20 Май, 2026, 2 Зулҳижжа, 1447
20 Май, 2026, 2 Зулҳижжа, 1447
Бисмиллаҳир Роҳманир Роҳийм
Зулҳижжа сўзи қандай маънони англатади?
“Ҳаж эгаси” деган маънони билдиради.
Зулҳижжа ойи қандай ой?
Бу ой Аллоҳ таоло уруш, қон тўкишни ҳаром қилган (Зулҳижжа, Зулқаъда, Муҳаррам, Ражаб) тўрт ойнинг бири, ҳижрий-қамарий тақвимнинг охирги ойидир.
Зулҳижжа ойи қандай фазилатларга эга?
Ҳаж ибодати адо этиладиган, қурбонлик қилинадиган, Арафа ва Қурбон ҳайити нишонланадиган ой. Бу ойда, айниқса унинг дастлабки ўн кунида қилинган ибодатлар Аллоҳ таоло учун энг севимли амаллардан саналади. Расулуллоҳ соллаллоҳу алайҳи васаллам: “Зулҳижжа ойининг ўн кунидаги амалдан кўра афзалроқ амал йўқдир”, деганлар (Имом Ибн Ҳиббон ривояти).
Бу ойда тутилган рўза икки йиллик гуноҳларга каффорот бўлади
Набий соллаллоҳу алайҳи васаллам: “Арафа кунининг рўзаси ўзидан аввалги бир йил ва ўзидан кейинги бир йилнинг гуноҳларига каффорат бўлишини Аллоҳдан умид қиламан”, деганлар (Имом Муслим ривояти).
Зулҳижжа ойини Расулуллоҳ соллаллоҳу алайҳи васаллам қандай ўтказардилар?
Расулуллоҳ соллаллоҳу алайҳи васаллам Зулҳижжа ойининг дастлабки тўққиз кунида, Ашуро кунида ва ҳар ойдан уч кунда – ойнинг аввалги душанбаси билан икки пайшанбасида – рўза тутардилар (Имом Аҳмад ривояти).
Набий соллаллоҳу алайҳи васаллам янада кўпроқ зикр қилардилар ва: “...Бу кунларда таҳлил (Лаа илаҳа иллаллоҳ Муҳаммадур Расулуллоҳ), такбир (Аллоҳу акбар) ва таҳмид (Алҳамдулиллаҳ) айтишни кўпайтиринглар!” дердилар (Имом Аҳмад, Имом Байҳақий ривояти).
Расулуллоҳ соллаллоҳу алайҳи васаллам ушбу дуони кўп айтардилар: “Лаа илаҳа иллаллоҳу ваҳдаху лаа шарийка лаҳу, лаҳул мулку ва лаҳул ҳамду ва ҳува ъала кулли шайьин қодийр” (Имом Термизий ривояти).
Даврон НУРМУҲАММАД
Шу йил 19 май куни Ўзбекистон мусулмонлари идораси раис ўринбосари Зайниддин домла Эшонқулов раислигида Қурбон ҳайитига кўриладиган тайёргарлик масалаларига бағишланган мажлис бўлиб ўтди.
ZOOM платформаси орқали онлайн шаклда ташкил этилган мазкур видеоселектор йиғилишида Диний идора тизимидаги Қорақалпоғистон Республикаси, вилоятлар ва Тошкент шаҳар вакилликларининг бош имом-хатиблари ва мутахассислар иштирок этди.
Муҳокамалар марказида улуғ айём — Қурбон ҳайити намозларини юртимизда уюшқоқлик, юқори тартиб-интизом ва кўтаринки руҳда ўтказиш масалалари турди. Хусусан, ҳайит намози вақтларини белгилаш, жойлардаги масжидларнинг байрам тадбирларига шайлик ҳолатини кўздан кечириш, намозхонлар учун хавфсизлик ва санитария-гигиена талабларига қатъий риоя қилган ҳолда барча қулай шарт-шароитларни яратиш бўйича муҳим вазифалар белгилаб олинди.
Муқаддас динимизнинг эзгу тамойилларига мувофиқ, айём арафасида меҳр-мурувват ва саховат тадбирларини кенгайтиришга алоҳида эътибор қаратилди. Бу борада ҳудудлардаги эҳтиёжманд, кам таъминланган ва кўмакка муҳтож оилалар ҳолидан хабар олиш, уларга ҳам моддий, ҳам маънавий жиҳатдан далда бўлиш юзасидан имом-хатибларга тегишли топшириқлар берилди.
Шу билан бирга, юртимиздаги қабристон ва зиёратгоҳларни ободонлаштириш, тозалик ишларини кучайтириш ҳамда атроф-муҳитни тартибга келтириш бўйича уюшқоқлик билан ҳашарлар ташкил этиш зарурлиги қайд этилди.
Йиғилиш якунида барча ҳудудий вакилликларга ҳайит тадбирларини юқори савияда ташкил этиш ва фуқароларимизнинг ибодатларини эмин-эркин адо этишларини таъминлаш юзасидан тегишли кўрсатмалар берилди.
Ўзбекистон мусулмонлари идораси
Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 