Сайт тест ҳолатида ишламоқда!
17 Ноябр, 2026   |   7 Жумадул сони, 1448

Тошкент шаҳри
Бомдод
05:51
Қуёш
07:13
Пешин
12:13
Аср
15:21
Шом
17:05
Хуфтон
18:22
Bismillah
17 Ноябр, 2026, 7 Жумадул сони, 1448
Янгиликлар

Ҳамдардлик

07.08.2024   9742   1 min.
Ҳамдардлик

Ўзбекистон мусулмонлари идораси Уламолар Кенгаши Шимолий Кавказ мусулмонларининг мувофиқлаштирувчи маркази раиси Исмоил Бердиевнинг вафоти муносабати билан Шимолий Кавказнинг барча мусулмонларига, раҳматли уламонинг оила аъзолари, сафдошлари, шогирдлари ва яқинларига чуқур ҳамдардлик билдиради.  

Шимолий Кавказдаги мўмин-мусулмон биродарларимизнинг ушбу улкан қайғу ва йўқотишларига шерик бўлган ҳолда, Аллоҳ таолодан уларга сабр-бардош тилаймиз. Зеро, Қуръони каримда: “…Албатта, биз Аллоҳнинг ихтиёридамиз ва албатта, биз Унинг ҳузурига қайтувчилармиз…”, дейилган (Бақара сураси, 156-оят). 

Яратган парвардигор таниқли уламо Исмоил Бердиевнинг Ислом дини равнақи йўлида олиб борган саъй ҳаракатлари, мўмин-мусулмонлар эҳтиёжини таъминлаш ва халқларимиз ўртасидаги дўстликни мустаҳкамлашдаги хизматларини ҳусни қабул айлаб, улкан ажру савоблар ато этсин. 

Маълумот ўрнида Исмоил ҳожи Бердиев 1954 йили Қозоғистон Республикасининг Сайрам вилоятида таваллуд топган. У киши 1982–1988 йилларда Бухородаги Мир Араб мадрасасини, 1988–1992 йилларда Тошкент ислом институтини ва Миср Араб Республикасининг ал-Азҳар университетини тамомлаган.

 1989 йилда Ставропол ўлкаси мусулмонлари қозиёти раиси этиб сайланган. 1991 йилда Карачай-Черкес Республикаси ва Ставропол ўлкаси мусулмонлари диний бошқармаси раиси бўлган. 2010 йилдан Карачай-Черкес Республикаси мусулмонлари диний бошқармаси раиси бўлиб ишлаган.

 2004 йилдан умрининг охиригача Россия Президенти ҳузуридаги диний бирлашмалар билан ҳамкорлик масалалари бўйича кенгаш аъзоси бўлган.

Ҳақ таоло марҳум олимнинг сафдошлари, шогирдлари, яқинлари, аҳли оиласи, фарзанду аржумандларига чиройли сабр бериб, бу мусибатларини яхшиликлар ила тўлдирсин.

Биз Буюк Парвардигордан дуо қилиб сўраймизки, марҳум уламони ўзининг чексиз раҳматига олсин, жаннат боғларига дохил этсин.

Ўзбекистон мусулмонлари идораси

Ўзбекистон янгиликлари
Бошқа мақолалар
Янгиликлар

Ўмон Султонлигида нуфузли халқаро форум бўлиб ўтди

17.11.2026   1138   2 min.
Ўмон Султонлигида нуфузли халқаро форум бўлиб ўтди

Ўмон Султонлигининг Масқат шаҳридаги "Hilton Muscat Al Bandar" мажмуасида халқаро форум бўлиб ўтди. Шу йилнинг 15-16 ноябрь кунлари ўтказилган ушбу нуфузли анжуманда Ўзбекистон мусулмонлари идораси раисининг биринчи ўринбосари Ҳомиджон домла Ишматбеков ҳам иштирок этди.

Мазкур халқаро форум Бирлашган Миллатлар Ташкилотининг Геноциднинг олдини олиш ва ҳимоя қилиш масъулияти бўйича бошқармаси (UNOSAPG), Ўмон Султонлиги Вақф ва диний ишлар ҳамда Ташқи ишлар вазирликлари, шунингдек, "Дин ва анъанавий тинчликпарварлар тармоғи" (The Network for Religious and Traditional Peacemakers) ҳамкорлигида ташкил этилди.

Тадбирнинг асосий мақсади камситиш ва зўравонликнинг олдини олиш, шунингдек, ўзаро мулоқот, бағрикенглик ва тинч-тотувликни кенг тарғиб қилишда амалий ёндашувларни ишлаб чиқишдан иборат бўлди.

Эътиборлиси, форумнинг асосий тадбирлари Бирлашган Миллатлар Ташкилотининг Халқаро бағрикенглик кунига (16 ноябрь) тўғри келгани ўзаро ҳурмат ва тинч-тотув яшаш қадриятларини мустаҳкамлаш учун муҳим майдон вазифасини ўтади.

Халқаро тадбирда дунёнинг турли давлатларидан келган таниқли уламолар, диний ва анъанавий етакчилар, ҳукумат вакиллари, БМТ ва бошқа йирик халқаро ташкилотлар мутасаддилари жам бўлди. Форум дастури доирасида муҳим сессиялар бўлиб ўтиб, тинчлик ва хавфсизликни таъминлашда халқаро ҳамкорлик механизмлари ҳамда бағрикенгликни илгари суришда диний етакчилар ва оммавий ахборот воситаларининг ўрни каби мавзуларда юқори даражадаги муҳокамалар олиб борилди.

 Шунингдек, халқаро тадбир доирасида юртимиз вакиллари дунёнинг қатор давлатларидан ташриф буюрган нуфузли уламолар, диний етакчилар ва соҳа мутахассислари билан учрашувлар ўтказдилар. Самимий руҳда кечган мулоқотлар давомида диний-маърифий соҳани ривожлантириш, соф Ислом маърифатини кенг ёйиш ҳамда бугунги куннинг долзарб масалалари ечими бўйича ўзаро тажриба алмашилди.

Ўзбекистон вакилларининг бундай нуфузли халқаро анжуманлардаги иштироки юртимизда олиб борилаётган диний-маърифий соҳадаги ислоҳотлар, динлараро бағрикенглик ва тинчликсеварлик тамойилларини жаҳон ҳамжамиятига етказишда муҳим аҳамият касб этади.

Ўзбекистон мусулмонлари идораси Матбуот хизмати

Ўзбекистон янгиликлари