Расулуллоҳ соллаллоҳу алайҳи васаллам бундай дедилар: “Ким илм талаб қилиш йўлига юрса, Аллоҳ унга жаннат йўлини осон қилиб қўяди”.
Илм талаб қилиш – жаннатга элтувчи энг яхши ва энг осон йўл. Толиби илм илм учун сарфлайдиган ҳар қандай ҳаракат уни жаннатга яқинлаштиради ва унга Жаннат йўлини осон қилади. Ҳар бир мусулмон биринчи навбатда шариат илмини ўрганишга бел боғлаши даркор. Зотан бу уни тўғри, соғлом илмга эришиш йўлини очади, тўғри маълумотдан хато маълумотни ажрата билиш имконини беради.
Илм талаб қилиш Аллоҳнинг розилигига элтади.
Расулуллоҳ соллаллоҳу алайҳи васаллам айтадилар: “Албатта, фаришталар толиби илмнинг илм талаб қилганидан миннатдор бўлиб, қанотларини унга ёзишади”.
Ушбу ҳадис шариат илми ва уни талаб қилувчиларнинг даражаси нақадар баландлигидан дарак беради, негаки, Аллоҳ таоло ундан рози бўлгандан фаришталарни қанот ёзиб турадиган қилиб қўйди. Фаришталар қанот ёзиб туриши толиби илмга илм йўлини осон қилади, илм эшикларини очади.
Бутун борлиқ толиби илм ҳаққига истиғфор айтади.
Абу Дардо розияллоҳу анҳудан ривоят қилинади: Расулуллоҳ соллаллоҳу алайҳи васаллам бундай дедилар: “Олимнинг ҳаққига осмонлар ва ердаги барча нарса, ҳатто денгиздаги балиқ ҳам истиғфор айтади”.
Шаръий илмнинг ва унинг талабида бўлган толибларнинг қадри шу қадар баланд эканки, еру осмонлардаги барча мавжудотлар унинг ҳаққига истиғфор айтар экан. Бундан баланд даража борми?! Мусулмон учун бундан ортиқ яхшилик борми?!
Доктор Ҳассон Шамси Пошонинг “Метин қоялар” китобидан
Ғиёсиддин Ҳабибуллоҳ, Неъматуллоҳ Исомов таржимаси.
Кўҳна ва ҳамиша навқирон Самарқанд яна хайрли ташаббуслар ва самарали ҳамкорлик майдонига айланди. Шу йил 18 ноябрь куни буюк муҳаддис Имом Бухорий мажмуасида ўтган XIV «Global Waqf» халқаро анжумани доирасида вақф тизимини ривожлантиришга қаратилган қатор муҳим учрашувлар ва расмий келишувлар амалга оширилди.
Музокараларнинг энг муҳим натижаси сифатида «Вақф» хайрия жамоат фонди, Малайзиянинг Халқаро Вақф Фаолияти Кенгаши (iWAQF) ҳамда Малайзия Халқаро Ислом Университети (IIUM) ўртасида уч томонлама ҳамкорлик меморандуми имзоланди. Ушбу ҳужжат вақф соҳасида таълим ва илмий-амалий лойиҳаларни қўллаб-қувватлаш, академик алмашинувни йўлга қўйиш, махсус ўқув модулларини яратиш ва малакали кадрлар тайёрлашга кенг йўл очади.
Шу билан бирга, Зайниддин домла Эшонқулов Бирлашган Араб Амирликларининг Ислом ишлари, вақфлар ва закот бўйича Бош ваколатли органи делегацияси ҳамда Туркия Диёнат вақфи вакили Салмон Оқтош билан икки томонлама мулоқотлар ўтказди. Самимий учрашувларда вақф мулкларини замонавий усулларда самарали бошқариш, хайрия фаолиятини такомиллаштириш ва келгусидаги қўшма лойиҳаларни амалга ошириш истиқболлари юзасидан аниқ фикр алмашилди.
Халқаро мулоқотлар аҳамиятига тўхталган Малайзиянинг Ўзбекистондаги элчихонаси вакили Арҳан Шоҳ Анвар илгари Малайзия, Туркия ва Марокашда ўтказилган ушбу конференция бу гал Самарқандда ташкил этилганидан мамнунлигини билдирди. У Президент фармони билан юртимизда ислом молияси жорий этилаётган даврда мазкур анжуман икки ҳафта аввал ўтган Самарқанд ислом молияси конференциясининг мантиқий давоми эканини, хорижий тажриба алмашинуви эса уммат равнақи ва Ўзбекистон манфаатларига хизмат қилишини эътироф этди.
Учрашувлар якунида томонлар эсдалик совғалари алмашиб, хорижий делегациялар Имом Бухорий мажмуасини зиёрат қилдилар ҳамда буюк муҳаддиснинг илмий-маънавий мероси ва мажмуадаги бунёдкорлик ишлари билан яқиндан танишдилар.
Ўзбекистон мусулмонлари идораси Матбуот хизмати