Rasululloh sollallohu alayhi vasallam bunday dedilar: “Kim ilm talab qilish yo'liga yursa, Alloh unga jannat yo'lini oson qilib qo'yadi”.
Ilm talab qilish – jannatga eltuvchi eng yaxshi va eng oson yo'l. Tolibi ilm ilm uchun sarflaydigan har qanday harakat uni jannatga yaqinlashtiradi va unga Jannat yo'lini oson qiladi. Har bir musulmon birinchi navbatda shariat ilmini o'rganishga bel bog'lashi darkor. Zotan bu uni to'g'ri, sog'lom ilmga erishish yo'lini ochadi, to'g'ri ma'lumotdan xato ma'lumotni ajrata bilish imkonini beradi.
Ilm talab qilish Allohning roziligiga eltadi.
Rasululloh sollallohu alayhi vasallam aytadilar: “Albatta, farishtalar tolibi ilmning ilm talab qilganidan minnatdor bo'lib, qanotlarini unga yozishadi”.
Ushbu hadis shariat ilmi va uni talab qiluvchilarning darajasi naqadar balandligidan darak beradi, negaki, Alloh taolo undan rozi bo'lgandan farishtalarni qanot yozib turadigan qilib qo'ydi. Farishtalar qanot yozib turishi tolibi ilmga ilm yo'lini oson qiladi, ilm eshiklarini ochadi.
Butun borliq tolibi ilm haqqiga istig'for aytadi.
Abu Dardo roziyallohu anhudan rivoyat qilinadi: Rasululloh sollallohu alayhi vasallam bunday dedilar: “Olimning haqqiga osmonlar va erdagi barcha narsa, hatto dengizdagi baliq ham istig'for aytadi”.
Shar'iy ilmning va uning talabida bo'lgan toliblarning qadri shu qadar baland ekanki, eru osmonlardagi barcha mavjudotlar uning haqqiga istig'for aytar ekan. Bundan baland daraja bormi?! Musulmon uchun bundan ortiq yaxshilik bormi?!
Doktor Hasson Shamsi Poshoning “Metin qoyalar” kitobidan
G'iyosiddin Habibulloh, Ne'matulloh Isomov tarjimasi.
Ko‘hna va hamisha navqiron Samarqand yana xayrli tashabbuslar va samarali hamkorlik maydoniga aylandi. Shu yil 18 noyabr kuni buyuk muhaddis Imom Buxoriy majmuasida o‘tgan XIV «Global Waqf» xalqaro anjumani doirasida vaqf tizimini rivojlantirishga qaratilgan qator muhim uchrashuvlar va rasmiy kelishuvlar amalga oshirildi.
Muzokaralarning eng muhim natijasi sifatida «Vaqf» xayriya jamoat fondi, Malayziyaning Xalqaro Vaqf Faoliyati Kengashi (iWAQF) hamda Malayziya Xalqaro Islom Universiteti (IIUM) o‘rtasida uch tomonlama hamkorlik memorandumi imzolandi. Ushbu hujjat vaqf sohasida ta’lim va ilmiy-amaliy loyihalarni qo‘llab-quvvatlash, akademik almashinuvni yo‘lga qo‘yish, maxsus o‘quv modullarini yaratish va malakali kadrlar tayyorlashga keng yo‘l ochadi.
Shu bilan birga, Zayniddin domla Eshonqulov Birlashgan Arab Amirliklarining Islom ishlari, vaqflar va zakot bo‘yicha Bosh vakolatli organi delegatsiyasi hamda Turkiya Diyonat vaqfi vakili Salmon Oqtosh bilan ikki tomonlama muloqotlar o‘tkazdi. Samimiy uchrashuvlarda vaqf mulklarini zamonaviy usullarda samarali boshqarish, xayriya faoliyatini takomillashtirish va kelgusidagi qo‘shma loyihalarni amalga oshirish istiqbollari yuzasidan aniq fikr almashildi.
Xalqaro muloqotlar ahamiyatiga to‘xtalgan Malayziyaning O‘zbekistondagi elchixonasi vakili Arhan Shoh Anvar ilgari Malayziya, Turkiya va Marokashda o‘tkazilgan ushbu konferensiya bu gal Samarqandda tashkil etilganidan mamnunligini bildirdi. U Prezident farmoni bilan yurtimizda islom moliyasi joriy etilayotgan davrda mazkur anjuman ikki hafta avval o‘tgan Samarqand islom moliyasi konferensiyasining mantiqiy davomi ekanini, xorijiy tajriba almashinuvi esa ummat ravnaqi va O‘zbekiston manfaatlariga xizmat qilishini e’tirof etdi.
Uchrashuvlar yakunida tomonlar esdalik sovg‘alari almashib, xorijiy delegatsiyalar Imom Buxoriy majmuasini ziyorat qildilar hamda buyuk muhaddisning ilmiy-ma’naviy merosi va majmuadagi bunyodkorlik ishlari bilan yaqindan tanishdilar.
O‘zbekiston musulmonlari idorasi Matbuot xizmati