Бугун, 22 август куни Ватанимиз мустақиллигининг 33 йиллиги муносабати билан Шовотдаги "Араб бобо" жоме масжидининг янгидан қуриб битказилган биносининг очилиш маросими ўтказилди. 

Мазкур тадбирда Хоразм вилояти бош имом-хатиби Хайрулла домла Абдуллаев, "Имом Фахриддин ар-Розий" билим юрти мудири Давронбек домла Абдуқодиров, шаҳар ва туман бош имом-хатиблари, мутасаддилар, маҳалла аҳли жам бўлишди. 

Маросимда Қуръони карим оятлари ўқилиб, Ҳақ таолодан янги масжид халқимиз эътиқоди, маърифатини мустаҳкамлашда ҳидоят ва зиё маскани бўлиб кўп йиллар хизмат қилишини сўраб, бу эзгу ишга ҳисса қўшган барчанинг ҳаққига дуолар қилинди. 

  Маълумот ўрнида мазкур масжид қурилиши 2022 йил бошланган бўлиб, ҳомийлар ва маҳалла аҳли кўмагида бунёд этилди. Масжидда намозхонлар учун барча шароитлар ҳозирланган. 1500–1600 нафар номозхон бемалол ибодатларини адо этиши мумкин. 

Мажмуанинг умумий майдони ярим гектар. Хонақоҳ икки қаватли бўлиб, гумбазнинг баландлиги 23 метр ва  айланаси 33 метрни ташкил этади. Таҳоратхона бир вақтда  20 дан ошиқ намозхонга хизмат кўрсатади. Мажмуада имом-хатиб, қабулхона ва бошқа зарурий хоналар ва  маъмурий бинолари мавжуд. 

Ўзбекистон мусулмонлари идораси
Матбуот хизмати