlar bilan boyitgan olimlarning aksariyatini Osiyo qit'asining daryodan narigi tomonidagi mamlakatlaridan topamiz. Bugungi kunda O'zbekiston davlati o'z mamlakatida jahon tsivilizatsiyasi va ilmiy taraqqiyoti hamda islom ilmlari rivojiga hissa qo'shgan muhaddislar, tarjimonlar, ilohiyotshunos va huquqshunoslar hayoti va qoldirgan merosini ilmiy tadqiq etish yo'li bilan o'rganishga kirishgan”, degan so'zlar bilan boshlangan.  

Maqolada “Sahihi Buxoriy” asariga o'zbek tilida berilgan sharhning xususiyatli jihatlariga keng o'rin berilgan. elbalad.news saytidagi “Qur'ondan keyingi eng muqaddas kitob: “Sahih al-Buxoriy”ning o'zbek tiliga ilk bor tarjimasi” nomli maqolada ushbu ko'p jildli sharh dunyo ulamolari bilan hamnafas bo'lish, o'zbek xalqining “Sahih al-Buxoriy” tadqiqiga hissasi borligini isbotlash maqsadida yaratilgani ta'kidlangan. “Al-Azhar ovozi” gazetasi e'lon qilgan “Yangi nashr. “Sahih al-Buxoriy”ning o'zbek tilida batafsil izohi” nomli maqolada o'zbek tilida taqdim qilingan mazkur nashr hadis ilmi borasidagi bilimlarni yanada mustahkamlash hamda Imom Buxoriyning boy ma'naviy merosini to'laroq anglashga asos bo'lib xizmat qilishiga urg'u berilgan.  

Maqolalarning barchasida O'zbekiston xalqaro islom akademiyasi rektori Muzaffar Komilov, Imom Buxoriy xalqaro ilmiy-tadqiqot markazi direktori Shovosil Ziyodov hamda Markaz direktori o'rinbosari Otabek Muhammadiyevning yangi nashr yuzasidan bildirgan fikrlaridan iqtiboslar keltirilgan. elbalad.news sayti hamda Cairo 24.com elektron nashri ta'biri bilan aytganda “Kitob nafaqat O'zbekiston, balki butun dunyo xalqlari uchun qimmatli ma'naviy meros sifatida baholanishiga ishonamiz”.  

G'.HASANOV, O'zA