Бозор дарвозасидан кириб-чиқаётганлар дарвоза олдида совуқдан жунжикиб ўтирган чамаси уч-тўрт ёшли қизчага бефарқ қараб ўтолмасди. Кимдир унга қанд, кимдир юмшоқ кулча узатарди.
Ўттиз ёшлардаги аёл бозор-ўчарини қилиб бўлгач, дарвоза олдига келиб сумкаларини ерга қўйди. Шу пайт ёнгинасида катта-катта қора кўзлари жавдираб турган қизалоққа кўзи тушди. Совуқда дир-дир титраётган қизчага ичи ачиди. Яқинига келди. Музлаган қўлчаларидан тутиб, бағрига босди ва:
– Айланай қизим, совқотибсан-ку, ойинг қани? Нега бир ўзинг бу ерда турибсан?
Қизалоқ кўзларини юмиб-очиб, йиғлаб юборди:
– Ойим... Ҳозир келаман, деб... Келмади...
Аёл қизчани бағрига босаркан, чўнтакчасидаги букланган қоғозга кўзи тушди. Уни очиб, ўқий бошлади:
“Ассалому алайкум! Ким қизимни фарзандликка олиб, бағрига босса, мендек бағритош онани кечирсин. Ота-онам дунёдан ўтганига анча бўлди. Қизим билан ҳар жойда, ижара уйларда яшадим. Тикувчилик қилдим. Аммо ишим олдинга юрмай, жуда қийналдим. Қизим ҳам мен каби қийналишини истамайман. Кечқурун Россияга жўнаб кетяпман. Қизимни сийлаганларни Худо сийласин!..”.
Аёл хатни ўқиркан, кўзларидан дув-дув ёш оқарди. Қизчани бағрига босганча лаблари пичирлади: “Бечорагина...”. У қизчани даст кўтариб, бир қўлида сумкалар билан борарди. Уларнинг зил-замбилдек оғирлиги энди аёлга сезилмасди...!
Сеул шаҳрида Ўзбекистон мусулмонлари идораси раиси ўринбосари Зайниддин домла Эшонқулов бошчилигидаги Ўзбекистон делегациясининг Жанубий Корея мусулмонлари жамоати бош имоми Ли Жу Хва-Абдураҳмон Ли билан учрашуви бўлиб ўтди.
Мезбон имом юртимиз уламоларини ташриф билан қутлаб, бундай манфаатли ташрифларни тез-тез ташкил этиш, бу хусусда Ўзбекистон мусулмонлари идораси билан шартнома имзолангани, шартномага мувофиқ алоқаларни янада мустаҳкамлаш лозимлигини айтиб ўтди. Имом Бухорий, Имом Термизий каби улуғ зотларимизнинг ислом тамаддунига қўшган беқиёс ҳиссасини, Самарқанд, Бухоро, Хива каби тарихий шаҳарларимиз мусулмон олами эътиборини қозонганини, юртимизда амалга оширилаётган бугунги ислоҳотларни эътироф этди.
Ўз навбатида, юртимиз вакили мамлакатларимиз ўртасида ҳамкорлик тобора ривожланиб бораётгани, диний идораларнинг муносабатлари равнақ топаётгани, имомларимизнинг ушбу давлатга сафар қилишлари анъана тусини олгани, бундай ҳамкорлик икки давлат мусулмонлари учун ҳам ҳар томонлама манфаатли бўлишини таъкидлади.
Томонлар бир-бирларига эсдалик ҳадялар топширишди.
Зайниддин домла Эшонқуловдан Сеул шаҳридаги 1250 кишилик марказий масжидда жума намозини ўқиб бериш сўралди. Бу ҳам бўлса, кунчиқар мамлакат мусулмонларининг юртимиз алломаларига бўлган юксак эҳтироми ифодасидир.
Жума намозидан сўнг Зайниддин домла ватандошларимизга муфтий Шайх Нуриддин Холиқназар ҳазратларининг саломларини етказиб, ҳалол касб қилиш, ризқни кенгайтирадиган амаллар, оила муқаддаслиги, фарзанд неъмати ҳақида диний-маърифий суҳбат қилиб берди.
Шунингдек, учрашувда ҳамюртларимизга улар яшаётган мамлакат қонун-қоидаларига амал қилишлари, мусулмонлик одобига риоя этишлари эслатиб ўтилди. Улар эгаллаган билим-малакалари келгусида юртимиздаги турли соҳалар ривожи ҳамда аҳоли фаровонлигида ҳам иш беришига умид билдирилди.
Сеул марказий масжидида Ўзбекистон мусулмонлари идораси томонидан чоп этилган 5 турдаги диний-маърифий буклетлар тарқатилиб, хайрли дуолар қилинди.
Ўзбекистон мусулмонлари идораси
Матбуот хизмати